សហគមន៍ទីក្រុងប៉េកាំងចាក់វ៉ាក់សាំងកូវីដដល់ប្រជាជនអាយុលើស ៦០ ឆ្នាំ

សហគមន៍មូលដ្ឋានមួយចំនួននៅទីក្រុងប៉េកាំងបានចាប់ផ្តើមចាក់វ៉ាក់សាំងការពារជំងឺកូវីដ ១៩ ដល់មនុស្សដែលមានអាយុលើសពី ៦០ ឆ្នាំ ។

នៅប្រទេសខ្លះរាប់បញ្ចូលទាំងសហរដ្ឋអាមេរិក និងអង់គ្លេស មនុស្សដែលមានអាយុលើសពី ៦៥ ឆ្នាំស្ថិតក្នុងចំណោមក្រុមអាទិភាពក្នុងការចាក់វ៉ាក់សាំងការពារជំងឺកូវីដ ១៩ ព្រោះថាមនុស្សចាស់មានហានិភ័យខ្ពស់ក្នុងការស្លាប់ និងចូលមន្ទីរពេទ្យ បន្ទាប់ពីឆ្លងវីរុសនេះបើប្រៀបធៀបនឹងមនុស្សវ័យក្មេង ។

យុទ្ធនាការចាក់វ៉ាក់សាំងរបស់ប្រទេសចិនដែលក្នុងនោះវ៉ាក់សាំងចំនួន ៤០.៥ លានដូសត្រូវបានចាក់គិតត្រឹមថ្ងៃទី ៩ ខែកុម្ភៈ ដោយមិនរាប់បញ្ចូលអ្នកដែលមានអាយុលើសពី ៥៩ ឆ្នាំ និងអ្នកដែលមានអាយុតិចជាង ១៨ ឆ្នាំ ។

យោងតាមសេចក្តីជូនដំណឹងរបស់បុគ្គលិកនៃសហគមន៍មួយចំនួននៅក្នុងស្រុក Dongcheng ភាគកណ្តាលទីក្រុងប៉េកាំងដែលត្រូវបានមើលឃើញដោយទីភ្នាក់ងារសារព័ត៌មានរ៉យទ័របានឲ្យដឹងថា ប្រជាជនដែលមានអាយុលើសពី ៦០ ឆ្នាំអាចទៅកន្លែងដែលបានកំណត់ដើម្បីចាក់ថ្នាំបង្ការរោគ ខណៈដែលមិនបង្ហាញពីវ៉ាក់សាំងរបស់ក្រុមហ៊ុនណាមួយក្នុងចំណោមវ៉ាក់សាំងរបស់ខ្លួនចំនួន ៤ ក្រុមហ៊ុន ។

ប្រទេសចិនមានវ៉ាក់សាំងអភិវឌ្ឍន៍ក្នុងស្រុកចំនួន ៤ ក្រុមហ៊ុនដែលត្រូវបានអនុម័តសម្រាប់ការចាក់ជាសាធារណៈទូទៅក្នុងនោះមានវ៉ាក់សាំងចំនួន ២ មកពីក្រុមហ៊ុនឱសថជាតិចិន (Sinopharm) ខណៈ ២ ទៀតមកពីក្រុមហ៊ុន Sinovac Biotech និងក្រុមហ៊ុន CanSino Biologics Inc (CanSinoBIO) ៕

ប្រែសម្រួលដោយ ៖ ជីវ័ន្ត

ប្រភព ៖ REUTERS

ចុចអាន ៖ ចិន បញ្ចេញទិន្នន័យប្រសិទ្ធភាពវ៉ាក់សាំងកូវីដធំៗពីររបស់ខ្លួន ជម្រះមន្ទិលសង្ស័យ

ចុចអាន ៖ ទោះកូវីដ តែចិនក្លាយជាដៃគូពាណិជ្ជកម្មធំបំផុតរបស់សហភាពអឺរ៉ុបក្នុងឆ្នាំ ២០២០