ព័ត៌មានអន្ដរជាតិ

ថៃ នៅតែជាប្រភពចម្បងនាំគ្រឿងញៀនចូលទឹកដីកូរ៉េខាងត្បូង

បានផុស

២៥ នាទី មុន

នៅ

ថ្ងៃសុក្រ ១៩ កក្កដា ២០២៤

ដោយ

នៅក្នុងឆ្នាំ២០២៤នេះ ប្រទេសថៃនៅតែបន្តនាំមុខគេក្នុងការនាំចេញគ្រឿងញៀនខុសច្បាប់ និងត្រូវរឹបអូសបានដោយអាជ្ញាធរកូរ៉េខាងត្បូង។ នេះបើយោងតាមការចុះផ្សាយរបស់សារព័ត៌មាន Bangkok Post នៅថ្ងៃទី១៩ ខែកក្កដា ឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទិន្នន័យពីទីភ្នាក់ងារគយកូរ៉េ (KCS) បានបង្ហាញថា ថៃមានចំណែកចំនួន ២៥% នៃគ្រឿងញៀនទម្ងន់ ២៩៨គីឡូក្រាម ដែលរឹបអូសនៅចំណុចច្រកចូលប្រទេសកូរ៉េខាងត្បូង ក្នុងរយៈពេល៦ខែដើមឆ្នាំ២០២៤។ បន្ទាប់មក សហរដ្ឋអាមេរិកជាប់ចំណាត់ថ្នាក់លេខ២ ដោយមានចំណែកចំនួន ២០%។

កាលពីឆ្នាំ២០២៣កន្លងទៅ ប្រទេសថៃ ក៏បានជាប់ឈ្មោះជាប្រភពចម្បងនៃការរត់ពន្ធគ្រឿងញៀនខុសច្បាប់ចូលក្នុងកូរ៉េខាងត្បូងផងដែរ។

ថ្វីដ្បិតមានការថយចុះចំនួន៩% នៃបរិមាណគ្រឿងញៀនដែលរឹបអូសបានបើធៀបនឹងរយៈពេលដូចគ្នាកាលពីឆ្នាំមុនក៏ដោយ ក៏អាជ្ញាធរកូរ៉េខាងត្បូងបានកត់សម្គាល់ពីទម្រង់ផ្លាស់ប្ដូរនៃការប៉ុនប៉ងជួញដូរទាំងនោះ។ មន្ត្រីគយកូរ៉េខាងត្បូង បានរៀបរាប់ថា “យើងបានឃើញការកើនឡើងនៃករណីរត់ពន្ធខ្នាតតូច ខណៈដែលការប៉ុនប៉ងទ្រង់ទ្រាយធំបានធ្លាក់ចុះ ដោយសារតែការរឹតបន្តឹងការគ្រប់គ្រងនៅតាមព្រំំដែន”។

ការរត់ពន្ធគ្រឿងញៀនចូលកូរ៉េខាងត្បូង មាន ២២%ធ្វើឡើងតាមផ្លូវអាកាស ៥៣%តាមរយៈប្រៃសណីយ៍អន្តរជាតិ និង ២៤%តាមរយៈក្រុមហ៊ុនដឹកជញ្ជូនទំនិញរហ័ស៕

ដោយ៖ ឈាង