ទឹកទន្លេមេគង្គនៅ ហ្លួងព្រះបាង ឡើងដល់កម្រិតគ្រោះថ្នាក់ធ្ងន់ធ្ងរ ខណៈអ្នកក្រុងវៀងចន្ទន៍ ត្រៀមខ្លួនជម្លៀស 

យោងតាមសេចក្តីជូនដំណឹងរបស់នាយកដ្ឋានឧតុនិយមនិងជលសាស្ត្រ នៃក្រសួងធនធានធម្មជាតិនិងបរិស្ថានឡាវ, កម្រិតទឹកទន្លេមេគង្គ ក្នុងខេត្តហ្លួងព្រះបាង បានហក់ឡើងខ្ពស់ដល់កម្រិតគ្រោះថ្នាក់ធ្ងន់ធ្ងរហើយ ខណៈនៅ វៀងចន្ទន៍ កម្ពស់ទឹកក៏ជិតឈានដល់កម្រិតគ្រោះថ្នាក់ធ្ងន់ធ្ងរដែរ ដូច្នេះប្រជាពលរដ្ឋត្រូវប្រុងប្រយ័ត្ន និងត្រៀមខ្លួនជម្លៀសជានិច្ច។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីថ្ងៃព្រហស្បតិ៍ទី១២ខែកញ្ញា ស្ថានីយឧតុនិយមនិងជលសាស្ត្រខេត្តហ្លួងព្រះបាង បានវាស់កម្ពស់ទឹកទន្លេមេគង្គឈានដល់កម្រិត ១៩ម៉ែត្រ ពោលគឺលើសកម្រិតប្រកាសអាសន្នដែលកំណត់ត្រឹម ១៧.៥ម៉ែត្រ និងកម្រិតគ្រោះថ្នាក់ ១៨.៥ម៉ែត្រទៅទៀត។

ដោយឡែក នៅថ្ងៃទី១៣ខែកញ្ញា កម្រិតនៃទន្លេមេគង្គនៅហ្លួងព្រះបាង បានឡើងដល់២០.៥ម៉ែត្រ ហើយ​វា​អាច​នឹង​កើនឡើង​បន្ថែមទៀត​រហូតដល់ទៅ ២១.៥០ម៉ែត្រឯណោះ​នៅ​ថ្ងៃទី១៤ខែកញ្ញា​។

ចំណែកស្ថានីយ​ក្រុង​វៀងចន្ទន៍​ ​បាន​វាស់​កម្ពស់​ទឹក​ទន្លេ​មេគង្គ​ឈានដល់១១.៣៤ម៉ែត្រ​កាល​ពី​ថ្ងៃ​ព្រហស្បតិ៍ ខណៈ​កម្រិត​ប្រកាស​អាសន្ន​ទឹកជំនន់​គឺ ១១.៥០ម៉ែត្រ ប៉ុន្តែគេគិតថា មិនយូរទេ កម្ពស់ទឹកនឹងឡើងដល់កម្រិតគ្រោះថ្នាក់ធ្ងន់ធ្ងរដូចគ្នា។

ស្របពេលជាមួយគ្នានោះ គណៈកម្មាធិការគ្រប់គ្រងគ្រោះមហន្តរាយកណ្តាល បានចេញការព្រមានថា ប្រជាពលរដ្ឋដែលរស់នៅក្នុងទីក្រុងវៀងចន្ទន៍និងហ្លួងព្រះបាង ក៏ដូចជាប្រជាជនដែលរស់នៅក្បែរទន្លេ Xechamphone ក្នុងខេត្ត Savannakhet ត្រូវត្រៀមលក្ខណៈឲ្យរួចរាល់ដើម្បីទប់ទល់នឹងគ្រោះមហន្តរាយ ក៏ដូចជាត្រៀមជម្លៀសខ្លួននិងដឹកជញ្ជូនសម្ភារនានា ទៅកាន់ទីទួលសុវត្ថិភាព។

លើសពីនេះ អាជ្ញាធរខេត្តក៏បានចាត់តាំងក្រុមការងារ ដើម្បីតាមដានកម្រិតទន្លេមេគង្គឲ្យបានដិតដល់ ហើយរៀបចំយានយន្ត ឧបករណ៍ និងគ្រឿងជំនួយនានា ដើម្បីឆ្លើយតបនឹងគ្រោះមហន្តរាយផងដែរ៕

អត្ថបទ៖ សុខ សុវណ្ណ

ចុចអាន៖ ទីក្រុង វៀងចន្ទន៍ ប្រកាសអាសន្នគ្រោះទឹកជំនន់ ខណៈទឹកទន្លេមេគង្គ ហក់ឡើងខ្ពស់