ថៃ រក​ឃើញ​ករណី​ឆ្លង​ជំងឺ mpox សង្ស័យ​ជា​ប្រភេទ Clade 1 ដ៏​គ្រោះថ្នាក់

ប្រទេសថៃ បានរកឃើញករណីជំងឺ mpox នៅក្នុងខ្លួន​បុរសជនជាតិអឺរ៉ុបម្នាក់ ដែលបានមកពីទ្វីបអាហ្រ្វិកកាលពីសប្តាហ៍មុន ហើយកំពុងរង់ចាំលទ្ធផលតេស្តដើម្បីកំណត់ពី​ប្រភេទ​នៃ​​ជំងឺមួយនេះ។ នេះ​បើ​យោង​​​តាម​​ការ​ចុះ​ផ្សាយ​​របស់​ទីភ្នាក់ងារ​ព័ត៌មាន Reuters នៅ​ថ្ងៃ​ពុធ​ទី​២១​ខែ​សីហា។

លោក Thongchai Keeratihattayakorn អគ្គនាយកនៃនាយកដ្ឋានគ្រប់គ្រងជំងឺ​ឆ្លង បានប្រាប់ Reuters ថា អាជ្ញាធរ​ថៃ​កំពុង​​ព្យាបាល​​​អ្នក​ជំងឺ​​​នេះ ដោយ​ចាត់​ទុក​​ដូច​​ជា​​​ជំងឺ​ mpox ​ប្រភេទ Clade 1 ខណៈ​បុរស​ជនជាតិ​អឺរ៉ុប​អាយុ​៦៦​ឆ្នាំ​ម្នាក់​ដែល​មាន​ទីលំនៅ​ក្នុង​ប្រទេស​ថៃ​ បាន​វិល​ត្រឡប់​​មក​ដល់​វិញ​​នៅ​ថ្ងៃ​ទី​១៤​ខែ​សីហា ពី​ប្រទេស​អាហ្វ្រិក​មួយ​ដែល​ជំងឺ​នេះ​កំពុង​រាតត្បាត​ខ្លាំង​។​

លោក Thongchai បាននិយាយថា៖ «បន្ទាប់ពីគាត់មកដល់ពីជើងហោះហើរ វាមានពេលវេលាតិចតួចណាស់ ដែលគាត់ទាក់ទងជាមួយអ្នកដទៃ។ គាត់​មក​ដល់​ម៉ោង​ប្រហែល​៦​ល្ងាច ហើយ​ថ្ងៃ​បន្ទាប់​​គឺ​ថ្ងៃ​ទី​១៥​សីហា គាត់​បាន​ទៅ​ជួបវេជ្ជបណ្ឌិត​នៅ​មន្ទីរពេទ្យ»។ លោក Thongchai បាន​បន្ត​ថា បុរសនោះបានឆ្លងកាត់ការ​ធ្វើ​តេស្ត ដើម្បីកំណត់ថាតើករណីនេះគឺជា​ប្រភេទ Clade 1 ឬ​ក៏​យ៉ាង​ណា ដោយលទ្ធផល​ទំនង​ជា​អាច​ដឹង​ត្រឹម​ថ្ងៃ​សុក្រ​សប្ដាហ៍​នេះ។ លោក Thongchai ថា អាជ្ញាធរក៏កំពុងតាមដានមនុស្ស ៤៣​នាក់​ផ្សេង​ទៀត​នៅក្នុងប្រទេស ដែល​ធ្លាប់​ទាក់ទងជាមួយអ្នកជំងឺ។

នាយកដ្ឋានគ្រប់គ្រងជំងឺ​ឆ្លង​របស់​ថៃ មិនបានបញ្ចេញឈ្មោះប្រទេសអាហ្រ្វិកដែល​អ្នក​ជំងឺ​បានទៅ​នោះ​ទេ គ្រាន់​តែ​ដឹង​ត្រឹម​ថា បុរសនោះ​ធ្លាប់​បាន​ឆ្លងកាត់ប្រទេសនៅមជ្ឈិមបូព៌ា​ផង​ដែរ មុនពេលហោះហើរទៅកាន់ប្រទេសថៃ​វិញ។

សូម​បញ្ជាក់​ថា ប្រទេសថៃបានរកឃើញករណី mpox ប្រភេទ Clade 2 ចំនួន ៨០០​ករណីចាប់តាំងពីឆ្នាំ២០២២ ប៉ុន្តែរហូតមកដល់ពេលនេះមិន​ធ្លាប់​បានរកឃើញករណីនៃប្រភេទ Clade 1 ឬ Clade 1b ដ៏​កាច​សាហាវ​នោះ​​ឡើយ៕

ដោយ៖ ឈាង