ក្រោយ​​គ្រោះ​រាំង​ស្ងួត​ដ៏អាក្រក់បំផុតមិនធ្លាប់មាន ប្រេស៊ី​ល​ជួបព្យុះ​ផង​ ជន់លិច​ផង និង​ភ្លៀង​ដ៏សែន​ខ្លាំង​

យ៉ាងហោចណាស់មនុស្ស៨នាក់បានស្លាប់ និងរាប់ពាន់នាក់ទៀតកំពុងជាប់គាំងដោយសារ​គ្មានថាមពល បន្ទាប់ពីព្យុះដ៏ខ្លាំង​ក្លា​ បានបោកបក់​បង្ក​មហន្តរាយ​​ស្ទើរពាសពេញប្រទេសប្រេស៊ីល​នៅតំបន់​អាមេរិក​ខាង​ត្បូង​។ នេះបើយោងតាមការចេញផ្សាយនៅថ្ងៃទី១៤ខែតុលានេះ។

វិទ្យាស្ថានឧតុនិយមជាតិនៃ​ប្រទេស​ប្រេស៊ីល បានឱ្យដឹងថា តំបន់ភាគកណ្តាលនិងភាគអាគ្នេយ៍នៃប្រទេសត្រូវបានវាយប្រហារ​ដោយ​ខ្យល់ព្យុះបក់ក្នុងល្បឿនរហូតដល់​១០០​គីឡូម៉ែត្រក្នុងមួយម៉ោង និងភ្លៀងធ្លាក់រហូតដល់​១០សង់ទីម៉ែត្រ ។

ក្នុង​ចំណោម​មនុស្ស៨នាក់មាន មនុស្ស​៧នាក់ត្រូវបានស្លាប់នៅក្នុងទីក្រុង Sao Paulo ដែលជារដ្ឋដែលមានប្រជាជនច្រើនបំផុតរបស់ប្រទេសប្រេស៊ីល ការស្លាប់ភាគច្រើនដោយសារតែការដួលរលំដើមឈើ និងហេដ្ឋារចនាសម្ព័ន្ធដោយ​សារ​ខ្យល់ខ្លាំង និងភ្លៀងធ្លាក់ខ្លាំង។

អ្នកស្រុកនៅរដ្ឋភាគអាគ្នេយ៍នៃ​ប្រទេស​ បានពិពណ៌នាថា ភ្លៀងធ្លាក់ដែលមិននឹកស្មាន​ ​រយៈពេលខ្លីៗ ប៉ុន្តែ​មាន​ឥទ្ធិពល​ខ្លាំង។ ការដាច់ភ្លើងបានលេបត្របាក់ផ្នែកដ៍ធំនៃរដ្ឋ Sao Paulo ចាប់តាំងពីថ្ងៃសុក្រមក ជាមួយនឹងបញ្ហាការផ្គត់ផ្គង់ទឹកក៏ត្រូវបានរាយការណ៍ផងដែរ។ ជាមួយគ្នានេះក្រុមហ៊ុនថាមពល Enel បាននិយាយថា ផ្ទះ និងអាជីវកម្មជាង ១.៣ លាន​នៅតែ​គ្មាន​អគ្គិសនីប្រើប្រាស់។

ទោះបីជាយ៉ាងណាម​នុស្សជាច្រើននៅប្រេស៊ីលបានស្វាគមន៍ព្យុះនេះថា ជាការសង្គ្រោះដែលរង់ចាំជាយូរមកហើយបន្ទាប់ពីជា១៦៥ ថ្ងៃគ្មានភ្លៀងធ្លាក់សោះ។ ក្នុងរយៈពេលប៉ុន្មានខែថ្មីៗនេះ ប្រទេសប្រេស៊ីលបានជួបប្រទះគ្រោះរាំងស្ងួតដ៏អាក្រក់បំផុតរបស់ខ្លួនចាប់តាំងពីកំណត់ត្រាបានចាប់ផ្តើម ដែលអ្នកជំនាញបានផ្សារភ្ជាប់ទៅនឹងការប្រែប្រួលអាកាសធាតុ និងបាតុភូតអាកាសធាតុ El Nino។

អាកាសធាតុស្ងួតបាន​បង្ក​ឱ្យ​មាន​ភ្លើង​ឆេះ​ព្រៃនៅទូទាំងប្រទេស ដែលបានបំផ្លិចបំផ្លាញផ្នែកធំនៃព្រៃអាម៉ាហ្សូន និងតំបន់ដីសើម Pantanal ក៏ដូចជាផ្សែងហុយចេញពីទីក្រុងធំៗ។ យោងតាមទិន្នន័យរបស់រដ្ឋាភិបាលបានឱ្យដឹងថា ចំនួនភ្លើង​ឆេះ​ព្រៃ​នៅ​អាម៉ាហ្សូន​កាលពីខែកក្កដាបានកើនឡើងដល់កម្រិតខ្ពស់រយៈពេលពីរទសវត្សរ៍មិនធ្លាប់មាន៕

អត្ថបទ៖ ប៊ុន សុភាព