សួនសត្វ​នៅ​ថៃ​​រំពឹង​រក​ចំណូល​​​​​​​៦លាន​ដុល្លារ​​ពី​ភ្ញៀវ​ជាង​​១​លាន​នាក់ព្រោះ​កូនដំរីទឹក Moo Deng

សួនសត្វ Khao Kheow របស់ថៃបានទាក់ទាញការចាប់អារម្មណ៍ជាសាកលជាមួយនឹងការផ្សាយផ្ទាល់ ( Live Stream) របស់ Moo Deng ដែលជាកូនដំរីទឹក Pygmy មានទឹកមុខគួរឲ្យខ្នាញ់ទាក់ទាញអ្នកគាំទ្រជុំវិញពិភពលោកនិងរកចំណូលបានជាង១២លានបាត។ នេះបើយោងតាមការចេញផ្សាយរបស់ Thaiger នៅថ្ងៃទី២៣ខែកញ្ញានេះ។

លោក Narongwit Chodchoy នាយកសួនសត្វបានឲ្យដឹងថា ការចាប់អារម្មណ៍របស់សាធារណជនចំពោះកូនដំរីទឹកអាយុពីរខែបានធ្វើឱ្យចំនួនអ្នកទស្សនាកើនឡើង ៥០ភាគរយ។ មនុស្សសរុបចំនួន៨១៧៨៦​នាក់បានទៅទស្សនាសួនសត្វក្នុងរយៈពេល១៩ថ្ងៃដំបូងនៃខែកញ្ញា ដោយរកចំណូលបាន ១២,៩៧ លានបាត (៣៩៣៩០០ដុល្លារអាមេរិក) ពីការលក់សំបុត្រ។

សួនសត្វរំពឹងថា នឹងមានអ្នកទស្សនាលើសពីមួយលាននាក់ និងទទួលបានប្រាក់ចំណូលសរុបជាង ២០០លានបាត (៦ លានដុល្លារអាមេរិក) ក្នុងឆ្នាំនេះ។ លោក Narongwit បានបន្ថែមថា«ការស្រលាញ់ចូលចិត្ត Moo Deng នឹងទាក់ទាញភ្ញៀវបរទេសកាន់តែច្រើន ជាពិសេសមកពីប្រទេសអាស៊ីផ្សេងទៀតដូចជា ជប៉ុន ចិន និងកូរ៉េខាងត្បូង»។

ថ្មីៗនេះ សួនសត្វបានបើកការផ្សាយបន្តផ្ទាល់រយៈពេល ២៤ម៉ោងនៅលើ zoodiolive.com ដោយបង្ហាញអំពី Moo Deng និងសត្វដទៃទៀត ដែលទាក់ទាញអ្នកទស្សនាប្រហែល ៤៤០០០ នាក់កាលពីយប់ថ្ងៃទី ២០ខែកញ្ញា។

ចំពោះអ្នកទៅទស្សនាផ្ទាល់ចាប់អារម្មណ៍ជាពិសេសក្នុងការទស្សនា Moo Deng ពីម៉ោង៧ៈ៤៥ ព្រឹកដល់ម៉ោង ៩ព្រឹកនៅពេល​ដែលកូនដំរីទឹកញីនេះសកម្មបំផុត និងអំឡុងពេលបំបៅពេលរសៀលរបស់ម្តាយវា Jona។​ ក្នុងរយៈពេលនេះ អ្នកទស្សនាត្រូវតែតម្រង់ជួរ ហើយត្រូវបានអនុញ្ញាតមានពេលតែ ៥នាទីដើម្បីទស្សនា Moo Deng។ ចំពោះអ្នក​ដែល​ចង់​ទស្សនាបន្ថែម​ទៀត ត្រូវ​តម្រង់​ជួរ​ម្ដង​ទៀត។​

លើសពីនេះ សួនសត្វបានទាក់ទាញប្រជាប្រិយភាពរបស់ Moo Deng ដោយលក់អាវយឺតចំនួន ៧០០ឈុតដំបូងដែលមានរូបកូនដំរីទឹកនេះមានតម្លៃ ៣២៩ បាត (១០ដុល្លារអាមេរិក) ក្នុងមួយអាវថែមទៀត៕

អត្ថបទ៖ ប៊ុន សុភាព