​ជនជាតិ​ចិន​៣០០​នាក់​​បន្ថែម​ទៀតដែល​សង្គ្រោះ​ពី​មណ្ឌលឆបោក​ ត្រូវ​បញ្ជូនទៅថៃ​ មុន​ចេញទៅចិន​

​អាជ្ញាធរ​យោធា​មីយ៉ាន់ម៉ា​នៅ​ថ្ងៃសុក្របានប្រគល់បុគ្គលិកមជ្ឈមណ្ឌលឆបោកជាជនជាតិចិនចំនួន ៣០០នាក់បន្ថែមទៀត​ចូល​ទៅ​ក្នុង​ទឹកដី​ថៃ​​ដើម្បី​ត្រៀម​ធ្វើមាតុភូមិនិវត្តន៍​​​ទៅកាន់​ប្រទេស​ពួក​គេ​​វិញ​​ ខណៈដែលអាជ្ញាធរប្រទសេទាំង​៣​បង្កើន​ការបង្ក្រាបលើប្រតិបត្តិការខុសច្បាប់នេះ។ នេះបើយោងតាមការចេញផ្សាយរបស់សារព័ត៌មាន CNA នៅថ្ងៃទី២២ខែកុម្ភៈនេះ។​

របបយោធាមីយ៉ាន់ម៉ា បាននិយាយនៅក្នុងសេចក្តីថ្លែងការណ៍មួយថា ក្រុមទីពីរដែលមានជនជាតិចិនចំនួន​៣០០នាក់ត្រូវបានប្រគល់កាលពីថ្ងៃសុក្រតាមរយៈស្ពានមិត្តភាពថៃ-មីយ៉ាន់ម៉ាទី២នៅឯទីក្រុង Mae Sot ព្រំដែនថៃ។ ជនបរទេសរាប់ពាន់នាក់​​ផ្សេង​ទៀត​ ត្រូវបានគេរំពឹងថា នឹងត្រូវបញ្ជូនទៅផ្ទះនៅប្រទេសចិនវិញ ពីកន្លែងឆបោកនៅក្នុងប្រទេសមីយ៉ាន់ម៉ា ក្នុងប៉ុន្មានសប្តាហ៍ខាងមុខនេះ ដោយក្រុមទីមួយបានចេញដំណើររួចហើយកាលពីថ្ងៃព្រហស្បតិ៍។ ជើងហោះហើរមាតុភូមិ​និវត្តន៍​បន្ថែមទៀតនឹងធ្វើឡើងនៅថ្ងៃសៅរ៍នេះ។

គួរបញ្ជាក់ថា កន្លែងឆបោកទាំងនោះត្រូវបានគ្រប់គ្រងដោយក្រុមឧក្រិដ្ឋជន និងបុគ្គលិកដោយជនបរទេស ដែលភាគច្រើន​ត្រូវបានជួញដូរ និងបង្ខំឱ្យបោកប្រាស់មនុស្សជុំវិញពិភពលោកតាមអ៊ីនធឺណិត។

បន្ទាប់ពីមានការផ្ដាច់ចរន្តអគ្គិសនីនិងកិច្ចសហប្រតិបត្តិការរវាងប្រទេសចិន ថៃ និង មីយ៉ាន់ម៉ា របបយោធាបានសន្យាធ្វើការដើម្បីកំណត់អត្តសញ្ញាណ ចាប់ខ្លួន និងចាត់វិធានការលើជនបរទេសដែលពាក់ព័ន្ធនៅក្នុងមជ្ឈមណ្ឌលបោកប្រាស់តាម​អ៊ីនធឺណិត និងអ្នកដែលនៅពីក្រោយ​រឿង​នេះ​ ដែលមកដល់ពេលនេះមានជនរបទេសរាប់ពាន់នាក់ត្រូវបានបញ្ជូនទៅប្រទេសថៃដើម្បីធ្វើមាតុភូមិនិវត្ត​ន៍​។

ជនជាតិចិនជាច្រើននាក់ដែលត្រូវបានដោះលែងពីមជ្ឈមណ្ឌលឆបោក​និយាយថា ពួកគេត្រូវបានបោកបញ្ឆោតឱ្យធ្វើការបោកប្រាស់ ប៉ុន្តែរដ្ឋាភិបាលចិន និងប្រព័ន្ធផ្សព្វផ្សាយរដ្ឋបានពណ៌នាពួកគេទាំងអស់ថាជាជនសង្ស័យ។ បើតាមការផ្សាយរបស់ទូរទស្សន៍រដ្ឋចិន អ្នកដែលបានធ្វើមាតុភូមិនិវត្តកាលពីថ្ងៃព្រហស្បតិ៍តាមរយៈយន្តហោះទាំងនោះ បានជាប់ខ្នោះដៃ និងស្លៀកពាក់ខោអាវពណ៌ត្នោតនិងអមដោយមន្រ្តីប៉ូលិសចិន៕

អត្ថបទ ៖ ប៊ុន សុភាព