ព័ត៌មានអន្ដរជាតិ

អ្នករស់រានមានជីវិតពីគ្រាប់បែកបរមាណូរបស់ជប៉ុន ឈ្នះពានរង្វាន់ណូបែលសន្តិភាព

បានផុស

២ ខែ មុន

នៅ

ថ្ងៃសៅរ៍ ១២ តុលា ២០២៤

ដោយ

Chheang

លោក Nihon Hidankyo ដែលជាមនុស្សម្នាក់ក្នុងក្រុមអ្នករស់រានមានជីវិតពីគ្រាប់បែកបរមាណូរបស់ជប៉ុន បានឈ្នះពានរង្វាន់ណូបែលសន្តិភាពឆ្នាំ២០២៤ និងប្រាក់រង្វាន់ចំនួន១លានដុល្លារ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុម Hibakusha ជាក្រុមដែលប្រមូលផ្ដុំទៅដោយអ្នករស់រានមានជីវិតពីការទម្លាក់គ្រាប់បែកនៅហ៊ីរ៉ូស៊ីម៉ា និងណាហ្គាសាគី ឆ្នាំ១៩៤៥ ហើយត្រូវបានទទួលស្គាល់ដោយគណៈកម្មាធិការណូបែលន័រវេស សម្រាប់កិច្ចខិតខំប្រឹងប្រែងដើម្បីលុបបំបាត់កម្មវិធីអាវុធនុយក្លេអ៊ែរពិភពលោក។

បង្កើតឡើងក្នុងឆ្នាំ១៩៥៦ ក្រុមរបស់លោក Hidankyo បានបញ្ជូនអ្នករស់រានមានជីវិតពីការទម្លាក់គ្រាប់បែកបរមាណូទៅជុំវិញពិភពលោក ដើម្បីចែករំលែកសក្ខីភាពរបស់ពួកគេអំពី «ការខូចខាតដ៏សាហាវ» និងការរងទុក្ខ ដែលបណ្តាលមកពីការប្រើប្រាស់អាវុធនុយក្លេអ៊ែរ។

ប្រធានគណៈកម្មាធិការណូបែល លោក Joergen Watne Frydnes បាននិយាយថា ក្រុមនេះបាន «ចូលរួមចំណែកយ៉ាងច្រើនក្នុងការបង្កើតបម្រាមនុយក្លេអ៊ែរ»។

លោក Frydnes បានព្រមានថា «បម្រាមនុយក្លេអ៊ែរ» គឺស្ថិតនៅក្រោមសម្ពាធ ហើយបានកោតសរសើរក្រុម Hibakusha សម្រាប់ការយកសក្ខីកម្មរបស់ខ្លួន ដើម្បីធានាបានថាអាវុធនុយក្លេអ៊ែរមិនត្រូវប្រើប្រាស់ទៀតឡើយ។

នៅថ្ងៃទី៦ខែសីហាឆ្នាំ១៩៤៥ យន្តហោះអាមេរិកបានទម្លាក់គ្រាប់បែកបរមាណូពីលើទីក្រុងហ៊ីរ៉ូស៊ីម៉ា ដោយបានសម្លាប់មនុស្សប្រហែល ១៤ម៉ឺននាក់។ ៣ថ្ងៃក្រោយមក អាវុធនុយក្លេអ៊ែរទី២ត្រូវបានទម្លាក់លើទីក្រុងណាហ្គាសាគី។ ការចុះចាញ់របស់ប្រទេសជប៉ុនត្រូវបានប្រកាសឡើងដោយអធិរាជ Hirohito ភ្លាមៗនោះ និងបានបិទបញ្ចប់សង្គ្រាមលោកលើកទី២៕

ដោយ៖ ឈាង