បុរសម្នាក់ឃើញពស់ថ្លាន់ក្នុងបង្គន់ បង្កក្តីបារម្ភជុំវិញការជួបពស់ក្នុងទីក្រុងបាងកក

យោងតាមការចេញផ្សាយរបស់ការសែត Bangkok Post នៅថ្ងៃទី២៣ខែឧសភានេះ បុរសរស់នៅក្នុងទីក្រុងបាងកកម្នាក់បានភ្ញាក់ពីដំណេកជាមួយនឹងការភ័យខ្លាចនៅម៉ោងប្រហែល ៣ទៀបភ្លឺ​ថ្ងៃសុក្រដោយសារគាត់ឃើញពស់ថ្លាន់ដ៏ធំមួយនៅក្នុងចានបង្គន់ក្នុងផ្ទះរបស់គាត់។

បុរសនោះបានសរសេរចែករំលែកនិងបង្ហោះវីដេអូនៅលើ Facebook អំពីសត្វពស់ដ៏ធំដែលដេកយ៉ាងសុខស្រួលនៅក្នុងចានបង្គន់ថា «បានរកឃើញវានៅក្នុងបង្គន់នៅម៉ោង ៣ ទៀបភ្លឺនៅផ្ទះរបស់ខ្ញុំ»។ ក្រោយមកគាត់ក៏បានបង្ហាញវីដេងូអ្នកជួយសង្គ្រោះមកដល់ម៉ោងប្រហែល ៤ព្រឹក ដើម្បីយកសត្វពស់ចេញពីបង្គន់ដោយសុវត្ថិភាព។

ការបង្ហោះនេះបានទាក់ទាញការចាប់អារម្មណ៍យ៉ាងទូលំទូលាយនៅលើអ៊ីនធឺណិតដោយមានសំណួរជាច្រើនថាតើពស់ចូលក្នុងផ្ទះយ៉ាងដូចម្តេច។ ដោយអ្នកខ្លះប៉ាន់ស្មានថាដោយសារផ្ទះជិតតំបន់ព្រៃឈើ និងបន្ទប់ទឹកស្ថិតនៅជាន់ផ្ទាល់ដីឬយ៉ាងណា។ អ្នក​ខ្លះវិញបាន​ចែក​រំលែក​គន្លឹះចាក់​ទឹក​ដែល​មាន​ជាតិ​អាស៊ីតសម្អាត​បង្គន់​ជា​ប្រចាំ​ ដើម្បី​រារាំង​មិន​ឲ្យ​ពស់ចូល​តាម​បំពង់ទឹកលូចូលដល់បង្គន់។

ទោះបីជារឿងមិនធម្មតាក៏ដោយ ឧប្បត្តិហេតុបែបនេះមិនធ្លាប់មាននៅក្នុងទីក្រុងរបស់ប្រទេសថៃនោះទេ។ អ្នកជំនាញពន្យល់ថា ពស់ច្រើនតែចូលក្នុងប្រព័ន្ធលូសាធារណៈ ដើម្បីស្វែងរកទឹក និងទីជម្រក ហើយអាចរអិលចូលទៅក្នុងបង្គន់ តាមរយៈបំពង់កាកសំណល់តាមផ្ទះ។

ដើម្បីកាត់បន្ថយហានិភ័យនៃការជួបប្រទះបែបនេះ អាជ្ញាធរសត្វព្រៃ និងអ្នកជំនាញសត្វល្អិតថៃណែនាំឱ្យម្ចាស់ផ្ទះដំឡើងគម្របលូដែលមានសុវត្ថិភាព បិទគម្របបង្គន់នៅពេលមិនប្រើប្រាស់ លាងទឹកមុនពេលអង្គុយ និងធ្វើការត្រួតពិនិត្យជាប្រចាំ៕

អត្ថបទ៖ ប៊ុន សុភាព