ព្រឹលធ្លាក់ខ្លាំងមិនធ្លាប់មាន វាយប្រហារភាគខាងជើង ប្រទេសជប៉ុន

ព្រឹលធ្លាក់ខ្លាំងមិនធ្លាប់មាន បានវាយប្រហារតំបន់ភាគខាងជើងនៃប្រទេសជប៉ុន បណ្តាលឱ្យការធ្វើចរាចរណ៍ត្រូវជាប់គាំង ថែមទាំងឈានដល់ការបិទព្រលានយន្តហោះ និងរំខានដល់ការដឹកជញ្ជូនទៀតផង ជាពិសេសនៅខេត្ត Hokkaido។ នេះបើយោងតាមការចេញផ្សាយរបស់កាសែត The Guardian នៅថ្ងៃសៅរ៍ទី០៨ខែកុម្ភៈឆ្នាំ២០២៥។

នៅទីក្រុង Obi hiro ភាគខាងជើងខេត្ត Hokkaido, ព្រឹលបានធ្លាក់ចុះក្នុងកម្រិតបំបែកកំណត់ត្រារហូតដល់ទៅ ១២៩ សង់ទីម៉ែត្រ ត្រឹមរយៈពេល ១២ម៉ោង។ ជាមួយគ្នានេះ សីតុណ្ហភាពនៅផ្នែកខ្លះនៃប្រទេសជប៉ុនបានធ្លាក់ចុះដល់ដក១០អង្សាសេ ខណៈព្រឹល ពី៤០-៨០ សង់ទីម៉ែត្រ បន្ថែមទៀត បានធ្លាក់ចុះក្នុងខេត្តមួយចំនួនរួមទាំង Niigata, Tohoku និង Hokuriku ផងដែរ។

ចំណែកបើយោងតាមការចេញផ្សាយរបស់ Al Jazeera វិញ រដ្ឋបាលខេត្ត​ Hokkaido ប្រកាសថា ការធ្លាក់ព្រឹលខ្លាំងបំផុត បានកើតឡើងនៅតំបន់ភាគខាងកើតនៃខេត្តរួមទាំង Obihiro និង Kushiro។

លើសពីនេះផ្លូវហាយវេ និងផ្លូវសំខាន់ៗមួយចំនួនត្រូវបិទជាបណ្តោះអាសន្នសិន ខណៈសេវារថភ្លើងក្នុងតំបន់ដែលរងផលប៉ះពាល់ក៏ត្រូវផ្អាកដែរ។ មិនត្រឹមប៉ុណ្ណឹង ជើងហោះហើររាប់សិបជើងក្នុង និងក្រៅកោះ Hokkaido ត្រូវបង្ខំចិត្តលុបចោល ធ្វើឲ្យប៉ះពាល់ដល់មនុស្សរាប់ពាន់នាក់។ លើសពីនេះ សាលារៀនប្រហែល៣៧០ ត្រូវបិទទ្វារតាំងពីថ្ងៃអង្គារមក។ ព្រឹលក៏បណ្តាលឱ្យមានការបិទការិយាល័យប្រៃសណីយ៍ និងសេវាកម្មចែកចាយផ្សេងទៀត ដោយពន្យារពេលការដឹកជញ្ជូននៅកោះHokkaido និងទៅកាន់គោលដៅនានាទូទាំងប្រទេសជប៉ុនផងដែរ។

ទោះយ៉ាងណារហូត​មក​ដល់​ពេល​នេះ មិន​ទាន់​មាន​របាយការណ៍​ពី​អ្នក​រង​របួស ឬ​ខូច​ខាត​ធំ​ដុំ​ដោយការធ្លាក់ព្រឹលនេះនោះទេ៕

អត្ថបទ៖ ប៊ុន សុភាព