អាមេរិក ចក្រ​ភព​អង់គ្លេស ឲ្យ​ប្រជាជន​ខ្លួន​ចាក​ចេញ​ពី​លីបង់ ខ្លាច​ផ្ទុះ​សង្គ្រាម​ធំ

សហរដ្ឋអាមេរិក និងចក្រភពអង់គ្លេស កាលពីថ្ងៃសៅរ៍បានចេញសារ​ព្រមានដល់​ប្រជាពលរដ្ឋ​របស់ពួកគេ​ឲ្យ​ចាកចេញពីប្រទេសលីបង់ជាបន្ទាន់ ចំពេលមានការភ័យខ្លាច​កចំពោះ​​ការ​ប្រឈម​មុខ​ដាក់​គ្នា​កាន់តែ​ខ្លាំង​នៅ​មជ្ឈិមបូព៌ា ក្រោយ​អ៊ីរ៉ង់​ប្រកាស​សងសឹក​​ទៅ​លើ​អ៊ីស្រាអែល។

បើ​យោង​តាម​ទីភ្នាក់ងារព័ត៌មាន Anadolu Ajansı ស្ថានទូតអាមេរិកនៅរដ្ឋធានី Beirut បាន​ប្រកាស​ថា ទោះ​ជើងហោះហើរជាច្រើនត្រូវបានលុបចោល ប៉ុន្តែ​ពលរដ្ឋ​អាមេរិក​នៅ​តែ​អាច​ចាក​ចេញ​ពី​លីបង់​តាម​ជម្រើស​
ជើង​យន្តហោះ​​ពាណិជ្ជកម្ម។ សេចក្ដី​ថ្លែងការណ៍​របស់​ទូត​អាមេរិក បាន​បន្ថែម​ថា៖ «យើងលើកទឹកចិត្តអ្នកដែលចង់ចាកចេញពីប្រទេសលីបង់ កក់សំបុត្រណាមួយដែលមានសម្រាប់ពួកគេ ទោះបីជាជើងហោះហើរនោះមិនចេញភ្លាមៗ ឬមិនស្រប​តាមជម្រើស​​ធ្វើ​ដំណើរ​ដំបូងរបស់ពួកគេក៏ដោយ។ ពលរដ្ឋអាមេរិកដែលខ្វះខាតថវិកាដើម្បីត្រឡប់ទៅសហរដ្ឋអាមេរិកវិញ អាចទាក់ទងស្ថានទូតសម្រាប់ជំនួយផ្នែកហិរញ្ញវត្ថុតាមរយៈប្រាក់កម្ចីធ្វើមាតុភូមិនិវត្តន៍»។ ចំណែក​អ្នក​ដែល​សម្រេច​ចិត្ត​បន្ត​នៅ​ក្នុង​លីបង់ ត្រូវ​​«​រៀបចំ​ផែនការ​សង្គ្រោះ​បន្ទាន់​សម្រាប់​ស្ថានភាព​គ្រាអាសន្ន ហើយ​ត្រូវ​ត្រៀម​ខ្លួន​សម្រាប់​​ជ្រក​នៅ​នឹង​កន្លែង​ក្នុង​រយៈពេល​យូរ​បន្ថែម​​ទៀត​»​។

ដោយ​ឡែក​អង់គ្លេស បានសង្កត់ធ្ងន់ថា៖ «ចក្រភពអង់គ្លេសនៅតែបន្តផ្តល់ដំបូន្មានប្រឆាំងនឹងការធ្វើដំណើរទាំងអស់ទៅកាន់ប្រទេសលីបង់ និងផ្តល់ដំបូន្មានដល់ជនជាតិអង់គ្លេសដែលស្ថិតនៅក្នុងប្រទេសនេះឲ្យ​ចាកចេញឥឡូវ ខណៈដែលជម្រើស​ហោះហើរ​ពាណិជ្ជកម្មនៅតែមាន»។ អង់គ្លេស​ បានបន្ថែមថា «អ្នកជំនាញកុងស៊ុលនឹងជួយរៀបចំផែនការយុទ្ធសាស្រ្ត និងឆ្លើយតបទៅនឹងការសាកសួរពីជនជាតិអង់គ្លេស ដើម្បីធ្វើឲ្យ​ប្រាកដថា ពួកគេទទួលបានជំនួយ និងដំបូន្មានដែលពួកគេត្រូវការ ហើយកងកម្លាំងព្រំដែនបានដាក់ពង្រាយមន្រ្តីដែលត្រៀមខ្លួនរួចជាស្រេចដើម្បីជួយដល់ប្រតិបត្តិការកុងស៊ុល»។

