អឺរ៉ុប ងាកទៅរកវ៉ាក់សាំង Sputnik V របស់រុស្ស៊ី ចោល AstraZeneca ខណៈកូវីដរលកទី៣ផ្ទុះឡើង

ឥឡូវនេះ សហភាពអ៊ឺរ៉ុបត្រៀមទទួលយកវ៉ាក់សាំងកូវីដ Sputnik V របស់រុស្ស៊ីបន្ទាប់ពីប្រទេសជាច្រើនបានបដិសេធចាក់វ៉ាក់សាំង AstraZeneca របស់ចក្រភពអង់គ្លេសដោយភ័យខ្លាចថា វាអាចបណ្តាលឲ្យមានការកកឈាម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រឿងនេះបានកើតឡើងថ្វីបើនិយតករអឺរ៉ុប​ អង្គការសុខភាពពិភពលោកនិងក្រុមហ៊ុន AstraZeneca និយាយថា វាមានសុវត្ថិភាពក៏ដោយ។

អៀរឡង់ បានក្លាយជាប្រទេសចុងក្រោយបង្អស់ដែលផ្អាកការចាក់វ៉ាក់សាំង AstraZeneca កាលពីម្សិលមិញ បន្ទាប់ពីហូឡង់ ដាណឺម៉ាក ន័រវែស អ៊ីស្លង់និងប៊ុលហ្គារីធ្វើបែបនេះ។

រោងចក្រអ៊ឺរ៉ុបកំពុងត្រៀមផលិតវ៉ាក់សាំងកូវីដរបស់រុស្ស៊ី នៅពេលដែលនិយតករកាន់តែខិតជិតទៅរកការអនុម័តថ្នាំបង្ការនេះ ក្នុងក្តីសង្ឃឹមពន្លឿនកម្មវិធីចាក់វ៉ាក់សាំងរបស់ទ្វីបនេះ។

លោក Kirill Dmitriev ប្រធានមូលនិធិវិនិយោគផ្ទាល់របស់រុស្ស៊ីដែលផ្តល់ហិរញ្ញប្បទានផលិតវ៉ាក់សាំង Sputnik V បាននិយាយកាលពីថ្ងៃចន្ទថា លោកបានឈានដល់កិច្ចព្រមព្រៀងជាមួយប្រទេសអ៊ីតាលី​ អេស្ប៉ាញ បារាំងនិងអាឡឺម៉ង់ដើម្បីចាប់ផ្តើមធ្វើវា។

លោក Dmitriev និយាយថា រោងចក្រទាំងនេះនឹងត្រូវបានប្រើ ដើម្បីផ្គត់ផ្គង់វ៉ាក់សាំង Sputnik V ទៅឲ្យអឺរ៉ុប នៅពេលមានការយល់ព្រមពីទីភ្នាក់ងារថ្នាំអឺរ៉ុប។

ប្រទេសអ៊ីតាលីដែលផ្អាកការប្រើប្រាស់វ៉ាក់សាំង Astra នឹងចាប់ផ្តើមវិធានការបិទសាជាថ្មីនៅថ្ងៃនេះ ខណៈទីក្រុងប៉ារីសកំពុងប្រឈមមុខនឹងវិធានការកាន់តែតឹងរ៉ឹងព្រោះមន្ទីរពេទ្យជាច្រើនកំពុងផ្ទុកអ្នកជំងឺហួសប្រមាណ ហើយវេជ្ជបណ្ឌិត ICU របស់អាឡឺម៉ង់បានព្រមានថា ចាំបាច់ត្រូវវិលត្រឡប់ទៅរកការរឹតត្បិតវិញជាបន្ទាន់។

ករណីជំងឺកូវីដ១៩ក៏កំពុងកើនឡើងយ៉ាងខ្លាំងផងដែរ នៅក្នុងប្រទេសមួយចំនួនដូចជា ស៊ុយអែត ប៉ូឡូញ ហុងគ្រី សាធារណរដ្ឋឆែកនិងប្រទេសមិនមែនជាសមាជិក EU គឺស៊ែប៊ី ខណៈអ្នកជំនាញព្រមានថា រលកទីបីបានចាប់ផ្តើមរួចទៅហើយ៕

ប្រែសម្រួលដោយ៖ Vann Vann

ប្រភព៖ Daily Mail

ចុចអាន៖ រដ្ឋមន្រ្តីក្រសួងអប់រំប្រាប់ឱ្យរៀបចំស្ថិតិគ្រូបង្រៀននៅភ្នំពេញដើម្បីត្រៀមចាក់វ៉ាក់សាំងការពារជំងឺកូវីដ១៩

ចុចអាន៖ ក្រុមហ៊ុន AstraZeneca បញ្ជាក់ច្បាស់ៗអំពីសុវត្ថិភាពវ៉ាក់សាំង ចំពេលមានការព្រួយបារម្ភ