ថៃ​​​​​ប៉ុនប៉ង​​ចាប់ខ្លួន​​ដឹកនាំកងកម្លាំងឆ្មាំព្រំដែនរដ្ឋ Karen​របស់​មីយ៉ាន់ម៉ា ដោយ​ចោទ​​ពីបទជួញដូរមនុស្សឆ្លងដែន

ប្រទេសថៃកំពុងរៀបចំចេញដីកាចាប់ខ្លួនមេដឹកនាំនៃកងកម្លាំងឆ្មាំព្រំដែន​ក្នុង​រដ្ឋ Karen ជាសម្ព័ន្ធមិត្តយោធាមីយ៉ាន់ម៉ា (BGF) ក្រោមការចោទប្រកាន់ពីបទជួញដូរមនុស្សឆ្លងដែន។ នេះបើយោងតាមការចេញផ្សាយរបស់សារព័ត៌មាន Bangkok Post នៅថ្ងៃទី១២ខែកុម្ភៈនេះ។

រដ្ឋមន្រ្តីក្រសួងយុត្តិធម៌របស់ប្រទេសថៃ បានឲ្យដឹង​​ថា នាយកដ្ឋានស៊ើបអង្កេតពិសេស (DSI) នឹងបង្ហាញភស្តុតាងដល់ព្រះរាជអាជ្ញានៅនាយកដ្ឋានប្រឆាំងការជួញដូរមនុស្សនៅថ្ងៃ​អង្គារ​ ដើម្បីស្វែងរកដីកាចាប់ខ្លួនមេដឹកនាំ BGF ចំនួន​៣​នាក់ រួមមាន ​​លោកវរសេនីយ៍ឯក Saw Chit Thu, វរសេនីយ៍ទោ Colonel Mote និងវរសេនីយ៍ទោ Tin Win។

តាមសេចក្តីរាយការណ៍ BGF គ្រប់គ្រងគម្រោង Shwe Kokko ដែលជាមជ្ឈមណ្ឌលឧក្រិដ្ឋកម្មឆ្លងដែន ដែលបានបង្កើត​ឡើងនៅទីក្រុង Shwe Kokko ខេត្ត Myawaddy ក្នុងរដ្ឋ Karen ប្រទេសមីយ៉ាន់ម៉ាក្បែរព្រំដែនថៃ។

មេដឹកនាំ BGF ទាំងនេះត្រូវបានចោទប្រកាន់ពីបទជាប់ពាក់ព័ន្ធក្នុងការជួញដូរជនជាតិឥណ្ឌា ដែលត្រូវបានបង្ខំឱ្យធ្វើការនៅក្នុងមជ្ឈមណ្ឌល​Call-Center ប្រតិបត្តិការនៅកាស៊ីណូឈ្មោះថា Heng Sheng ក្នុងខេត្ត Myawaddy ទល់មុខស្រុក Mae Sot ប្រទេសថៃ។

រដ្ឋមន្ត្រីក្រសួងយុទ្ធិធម៌ថៃបានឲ្យដឹងថា ប្រទេសថៃនឹងស្វែងរកកិច្ចសហប្រតិបត្តិការពីមីយ៉ាន់ម៉ា រួមជាមួយនឹងការខិតខំប្រឹងប្រែងរបស់អាស៊ាន និងចិនក្នុងការសម្របសម្រួលការចាប់ខ្លួនជនសង្ស័យទាំងនេះ។ រដ្ឋាភិបាលថៃក៏កំពុងធ្វើការយ៉ាងជិតស្និទ្ធជាមួយស្ថានទូតអាមេរិកប្រចាំប្រទេសថៃ ព្រោះពលរដ្ឋអាមេរិកមួយចំនួនក៏បានរងគ្រោះដោយសារក្រុមឆបោកដែលកំពុងប្រតិបត្តិការនៅក្នុងប្រទេសមីយ៉ាន់ម៉ាផងដែរ។

លើសពីនេះប្រភព DSI ថាក្រៅពីជនសង្ស័យសំខាន់ៗទាំងបីនាក់នេះ នៅមានជនសង្ស័យជាច្រើនទៀតដែលប្រឈមមុខនឹងការចាប់ខ្លួន ក្នុងនោះមានជនជាតិថៃពីរនាក់ដែលធ្វើការឱ្យក្រុមហ៊ុនដែលដំណើរការបើករីសតទាំងនៅក្នុងប្រទេសថៃ និង នៅខេត្តMyawaddyប្រទេសមីយ៉ាន់ម៉ា៕

អត្ថបទ៖ ប៊ុន សុភាព