​ម៉ាឡេស៊ីនិង​ថៃ​ត្រៀម​ខ្លួន​​​បង្ការ​​ភ្លៀង​ធ្លាក់​​បន្ថែម​ទៀត ក្រោយ​មនុស្ស​ជាង​៣០​នាក់ស្លាប់​

អាជ្ញាធរក្នុងប្រទេសថៃ និងម៉ាឡេស៊ី​មានការប្រុងប្រយ័ត្នខ្ពស់ចំពោះភ្លៀងធ្លាក់ខ្លាំងបន្ថែមទៀត បន្ទាប់ពីភ្លៀងមូសុងជាច្រើន​ថ្ងៃបានបង្កជាទឹកជំនន់ដ៏បំផ្លិចបំផ្លាញ ដែលបានសម្លាប់មនុស្សរាប់សិបនាក់ និងរាប់ម៉ឺននាក់បានផ្លាស់ទីលំនៅ។ នេះបើយោងតាមការចេញផ្សាយរបស់សារព័ត៌មាន​ Al Jazeera នៅថ្ងៃទី០៤ខែធ្នូ។

មន្ត្រីនៃប្រទេសទាំងពីរបាននិយាយកាលពីថ្ងៃអង្គារថា ពួកគេកំពុងរៀបចំជម្រក និងរៀបចំផែនការជម្លៀសខ្លួន ដើម្បីឆ្លើយតបទៅនឹងការព្យាករណ៍ដែលថាមានភ្លៀងធ្លាក់បន្ថែមទៀតនៅថ្ងៃខាងមុខ។

នៅភាគខាងត្បូងប្រទេសថៃ​មនុស្សយ៉ាងតិច២៥នាក់បានស្លាប់នៅក្នុងទឹកជំនន់ និងជាង​៣០ម៉ឺន​គ្រួសារបានរងផលប៉ះពាល់ក្នុងសប្តាហ៍កន្លងមកនេះ។ នេះបើយោងតាមនាយកដ្ឋានបង្ការ និងកាត់បន្ថយគ្រោះមហន្តរាយរបស់ប្រទេសនេះ។ គិតត្រឹមថ្ងៃច័ន្ទនេះ ក្រសួងសុខាភិបាលសាធារណៈរបស់ប្រទេសនេះបាននិយាយថា អ្នកជម្លៀសចំនួន ៣៤ ៣៥៤នាក់ នៅតែស្ថិតក្នុងជម្រករបស់រដ្ឋាភិបាលចំនួន៤៩១កន្លែង។

ក្នុងចំណោមខេត្តដែលរងគ្រោះខ្លាំងជាងគេរួមមាន Pattani, Narathiwat, Songkhla និង Yala ដែលរដ្ឋាភិបាល​បានដាក់ពង្រាយក្រុមជួយសង្គ្រោះ និងបានកំណត់ថវិកាចំនួន​៥០លានបាត ដែលស្មើនឹង១,​៤៥ លានដុល្លារ ក្នុងការសង្គ្រោះក្នុងមួយខេត្ត។ គណៈរដ្ឋមន្ត្រីថៃក៏បានចុះហត្ថលេខាលើការបង់ប្រាក់ចំនួន៩០០០ បាត ២៦០ ដុល្លារ ក្នុងមួយគ្រួសារដែលរងផលប៉ះពាល់ផងដែរ។

ទោះបីជាកម្រិតទឹកបានស្រកក្នុងខេត្តមួយចំនួនក៏ដោយ ក៏ប្រទេសថៃរំពឹងថានឹងមានភ្លៀងធ្លាក់ខ្លាំងបន្ថែមទៀតរហូតដល់ថ្ងៃព្រហស្បតិ៍ ដែលធ្វើឲ្យតំបន់នេះប្រឈមនឹងគ្រោះទឹកជំនន់ភ្លាមៗ។អាជ្ញាធរ​បាន​រៀបចំ​កន្លែង​ស្នាក់នៅ ម៉ាស៊ីន​បូមទឹក រថយន្ត​ជម្លៀស និង​ទូក ហើយ​ដាក់​ក្រុម​សង្គ្រោះ​ឱ្យ​រង់ចាំ​ដើម្បី​ត្រៀម​ទប់ទល់​នឹង​ជំនន់​ទឹកភ្លៀង​បន្ថែមទៀត​។

ចំណែកនៅប្រទេសម៉ាឡេស៊ី ភ្លៀងធ្លាក់យ៉ាងគំហុករយៈពេលប្រាំថ្ងៃកាលពីសប្តាហ៍មុនបានវាយប្រហារឆ្នេរសមុទ្រភាគខាងកើតដោយបានសម្លាប់មនុស្ស៦ នាក់ និងបំផ្លាញផ្ទះសម្បែង និងផ្លូវថ្នល់ក្នុងរដ្ឋ Kelantan ភាគឦសាន និងរដ្ឋ Terengganu ដែលនៅជិតខាង។

យោងតាមមជ្ឈមណ្ឌលគ្រប់គ្រងគ្រោះមហន្តរាយជាតិបានឱ្យដឹងថា មនុស្សប្រហែល៩១០០០ នាក់ស្នាក់នៅខាងក្រៅផ្ទះរបស់ពួកគេ ហើយការខូចខាតត្រូវបានគេប៉ាន់ស្មានថាមានតម្លៃ២២៤ លានដុល្លារ។ ទឹកជំនន់នេះក៏បានប៉ះពាល់ដល់វិស័យទេសចរណ៍ ដោយមន្ត្រីម៉ាឡេស៊ីបានជំរុញឱ្យពលរដ្ឋពន្យារផែនការធ្វើដំណើរទៅកាន់ភាគខាងត្បូងប្រទេសថៃ ផងដែរ។

ខណៈពេលដែលប្រទេសអាស៊ីអាគ្នេយ៍ទាំងពីរជួបប្រទះនឹងភ្លៀងមូសុងប្រចាំឆ្នាំ អ្នកវិទ្យាសាស្ត្រនិយាយថា ការប្រែប្រួលអាកាសធាតុកំពុងបង្កឱ្យមានគំរូអាកាសធាតុកាន់តែខ្លាំង ដែលអាចធ្វើឱ្យមានទឹកជំនន់បំផ្លិចបំផ្លាញកាន់តែច្រើន៕

អត្ថបទ៖ ប៊ុន សុភាព