ធ្លាក់យន្តហោះមួយគ្រឿងទៀតហើយ នៅអាមេរិក

សហរដ្ឋអាមេរិក បានកើតហេតុការណ៍ធ្លាក់យន្តហោះមួយគ្រឿងទៀតហើយ ប៉ុន្តែលើកនេះគឺជាយន្តហោះធុនតូចប៉ុណ្ណោះ ហើយមានមនុស្សត្រឹម២នាក់ទេ ដែលជិះក្នុងនោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការបញ្ជាក់ពីរដ្ឋបាលអាកាសចរណ៍សហព័ន្ធ (FAA) នៅថ្ងៃទី១ខែកុម្ភៈឆ្នាំ២០២៥, យន្តហោះនេះជាប្រភេទ Learjet 55 ធ្លាក់លើផ្ទះប្រជាជននៅប៉ែកឦសានទីក្រុង Philadelphia នាម៉ោងប្រហែល ៦ល្ងាច (ម៉ោងនៅអាមេរិក) ខណៈពេលធ្វើដំណើរឆ្ពោះទៅកាន់អាកាសយានដ្ឋានជាតិ Springfield-Branson​ ក្នុងរដ្ឋ Missouri។

យ៉ាងណា ភ្លាមៗមិនទាន់មានសេចក្តីរាយការណ៍អំពីមនុស្សស្លាប់ទេ ប៉ុន្តែគេដឹងថា មានមនុស្សមួយចំនួនរងរបួសនៅលើដី ហើយ FAA កំពុងសហការជាមួយក្រុមប្រឹក្សាសុវត្ថិភាពដឹកជញ្ជូនជាតិ ដើម្បីស៊ើបអង្កេតរកមូលហេតុនៃគ្រោះថ្នាក់នេះ។

ហេតុការណ៍នេះកើតឡើងត្រឹមប៉ុន្មានថ្ងៃប៉ុណ្ណោះ បន្ទាប់ពីសោកនាដកម្មយន្តហោះដឹកអ្នកដំណើរបុកជាមួយឧទ្ធម្ភាគចក្រយោធា ខណៈក្រុមមន្ត្រីសន្មត់ថា មនុស្សទាំងអស់នៅក្នុងយន្តហោះស៊ីវិល ប្រហែលគ្មាននរណាម្នាក់នៅរស់ទេ។

យន្តហោះក្រុមហ៊ុន American Airlines ដែលធ្វើដំណើរចេញពីទីក្រុង Wichita នៃរដ្ឋ Kansas បានបុកជាមួយឧទ្ធម្ភាគចក្រ Black Hawk ធ្លាក់ចូលទន្លេ Potomac នៅទីក្រុងវ៉ាស៊ីនតោន។ ក្នុងយន្តហោះ មានផ្ទុកមនុស្សចំនួន៦៤នាក់ពេលជួបហេតុការណ៍ ចំណែកឧទ្ធម្ភាគចក្រវិញ មានយោធាចំនួន៣នាក់ ជិះក្នុងនោះ។ 

ប្រអប់ខ្មៅយន្តហោះបានរកឃើញហើយ រួចបញ្ជូនទៅមន្ទីរពិសោធន៍សុវត្ថិភាពដឹកជញ្ជូនជាតិ ដែលស្ថិតនៅក្បែរកន្លែងកើតហេតុ ដើម្បីពិនិត្យឲ្យកាន់តែច្បាស់ថាតើមានអ្វីកើតឡើងខ្លះនៅក្នុងយន្តហោះ។

សូមបញ្ជាក់ថា ហេតុការណ៍ធ្លាក់យន្តហោះពាណិជ្ជកម្មលើកចុងក្រោយបំផុតនៅអាមេរិក គឺកើតឡើងក្នុងខែកុម្ភៈឆ្នាំ២០០៩ នៅពេលជើងហោះហើររបស់ក្រុមហ៊ុន Continental Airlines ធ្លាក់លើផ្ទះក្នុងទីក្រុង Buffalo សម្លាប់មនុស្សចំនួន៩០នាក់៕

អត្ថបទ៖ សុខ សុវណ្ណ

ចុចអាន៖ បើកទំព័រឆ្នាំ២០២៥ បានត្រឹមមួយខែអាមេរិក  ជួបសោកនាដកម្មផ្ទួនៗ