ប៉ូលិសថៃកំពុងបង្កើនយុទ្ធនាការផ្សព្វផ្សាយ ប្រយុទ្ធនឹងសកម្មភាពបោកប្រាស់តាមអ៊ិនធឺណេត

ដោយសារតែមានការកើនឡើងនៃចំនួនជនរងគ្រោះពីការបោកប្រាស់តាមបណ្ដាញអ៊ីនធឺណេតច្រើនខ្លាំងពេក ទីបំផុតអាជ្ញាធរថៃនៅខេត្តខនកេន បានបង្ហាញយុទ្ធនាការផ្សាយផ្ទាំងប្រដាធំៗ ដើម្បីជាសារដាស់តឿនប្រជាពលរដ្ឋគេចចេញពីការបោកប្រាស់សម័យថ្មីនេះ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការចុះផ្សាយពីសារព័ត៌មាន Bangkok Post កាលពីថ្ងៃពុធ ទី២៨ បានបង្ហាញផ្ទាំងបដាធំៗចំនួន២ ព្យួរនៅខាងក្រៅប៉ុស្តិ៍ប៉ូលិស ខេត្តខនកេន ដោយមួយផ្ទាំងមានសរសេរអក្សរដាស់តឿនថា “កុំជឿ” “កុំប្រញ៉ាប់” “កុំផ្ទេរ” “កុំចុចតំណភ្ជាប់” និងមួយផ្ទាំងទៀត សរសេរថា “ជនរងគ្រោះពីការបោកប្រាស់តាអ៊ិនធឺណេត ត្រូវទូរស័ព្ទទៅលេខ ១៤៤១” ។

ជាមួយគ្នានេះ លោក Pol Col Yotsawat Kaewsuebthanyanit អធិការនគរបាលក្រុង Muang បាននិយាយថា ស្លាកសញ្ញានេះត្រូវបានដាក់ឡើង ដោយសារតែមានពាក្យបណ្តឹងច្រើនលើសលប់អំពីការក្លែងបន្លំតាមអ៊ីនធឺណេត ។លោកបានបញ្ជាក់ថា កាលពីឆ្នាំមុន មានជនរងគ្រោះជាង ៥.០០០ នាក់ បានចាញ់បោកការបោកប្រាស់តាមអ៊ីនធឺណេត។ ហើយនៅឆ្នាំនេះមានជនរងគ្រោះជាង២.០០០នាក់បានដាក់ពាក្យបណ្តឹងទៅប៉ូលិសខេត្តខនកែន។

លោក Pol Col Yotsawat Kaewsuebthanyanit បាននិយាយយ៉ាងដូច្នេះថា “ប៉ុស្តិ៍នគរបាលក្រុងកំពុងព្រមានប្រជាពលរដ្ឋដោយដាក់ផ្លាកសញ្ញានៅមុខអគារការិយាល័យ ហើយយើងក៏កំពុងផ្សព្វផ្សាយជាសាធារណៈនូវល្បិចកលដែលប្រើដោយជនបោកប្រាស់ ជារឿយៗជនទាំងនោះដោយបានបន្លំខ្លួន អះអាងថាជាមន្ត្រីអនុវត្តច្បាប់ ឬមកពី វិស័យឯកជន ដើម្បីគំរាមកំហែង និងបោកប្រាស់ប្រជាពលរដ្ឋ”។

ទន្ទឹមគ្នានេះ មន្ត្រីប៉ូលិសខាងលើបានជំរុញ្យប្រជាពលរដ្ឋបង្កើនការប្រុងប្រយ័ត្ន កុំប្រញាប់ផ្ទេរប្រាក់ទៅអ្នកដែលពួកគេមិនស្គាល់ និងកុំចុចលើតំណភ្ជាប់ទៅកម្មវិធីដែលសង្ស័យ ៕

ប្រែសម្រួលដោយ÷ ប៉ោ កុសល