រដ្ឋមន្ត្រីការពារជាតិអ៊ីរ៉ង់ ទៅដល់ ចិន ក្រោយមានបទឈប់បាញ់ក្នុងសង្គ្រាមជាមួយ អ៊ីស្រាអែល

តាមសេចក្តីរាយការណ៍របស់ CNN នៅថ្ងៃព្រហស្បតិ៍ទី២៦ខែមិថុនាឆ្នាំ២០២៥ រដ្ឋមន្ត្រីការពារជាតិអ៊ីរ៉ង់ Aziz Nasirzadeh បានទៅដល់ប្រទេសចិនហើយ សម្រាប់ដំណើរទស្សនកិច្ចរយៈពេល២ថ្ងៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដំណើរទស្សនកិច្ចនេះកើតឡើងមិនយូរប៉ុន្មានបន្ទាប់ពីប្រធានាធិបតីអាមេរិក ដូណាល់ ត្រាំ ប្រកាសបទឈប់បាញ់ក្នុងសង្គ្រាមរយៈពេល១២ថ្ងៃរវាងអ៊ីស្រាអែលនិងអ៊ីរ៉ង់។

ក្នុងដំណើរទស្សនកិច្ចនេះ លោក Nasirzadeh នឹងចូលរួមក្នុងកិច្ចប្រជុំថ្នាក់រដ្ឋមន្ត្រីការពារជាតិនៃអង្គការកិច្ចសហប្រតិបត្តិការសៀងហៃ (SCO) ហើយក៏នឹងមានជំនួបខាងក្រៅជាមួយមន្ត្រីចិនផងដែរ។

ទោះបីជាយ៉ាងណាក៏ដោយ មិនមានការបញ្ជាក់ពីរបៀបវារៈនៃជំនួបទាំងនោះទេ។

ដំណើរទស្សនកិច្ចនេះទៀតសោត កើតឡើងចំពេលសង្គ្រាមមជ្ឈិមបូព៌ា ហាក់ថយកម្តៅបន្តិច ដ្បិតតែស្ថានការណ៍អាចនឹងប្រែប្រួលគ្រប់ពេលក៏ដោយ។

ក្រោយពេលអាមេរិក វាយប្រហាររោងចក្រនុយក្លេអ៊ែរកាលពីចុងសប្តាហ៍, រដ្ឋមន្ត្រីការបរទេសអ៊ីរ៉ង់ Abbas Araghchi ក៏បានទៅជួបជាមួយប្រធានាធិបតី វ្ល៉ាឌីមៀរ ពូទីន នៅឯប្រទេសរុស្ស៊ីផងដែរ ដើម្បីពិភាក្សាបញ្ហានោះ និងសុំជំនួយយោធាបន្ថែមទៀត។

តាមការចុះផ្សាយរបស់ Wall Street Journal, ក្នុងជំនួបពិភាក្សានោះ លោក Araghchi បានពាំនាំលិខិតពីមេដឹកនាំកំពូលអ៊ីរ៉ង់ ដែលស្នើឲ្យរុស្ស៊ីជួយជំនួយយោធាបន្ថែម ដូចជាខែលការពារដែនអាកាស និងសុំឲ្យជួយការពារហេដ្ឋារចនាសម្ព័ន្ធនុយក្លេអ៊ែររបស់ខ្លួន ប៉ុន្តែមានសេចក្តីរាយការណ៍ថាលោក ពូទីន បានបដិសេធសំណើ ខណៈអ្នកវិភាគយល់ឃើញថា ការសម្រេចចិត្តរបស់មេដឹកនាំវិមានក្រឹមឡាំង គឺព្រោះតែរុស្ស៊ីមិនចង់លូកដៃចូលក្នុងសង្គ្រាមនៅមជ្ឈិមបូព៌ា ទាំងដែលខ្លួនកំពុងជាប់ដៃប្រយុទ្ធជាមួយអ៊ុយក្រែន និងរងទណ្ឌកម្មដែលដាក់ដោយលោកខាងលិចស្រាប់ហើយ៕

អត្ថបទ៖ សុខ សុវណ្ណ

ចុចអាន៖ វាយអ៊ីរ៉ង់រួច ត្រាំប្រកាសថា អាមេរិកនិងអ៊ីរ៉ង់ នឹងពិភាក្សាគ្នារឿងនុយក្លេអ៊ែរ សប្តាហ៍ក្រោយ