ក្រោយបាក់​ទំនប់​វារីអគ្គិសនី១ថ្ងៃ អ្នកស្លាប់កើនដល់១៣៨នាក់​នៅស៊ូដង់​

ប្រទេសស៊ូដង់បានជួបប្រទះ​នូវការ​បាក់​ទំនប់​វារីអគ្គិសនី​​ក្រោយ​ភ្លៀងធ្លាក់ខ្លាំងជាបន្តបន្ទាប់​ចាប់តាំងពីខែ​​កក្កដា​ ដោយ​បង្ក​ឡើង​ជា​​ទឹកជំនន់​នៅភាគខាងជើង និងខាងកើតប្រទេសដែល​បណ្តាល​​ឱ្យ​មាន​ការបំផ្លិចបំផ្លាញយ៉ាងធ្ងន់ធ្ងរ និង​បណ្តាល​ឱ្យ​ចំនួនអ្នកស្លាប់បានកើនដល់១៣៨នាក់​​ក្នុងស្ថានភាព​​​ទឹកជំនន់​នៅ​តែ​ធ្ងន់ធ្ងរ​។ នេះបើយោងតាមការចេញផ្សាយរបស់ទីភ្នាក់ងារព័ត៌មាន Anadolu របស់ប្រទេសតួកគី​នៅ​ថ្ងៃទី២៧ខែសីហានេះ។

ទឹកជំនន់នេះបានបង្កឲ្យមានផលប៉ះពាល់ទៅដល់រដ្ឋចំនួន១០ ខណៈដែលចំនួនគ្រួសារដែលរងផលប៉ះពាល់បានកើនឡើងដល់ ៣១៦៦៦ គ្រួសារ និងមនុស្សដល់ ១២៩៦៥០នាក់ ហើយចំនួន​អ្នក​ស្លាប់​សរុប​ឡើង​ដល់​១៣៨​នាក់​។ ជាមួយគ្នានេះ ផ្ទះចំនួន១២៤២០ខ្នងបានខូចខាតទាំងស្រុង និង១១៤៧២ បានខូចខាតដោយផ្នែក ដោយសារតែភ្លៀងធ្លាក់ខ្លាំងនឹងទឹកជំនន់ហូរកាត់ ហើយការខូចខាតភាគច្រើនគឺនៅក្នុងរដ្ឋភាគខាងជើង និងតំបន់ក្បែរទន្លេNile។

លើសពីនេះភ្លៀងធ្លាក់ខ្លាំងកាលពីថ្ងៃសៅរ៍បានជន់លិចតំបន់ Arbaat ភាគខាងជើងទីក្រុង Port Sudan ដែលបណ្តាលឱ្យបាក់ទំនប់​វារីអគ្គិសនី Arbaat និងបានជន់លិចភូមិជាច្រើន។ Arbaat គឺជាអាងស្តុកទឹកនិងជាប្រភពទឹកដ៏សំខាន់សម្រាប់កំពង់ផែស៊ូដង់។ ក្នុងហេតុការណ៍បាក់ទំនប់់នេះ អ្នកស្ម័គ្រចិត្តក្នុងតំបន់ដែលជួយកិច្ចខិតខំប្រឹងប្រែងសង្គ្រោះបានប្រាប់ AFP ថា មនុស្ស ៦០នាក់បានស្លាប់ រួមទាំងស្ត្រី និងកុមារ ហើយការស្វែងរកកំពុងបន្តរកអ្នកបាត់ខ្លួនចំនួន២១០ នាក់ ខណៈទឹកជំនន់​បាន​បោកបក់បង្កផលប៉ះពាល់ខ្លាំងទៅលើ​ភូមិ​ចំនួន ២០ និង​៥០ ផ្សេងទៀត​រងផលប៉ះពាល់តិចតួច។

ស្របពេលដែលទឹកជំនន់កើតឡើងជារៀងរាល់ឆ្នាំនៅក្នុងប្រទេសស៊ូដង់ ផលប៉ះពាល់ត្រូវបានគេរំពឹងថានឹងកាន់តែអាក្រក់នៅឆ្នាំនេះ បន្ទាប់ពីមានការប្រយុទ្ធគ្នាជាង១៦ខែរវាងមេទ័ពគូប្រជែង ដែលបានរុញច្រានប្រជាជនរាប់លាននាក់ឱ្យផ្លាស់ទីលំនៅទៅក្នុងតំបន់ទឹកជំនន់។

លើសពីនេះ អាជ្ញាធរស៊ូដង់ និងអង្គការសហប្រជាជាតិបានរាយការណ៍ពីការកើនឡើងនៃករណីជំងឺអាសន្នរោគ ចំពេលមានភ្លៀងធ្លាក់ខ្លាំង ខណៈប្រទេសស៊ូដង់មានករណីជំងឺអាសន្នរោគដែលឆ្លងចេញពីទឹកដែលរងការបំពុលដោយសារទឹកជំនន់ ដែលយ៉ាងហោចណាស់មាន ១១៣២៧ ករណីដែលក្នុងនោះមាន ៣១៦ នាក់បានស្លាប់ចាប់តាំងពីខែមិថុនាឆ្នាំ២០២៣។

គួរបញ្ជាក់ថាសង្រ្គាមបានផ្ទុះឡើងក្នុងប្រទេសចាប់តាំងពីខែមេសា ឆ្នាំ ២០២៣ រវាងកងទ័ពស៊ូដង់ ក្រោមការដឹកនាំរបស់ប្រទេសលោក Abdel Fattah al-Burhan និងកងកម្លាំងប្រដាប់អាវុធ Rapid Support Force ដែលត្រូវបានបញ្ជាដោយអតីតអនុប្រធានាធិបតីរបស់លោក Burhan គឺលោក Mohamed Hamdan Daglo ដែលភាគីទាំងសងខាងត្រូវបានចោទប្រកាន់ពីបទឧក្រិដ្ឋកម្មសង្គ្រាម រួមទាំងការកំណត់គោលដៅជនលើស៊ីវិល និងរារាំងជំនួយមនុស្សធម៌៕

អត្ថបទ៖ ប៊ុន សុភាព