ឡាវ​ប្រឈម​​ខ្យល់​ពុល​​ឈានដល់កម្រិតប្រកាសអាសន្ន​

នាយករដ្ឋមន្ត្រីឡាវ​បានអំពាវនាវឱ្យមានការគ្រប់គ្រងកាន់តែតឹងរ៉ឹងលើការបំពុលខ្យល់ រួមទាំងផ្សែងអ័ព្ទ និងភ្លើងឆេះព្រៃ បន្ទាប់ពីផ្នែកជាច្រើននៃប្រទេសបានកត់ត្រាគុណភាពខ្យល់មិនល្អក្នុងរយៈពេលប៉ុន្មានថ្ងៃថ្មីៗនេះ។ នេះបើយោងតាមការចេញផ្សាយរបស់ទីភ្នាក់ងារព័ត៌មាន​Xinhua នៅថ្ងៃទី១៧ខែកុម្ភៈនេះ។

ប្រជាជនក្នុងប្រទេសឡាវមានការព្រួយបារម្ភកាន់តែខ្លាំងឡើង ខណៈដែលពួកគេត្រូវបានបង្ខំឱ្យរស់នៅប្រចាំថ្ងៃជាមួយនឹងកម្រិតខ្យល់​ពុល​ PM 2.5 ដែលត្រូវ​បាន​កត់​ត្រា​​ថា «មិនល្អ​»​​ ព្រោះ​​​​​ភាគល្អិតល្អនៅក្នុងខ្យល់ ដែលនាំឱ្យមានគ្រោះថ្នាក់ដល់សុខភាព។

របាយការណ៍ពីក្រសួងធនធានធម្មជាតិ និងបរិស្ថានឡាវ បានឱ្យដឹងថា គុណភាពខ្យល់ក្នុងខេត្ត​ Salavan បាន​ឈាន​ដល់កម្រិតប្រកាសអាសន្ន ដោយកំហាប់ PM 2.5 ឡើងដល់១៤៤មីក្រូក្រាមក្នុងមួយម៉ែត្រគូប ដែលលើសពីកម្រិតសុវត្ថិភាព៥០មីក្រូក្រាមក្នុងមួយម៉ែត្រគូប។ ចំណែកខេត្ត​ Phongsaly, Xieng Khuang និង​រដ្ឋធានី​វៀងចន្ទន៍​ប្រទេស​ឡាវ​​វិញ​​ ឃើញ​មានPM 2.5 លើសពី ១០១ មីក្រូក្រាម​ក្នុង​មួយ​ម៉ែត្រគូប។

PM 2.5 ដែលជាភាគល្អិតល្អិតល្អន់ដែលបណ្តាលឱ្យមានផ្សែងអ័ព្ទ គឺជាសារធាតុបំពុលខ្យល់ដែលមានភាគល្អិតតូចៗដែលមានអង្កត់ផ្ចិតតិចជាង ២.៥ មីក្រូម៉ែត្រ។ ខ្យល់ពុលនេះបានបង្កផលប៉ះពាល់ដល់សម្មភាពរស់នៅរបស់ប្រជាជនយ៉ាងខ្លាំងដោយប្រជាជនជាច្រើនបានពាក់ម៉ាសនិងជៀសការចេញក្រៅ។

ក្នុង​កិច្ចប្រជុំប្រចាំឆ្នាំរបស់ក្រសួងធនធានធម្មជាតិ និងបរិស្ថានឡាវ កាលពីចុងខែមករា នាយករដ្ឋមន្ត្រីឡាវ លោក Sonexay Siphandone បានអំពាវនាវឱ្យមានការត្រួតពិនិត្យកាន់តែតឹងរ៉ឹងលើសកម្មភាព​បំពុលខ្យល់ រួមទាំងផ្សែងអ័ព្ទ និងភ្លើងឆេះព្រៃ បន្ទាប់ពីផ្នែកជាច្រើននៃប្រទេសបានកត់ត្រាគុណភាពខ្យល់មិនល្អក្នុងរយៈពេលប៉ុន្មានថ្ងៃថ្មីៗនេះ។

លោក​បាន​ជំរុញ​គ្រប់​វិស័យ​ឱ្យ​យក​ចិត្ត​ទុក​ដាក់​លើ​ការ​ទទួល​ខុស​ត្រូវ​បរិស្ថាន​របស់​ខ្លួន​ដោយ​និយាយ​ថា​ត្រូវ​មាន​សកម្មភាព​ខ្លាំង​ជាង​នេះ​ដើម្បី​ការពារ​ធនធាន​ធម្មជាតិ និង​ធានា​ការ​អភិវឌ្ឍ​ប្រកប​ដោយ​ចីរភាព។

នៅឆ្នាំ២០២៥ រដ្ឋាភិបាលឡាវក្នុងភាពជាដៃគូជាមួយអង្គការអភិវឌ្ឍន៍​នានាបានដំឡើងឧបករណ៍ចាប់សញ្ញាគុណភាពខ្យល់ដែលដើរដោយថាមពល AI នៅក្នុង​ទីតាំង​សាលារៀនចំនួន១៥០​កន្លែង​​​​នៅទូទាំងប្រទេសដើម្បីតាមដានការបំពុលខ្យល់ដែលបង្កគ្រោះថ្នាក់។

គំនិតផ្តួចផ្តើមនេះនឹងជួយអាជ្ញាធរមូលដ្ឋានក្នុងការកំណត់កម្រិតខ្យល់ដែលមិនមានសុវត្ថិភាព និងអនុវត្តវិធានការបង្ការ ដើម្បី​ធានាបាននូវបរិយាកាសសិក្សាដែលមានសុវត្ថិភាពជាងមុន។ គោលដៅគឺដើម្បីកាត់បន្ថយហានិភ័យសុខភាព លើកកម្ពស់ខ្យល់អាកាសបរិសុទ្ធ និងការពារសុខភាពកុមារនៅទូទាំងប្រទេសឡាវ៕

អត្ថបទ៖ ប៊ុន សុភាព