រកឃើញហត្ថលេខាវិស្វករក្លែងក្លាយ៣០លើឯកសារសាងសង់សវនកម្មរដ្ឋ ដែលរលំនៅថៃ

នាយកដ្ឋានស៊ើបអង្កេតពិសេស (DSI)​របស់​រដ្ឋាភិបាល​ថៃ បានរកឃើញហត្ថលេខារបស់វិស្វករក្លែងក្លាយចំនួន៣០ នាក់លើឯកសារសម្រាប់ការសាងសង់អគារការិយាល័យសវនកម្មរដ្ឋ (SAO) ក្នុងទីក្រុងបាងកកដែលបានដួលរលំដោយសារឥទ្ធិពលរញ្ជួយដីពីមីយ៉ាន់ម៉ាកាលពីថ្ងៃទី២៨ខែមីនា។ នេះបើយោងតាមការចេញផ្សាយរបស់កាសែត​Bangkok Post នៅថ្ងៃទី០៦ខែឧសភានេះ។

នាយកដ្ឋានស៊ើបអង្កេតពិសេស (DSI) បានបើកកិច្ចប្រជុំកាលពីថ្ងៃចន្ទដើម្បីពិនិត្យមើលវឌ្ឍនភាពក្នុងការស៊ើបអង្កេតដែលកំពុងដំណើរការលើករណីចោទប្រកាន់ទៅលើក្រុមហ៊ុន China Railway No.10 ដែលជាអ្នកម៉ៅ​ការ​សាង​​សង់​​អគារ SAO ដែលរលំបាក់​ខូច​ខាតទាំងស្រុង​​​។

អ្នកស៊ើបអង្កេត បានរកឃើញថា បុគ្គលចំនួន៣០នាក់ បាននិយាយថា ហត្ថលេខារបស់ពួកគេត្រូវបានក្លែងបន្លំជាអ្នកត្រួតពិនិត្យសំណង់ ដោយមានតែប្រាំបីនាក់ប៉ុណ្ណោះដែលបញ្ជាក់ថាហត្ថលេខារបស់ពួកគេគឺពិតប្រាកដ។

ជាមួយនឹងការរកឃើញសំខាន់ៗដែលប្រមូលបានរួចហើយ អគ្គនាយក DSI លោក​ឧត្តមសេនីយ៍​ទោ​ Yutthana Praedam បានកំណត់ពេលកិច្ចប្រជុំតាមដានបន្ថែមទៀត ដើម្បីបង្ហាញពីពេលវេលានៃការផ្ទេរសំណុំរឿងទៅព្រះរាជអាជ្ញា និងរយៈពេលនៃការឃុំខ្លួនជនសង្ស័យក្រុមទី១រួមមានជនជាតិថៃ ០៣ នាក់ និង លោក Zhang Chuanling ដែលជាម្ចាស់ភាគហ៊ុនចិននៅក្នុងក្រុមហ៊ុន។

DSI ក៏កំពុងស៊ើបអង្កេតការរំលោភដែលអាចកើតមាននៅក្រោមច្បាប់ស្តីពីបទល្មើសទាក់ទងនឹងការដាក់សំណើដេញថ្លៃទៅទីភ្នាក់ងាររដ្ឋាភិបាល BE 2542 ជាពិសេសទាក់ទងនឹងការដេញថ្លៃគម្រោង និងតួនាទីរបស់ក្រុមហ៊ុនបណ្តាក់ទុនក្នុងការត្រួតពិនិត្យការសាងសង់។ អ្នកជំនាញផ្នែកវិស្វកម្មរចនាសម្ព័ន្ធក៏ត្រូវបានអញ្ជើញឱ្យចូលរួមវិភាគការដួលរលំអគារនេះផងដែរ។

ជាមួយគ្នានេះ អភិបាលក្រុងបាងកក លោក Chadchart Sittipunt បានផ្តល់ព័ត៌មានថ្មីៗអំពីការស្វែងរកជនរងគ្រោះ និងការយកកម្ទេចថ្មនៅកន្លែងដួលរលំផងដែរ ដោយបង្ហាញលោកបានបង្ហាញថាប្រតិបត្តិការគួរតែបញ្ចប់ក្នុងរយៈពេល ៤ ថ្ងៃទៀត។

មកដល់ពេលនេះចំនួន​អ្នក​ស្លាប់​ជា​ផ្លូវការ​មាន​ដល់​ទៅ ៨៦ នាក់ មាន​អ្នក​របួស ៩ នាក់ និង ១៤ នាក់​នៅ​បាត់​ខ្លួន។ អាជ្ញាធរក៏កំពុងប្រមូលទិន្នន័យដើម្បីវាយតម្លៃផលប៉ះពាល់សេដ្ឋកិច្ច និងសំណងដល់អាជីវកម្មដែលរងផលប៉ះពាល់នៅក្បែរនោះ៕

អត្ថបទ៖ ប៊ុន សុភាព