យន្តហោះ២គ្រឿងទៀត បុកគ្នានៅ អាមេរិក

សហរដ្ឋអាមេរិក កើតមានហេតុការណ៍យន្តហោះបុកគ្នាទៀតហើយ ដោយលើកនេះគឺជាឧបទ្ទវហេតុរវាងជើងហោះហើរលេខ៦៨របស់ក្រុមហ៊ុនជប៉ុនអ៊ែរឡាញ ជាមួយជើងហោះហើរលេខ១៩២១ របស់ក្រុមហ៊ុន Delta អ៊ែរឡាញ នៅឯអាកាសយានដ្ឋានអន្តរជាតិ Seattle-Tacoma ក្នុងទីក្រុង Seattle។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមសេចក្តីរាយការណ៍របស់ Fox News, ហេតុការណ៍នេះកើតឡើងនាវេលាម៉ោង ១០:១៥នាទី ថ្ងៃពុធទី៥ខែកុម្ភៈឆ្នាំ២០២៥ (ពេលវេលានៅអាមេរិក) ហើយភ្លាមៗនោះ ក្រុមជួយសង្គ្រោះក៏បានបញ្ជូនទៅផងដែរ។

អាកាសយានដ្ឋានបានចេញសេចក្តីថ្លែងការណ៍ថា យន្តហោះរបស់ក្រុមហ៊ុនជប៉ុនអ៊ែរឡាញ បានបើកទៅបុកកន្ទុយរបស់យន្តហោះ Delta អ៊ែរឡាញ ដែលកំពុងរង់ចាំដាក់អ្នកដំណើរ។

ជាសំណាងល្អដែរ ដែលគ្មានអ្នកដំណើរណាម្នាក់រងរបួស ខណៈក្រុមមន្ត្រីកំពុងបើកការស៊ើបអង្កេត រកមូលហេតុពិតនៃឧទ្ទវហេតុនេះ ហើយក្រុមហ៊ុន Delta ក៏ប្រកាសឲ្យអ្នកដំណើរដូរទៅជិះយន្តហោះផ្សេងវិញ។

ហេតុការណ៍នេះកើតឡើងត្រឹមមួយសប្តាហ៍ប៉ុណ្ណោះ បន្ទាប់ពីសហរដ្ឋអាមេរិក ជួបសោកនាដកម្មដ៏សោកសៅ ដោយយន្តហោះស៊ីវិល បុកជាមួយឧទ្ធម្ភាគចក្រយោធានៅទីក្រុងវ៉ាស៊ីនតោន បណ្តាលឲ្យមនុស្ស៦៧នាក់ បាត់បង់ជីវិត។

យន្តហោះដឹកអ្នកដំណើររបស់ក្រុមហ៊ុន American Airlines ដែលធ្វើដំណើរចេញពីទីក្រុង Wichita នៃរដ្ឋ Kansas បានបុកជាមួយឧទ្ធម្ភាគចក្រ Black Hawk ធ្លាក់ចូលទន្លេ Potomac កាលពីថ្ងៃទី២៩ខែមករាឆ្នាំ២០២៥។

ក្រោយមកបាន៤ថ្ងៃប៉ុណ្ណោះ អាមេរិកជួបហេតុការណ៍ធ្លាក់យន្តហោះមួយគ្រឿងទៀត ដែលជាប្រភេទយន្តហោះដឹកអ្នកជំងឺ ដោយបណ្តាលឲ្យមនុស្ស៦នាក់ជិះក្នុងនោះ ស្លាប់ទាំងអស់។ យន្តហោះ Learjet 55 បានធ្លាក់លើផ្ទះប្រជាជននៅប៉ែកឦសានទីក្រុង Philadelphia នាម៉ោងប្រហែល ៦ល្ងាច (ម៉ោងនៅអាមេរិក) ខណៈពេលធ្វើដំណើរឆ្ពោះទៅកាន់អាកាសយានដ្ឋានជាតិ Springfield-Branson​ ក្នុងរដ្ឋ Missouri៕

អត្ថបទ៖ សុខ សុវណ្ណ

ចុចអាន៖ ធ្លាក់យន្តហោះមួយគ្រឿងទៀតហើយ នៅអាមេរិក