ព័ត៌មានអន្ដរជាតិ

ថៃ រកឃើញករណីដំបូងនៃជំងឺស៊ីសួត ក្អកធ្លាក់ឈាម ដោយសារជក់វែប

បានផុស

២ years មុន

នៅ

ថ្ងៃព្រហស្បតិ៍ ២១ វិច្ឆិកា ២០២៤

ដោយ

Chheang

យោងតាមនាយកដ្ឋានគ្រប់គ្រងជំងឺ (DDC) នៃក្រសួងសុខាភិបាលសាធារណៈថៃ បុរសអាយុ៣២ឆ្នាំម្នាក់នៅខេត្ត Buri Ram ត្រូវបានគេធ្វើរោគវិនិច្ឆ័យថាមានជំងឺ EVALI ដែលជាប្រភេទជំងឺសួត បណ្ដាលមកពីការជក់បារីអេឡិចត្រូនិច ឬក៏វែប (Vape)។ នេះបើតាមការចុះផ្សាយរបស់សារព័ត៌មាន Bangkok Post កាលពីថ្ងៃទី២០ខែវិច្ឆិកាឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Chayanan Sittibusaya នាយកផ្នែកគ្រប់គ្រងផលិតផលថ្នាំជក់នៃក្រសួងសុខាភិបាល បាននិយាយថា អ្នកជំងឺត្រូវបានបញ្ជូនទៅមន្ទីរពេទ្យ Buri Ram ហើយកំពុងមានបញ្ហាក្អកឈាម និងស្ថានភាពរបស់គាត់បានវិវត្តទៅជាជំងឺរលាកសួតស្រួចស្រាវ និងធ្ងន់ធ្ងរ។

លោកបន្តថា៖ «ជាធម្មតា យើងមិនជួបប្រទះនឹងជំងឺរលាកសួតធ្ងន់ធ្ងរ និងរោគសញ្ញាយ៉ាប់យ៉ឺនខ្លាំងឆាប់រហ័សក្នុងរយៈពេលត្រឹមពី ២៤ ទៅ ៣៦ម៉ោងបែបនេះទេ។ ក្នុងករណីនេះ គាត់ត្រូវដាក់ម៉ាស៊ីនបំពងខ្យល់។ បន្ទាប់ពីអ្នកជំងឺអាចដកបំពង់ដកដង្ហើមចេញ គាត់បានប្រាប់គ្រូពេទ្យថា គាត់បានជក់បារីអេឡិចត្រូនិចប្រហែល ៤០០ហឺតក្នុងមួយថ្ងៃ ជារៀងរាល់ថ្ងៃ»។

លោក Chayanan បានបន្ថែមថា វាមិនច្បាស់ទេថា បុរសនោះមានទម្លាប់ជក់បារីអេឡិចត្រូនិចយូរប៉ុណ្ណា តែអ្នកជំងឺរូបនោះក៏មានជំងឺប្រចាំកាយដែរ ដូចជា ជំងឺទឹកនោមផ្អែម និងលើសសម្ពាធឈាម។

មន្ទីរពេទ្យ បាននាំយកករណីនេះទៅកាន់ការិយាល័យសុខភាពសាធារណៈខេត្ត Buri Ram ដើម្បីស៊ើបអង្កេតជំងឺបន្ថែមទៀត។

បារីអេឡិកត្រូនិច ត្រូវបានហាមឃាត់នៅក្នុងប្រទេសថៃ ប៉ុន្តែមនុស្សម្នាមួយចំនួននៅតែអាចរកបានទិញប្រភេទបារីទាំងនោះបានយ៉ាងងាយស្រួលទាំងតាមប្រព័ន្ធអនឡាញ និងទីកន្លែងមួយចំនួន៕

ដោយ៖ ឈាង