អ៊ីរ៉ង់​ថ្កោលទោស​យន្តហោះ​ចម្បាំង​អ៊ី​ស្រា​អែ​ល​ដែល​ហោះ​ពីលើ​ពិធីបុណ្យ​សព​លោក Nasrallah

រដ្ឋមន្ត្រី​ការបរទេស​អ៊ីរ៉ង់ លោក Abbas Araghchi នៅ​ថ្ងៃ​ទី​២៤​កុម្ភៈ​នេះ​បានថ្កោលទោសយ៉ាងខ្លាំង ចំពោះការដាក់ពង្រាយយន្តហោះចម្បាំងរបស់អ៊ីស្រាអែល ជុំវិញពិធីបុណ្យសពរបស់អតីតមេដឹកនាំក្រុមហេសបូឡាលោក Hassan Nasrallah ក្នុងទីក្រុងបេរូត។

ការ​ហោះហើរ​​របស់​យន្តហោះ​ចម្បាំង​អ៊ីស្រាអែល បានធ្វើ​ឡើងកាលពី​ថ្ងៃទី២៣​ខែកុម្ភៈ ខណៈ​មានអ្នកកាន់ទុក្ខរាប់ម៉ឺននាក់​នៅ​ក្នុង​ពិធី​បុណ្យ​លោក Nasrallah ហើយត្រូវបានមនុស្សជាច្រើនយល់ថា​ជាទង្វើបង្កហេតុ។

លោក Araghchi បាន​រៀបរាប់​ថា៖ «ខ្ញុំបានធ្វើជាសាក្សីដោយភ្នែករបស់ខ្ញុំផ្ទាល់ នូវ​ការរំលោភលើអធិបតេយ្យភាពរបស់ប្រទេសលីបង់ ដោយយន្តហោះអ៊ីស្រាអែល ដែលបានហោះមកជិតក្បាលរបស់យើង នៅក្នុងការប៉ុនប៉ងដ៏គួរ​ឲ្យ​ខ្លាច​មួយដើម្បីបំភ័យមនុស្សដែលបានប្រមូលផ្តុំដើម្បីកាន់ទុក្ខ»។

ការហោះហើរក្នុងរយៈកម្ពស់ទាបរបស់យន្តហោះអ៊ីស្រាអែល​ពីលើការជួបជុំនេះ បានធ្វើឲ្យ​ភាពតានតឹងនៅក្នុងតំបន់កាន់តែខ្លាំងឡើង ដោយអ៊ីរ៉ង់បានរំលឹកឡើងវិញនូវការប្តេជ្ញាចិត្តរបស់ខ្លួនក្នុងការគាំទ្រក្រុមហេសបូឡា និងប្រឆាំងនឹងសកម្មភាពរបស់អ៊ីស្រាអែល។

ពិធីបុណ្យសពរបស់ Nasrallah ដែលត្រូវបានសម្លាប់នៅក្នុងការវាយប្រហារតាមអាកាសរបស់អ៊ីស្រាអែលក្នុងខែកញ្ញាឆ្នាំ​២០២៤ តំណាង​ឲ្យ​ភាពធន់ និង​ឥទ្ធិពល​របស់​ក្រុម​ហេសបូឡា ទោះបីជាមានភាពឯកោផ្នែកនយោបាយក៏ដោយ។ ព្រឹត្តិការណ៍នេះគូសបញ្ជាក់អំពីជម្លោះដែលកំពុងបន្ត និង​ភាព​​ស្មុគស្មាញ​នៃ​ទំនាក់ទំនង​​រវាង​អ៊ីស្រាអែល ហេសបូឡា និងអ៊ីរ៉ង់។

ការថ្កោលទោសរបស់អ៊ីរ៉ង់បង្ហាញពីការភាព​តាន​តឹង​កាន់តែខ្លាំង​រវាងអ៊ីរ៉ង់ និងអ៊ីស្រាអែល ដោយប្រទេសទាំងពីរបានចោទប្រកាន់គ្នាទៅវិញទៅមកពីសកម្មភាពអស្ថិរភាពនៅមជ្ឈិមបូព៌ា៕

ដោយ៖ ឈាង

ចុចអាន៖ ហេសបូឡា ត្រៀម​រៀបចំ​បុណ្យ​សព​ដ៏​ធំ​សម្រាប់​អតីត​មេ​ដឹក​នាំ​របស់​ខ្លួន​គឺ​លោក Nasrallah