ចក្រភពអង់គ្លេស​បានបញ្ជូន​ក្រុម​មន្ត្រីទៅ​ខ្លួន​កាន់មជ្ឈិមបូព៌ា រួមទាំងប្រទេសលីបង់ ដើម្បីផ្តល់ការគាំទ្របន្ថែមដល់បុគ្គលិកស្ថានទូត ដែល​ជា​ «ផ្នែកនៃការរៀបចំផែនការរបស់រដ្ឋាភិបាលសម្រាប់សេណារីយ៉ូជម្លោះដែលអាចកើតមាន និងជាមួយនឹង​ការ​កើន​ឡើង​ភាពតានតឹង​នៅ​ក្នុងតំបន់»។

បន្ទាប់ពីមាន​កម្ដៅ​ជម្លោះ​ថ្មីៗនៅមជ្ឈិមបូព៌ា ក្រុមហ៊ុនអាកាសចរណ៍​មក​ពី​សហរដ្ឋអាមេរិក ហុល្លង់ ឥណ្ឌា ចក្រភពអង់គ្លេស អាល្លឺម៉ង់ ស្វីស អ៊ីតាលី ក្រិក បារាំង និងប៉ូឡូញ បានប្រកាសថា ពួកគេបានលុបចោលជើងហោះហើរមួយចំនួនទៅកាន់អ៊ីស្រាអែល និងលីបង់ ដោយសារហេតុផលសុវត្ថិភាព។

បច្ចុប្បន្នប្រទេសលីបង់កំពុងស្ថិតក្នុងស្ថានភាពសន្តិសុខ​តឹង​រឹង និងមានការប្រុងប្រយ័ត្នផ្នែកយោធា បន្ទាប់ពីការវាយប្រហារតាមអាកាសរបស់អ៊ីស្រាអែល លើតំបន់ជាយក្រុងភាគខាងត្បូងនៃរដ្ឋធានី Beirut កាលពីថ្ងៃអង្គារ ដែលបណ្តាលឲ្យមានការធ្វើឃាតមេដឹកនាំជាន់ខ្ពស់​ក្រុម​ហេសបូឡា លោក Fuad Shukr។

អ៊ីស្រាអែល បាននិយាយថា ការវាយប្រហារនេះគឺជាការឆ្លើយតបទៅនឹងការសម្លាប់ជនស៊ីវិលនៅក្នុងទីក្រុង Majdal Shams នៅតំបន់ Golan Heights កាលពីចុងសប្តាហ៍មុន ទោះបីជាក្រុម​ហេសបូឡា​បានបដិសេធការជាប់ពាក់ព័ន្ធក្នុងការវាយប្រហារក៏ដោយ។

កាលពីថ្ងៃព្រហស្បតិ៍ លោក Hassan Nasrallah អគ្គលេខាធិការនៃក្រុមហេសបូឡា បានសន្យាថានឹងឆ្លើយតប «ជាក់ស្ដែង និង​យ៉ាង​សន្ធឹក» ចំពោះការធ្វើឃាតលោក Shukr ដោយអះអាងថា ការប្រឈមមុខដាក់គ្នាជាមួយអ៊ីស្រាអែលបានចូលដល់ដំណាក់កាលថ្មីមួយ ផ្លាស់ប្តូរពីការ​គ្រាន់​តែ​គាំទ្រដល់តំបន់​ហ្គាហ្សា ទៅជាសមរភូមិធំបើកចំហ៕

ដោយ៖ ឈាង