ជនជាតិឥណ្ឌា២០០០នាក់កំពុងធ្វើការជាបុគ្គលិកឆបោកតាមអ៊ីនធឺណិតនៅមីយ៉ាន់ម៉ា

ការចេញផ្សាយរបស់ The Times of India បានឲ្យដឹងថា ប្រជាជនឥណ្ឌាជិត២០០០នាក់បច្ចុប្បន្នកំពុងជាប់ពាក់ព័ន្ធ​ក្នុងប្រតិបត្តិការឆបោកតាមប្រព័ន្ធអ៊ីនធឺណែតនៅទីក្រុង Myawaddy ជិតព្រំដែនមីយ៉ាន់ម៉ា-ថៃ ដែលគ្រប់គ្រងដោយក្រុមជីវពលប្រដាប់អាវុធមីយ៉ាន់ម៉ា។

បុគ្គលទាំងនេះ ដែលភាគច្រើនត្រូវបានបោកបញ្ឆោតតាមរយៈការសន្យាផ្តល់ជូនការងារដែល​មា​ន​ប្រាក់​ចំណូលខ្ពស់ កំពុងត្រូវបានបង្ខំឱ្យធ្វើការក្លែងបន្លំតាមអ៊ីនធឺណិតដែលផ្តោតលើជនរងគ្រោះនៅទូទាំងប្រទេសឥណ្ឌា និងសហរដ្ឋ​អាមេរិក។ ខណៈពេលដែលជនរងគ្រោះមួយចំនួនត្រូវបានជួយសង្គ្រោះ ស្ថានទូតព្រមានថា ទំហំពិត​ប្រាកដ​​នៃការឆបោកគឺ​អាច​ធំជាងនេះទៅទៀត ដោយមនុស្សជាច្រើននៅតែមិនទាន់ដឹងពីគ្រោះថ្នាក់ដែលពួកគេប្រឈមមុខនៅឡើយ។

មន្ត្រីកុងស៊ុលឥណ្ឌាកំពុងធ្វើការដើម្បីជម្លៀសពលរដ្ឋឥណ្ឌា ស្ថានទូតបានព្រមានថា អ្នកដែលស្ម័គ្រចិត្តចូលរួមក្នុងការបោក​ប្រាស់ទាំងនេះមិនមែនជាជនរងគ្រោះទេ ប៉ុន្តែជាឧក្រិដ្ឋជន។ អាជ្ញាធរឥណ្ឌាបានជំរុញឱ្យអ្នកស្វែងរកការងារធ្វើផ្ទៀងផ្ទាត់ការផ្តល់ជូនការងារនៅក្នុងប្រទេសមីយ៉ាន់ម៉ា កម្ពុជា ឡាវ និងថៃ មុនពេលធ្វើដំណើរ ព្រោះអ្នកដែលពាក់ព័ន្ធនឹងការបោកប្រាស់អាចប្រឈមនឹងផលវិបាកផ្លូវច្បាប់។

ទីក្រុង Myawaddy បានក្លាយជាមជ្ឈមណ្ឌលដ៏ល្បីល្បាញសម្រាប់ឧក្រិដ្ឋកម្មតាមអ៊ីនធឺណិត ដែលកម្មករត្រូវបានបង្ខិតបង្ខំឱ្យចូលរួមក្នុងប្រតិបត្តិការក្លែងបន្លំតាមអ៊ីនធឺណិត ដែលជារឿយៗស្ថិតនៅក្រោមការគំរាមកំហែង។ ជនរងគ្រោះជាច្រើនដែលបានធ្លាក់ចូលទៅក្នុងការសន្យាការងារបោកប្រាស់ត្រូវបានជាប់នៅក្នុងមជ្ឈមណ្ឌលឆបោកដោយគ្មានមធ្យោបាយរត់គេចខ្លួន លុះត្រាតែពួកគេបង់ថ្លៃលោះនោះបាន។

អាជ្ញាធរថៃ បានចាត់វិធានការដោយការកាត់ផ្តាច់ការផ្គត់ផ្គង់អគ្គិសនី អ៊ីនធឺណិត និងប្រេងឥន្ធនៈទៅកាន់តំបន់សំខាន់ៗ​ជាប់​​ព្រំដែន​ក្នុងប្រទេសមីយ៉ាន់ម៉ា ដែលមានមូលដ្ឋានប្រតិបត្តិការឆបោកទាំងនេះ។ ទោះបីជាមានវិធានការទាំងនេះក៏ដោយ ស្ថានភាពនៅតែធ្ងន់ធ្ងរ ដោយជនជាតិឥណ្ឌាជាច្រើននាក់ជាប់ក្នុងអន្ទាក់ដ៏គ្រោះថ្នាក់។

ខណៈពេលដែលបុគ្គលយ៉ាងហោចណាស់១៥០នាក់​ត្រូវបានគេកំណត់អត្តសញ្ញាណថា ជាជនរងគ្រោះ ប៉ុន្តែចំនួនពិតប្រាកដ​គឺខ្ពស់ជាងនេះ ដោយសារមនុស្សជាច្រើនត្រូវបានគេរាយការណ៍ថា ធ្វើការដោយស្ម័គ្រចិត្តដោយមិនបានជូនដំណឹង​ដល់អាជ្ញាធរឥណ្ឌា​នោះ​ទេ​។

កាលពីថ្ងៃទី១៨ខែកុម្ភៈ ជនជាតិឥណ្ឌា៣នាក់បានរត់គេចពីមជ្ឈមណ្ឌលបោកប្រាស់នៅ Myawaddy ហើយត្រូវបានស្ថានទូតជួយទៅដល់ទីក្រុង Yangon។ ឥឡូវនេះពួកគេកំពុងត្រូវបានដំណើរការដើម្បីធ្វើមាតុភូមិនិវត្តន៍ទៅកាន់ប្រទេស​ឥណ្ឌា​វិញ។ គិតចាប់តាំងពីខែមិថុនាឆ្នាំ២០២២ ប្រជាជនឥណ្ឌាជាង៦០០នាក់ត្រូវបានជួយសង្គ្រោះពីប្រតិបត្តិការឆបោកនៅទូទាំង មីយ៉ាន់ម៉ា កម្ពុជា ឡាវ និងថៃ៕

អត្ថបទ៖ ប៊ុន សុភាព