ណេតាន់យ៉ាហ៊ូ នឹងទៅជួប ត្រាំ ដល់សេតវិមាន នៅសប្តាហ៍ក្រោយ

នាយករដ្ឋមន្ត្រីអ៊ីស្រាអែល បេនចាមីន ណេតាន់យ៉ាហ៊ូ នឹងទៅជួបប្រធានាធិបតីអាមេរិក ដូណាល់ ត្រាំ ​ដល់សេតវិមាន នៅសប្តាហ៍ក្រោយ ខណៈគោលបំណងធំនៃដំណើរទស្សនកិច្ចនេះ ត្រូវគេដឹងថាគឺដើ​ម្បីពិភាក្សាលើបញ្ហាបទឈប់បាញ់ជាមួយក្រុមហាម៉ាសនៅតំបន់ហ្គាហ្សានិងជម្លោះជាមួយអ៊ីរ៉ង់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ Times of Israel, លោកណេតាន់យ៉ាហ៊ូ នឹងបំពេញទស្សនកិច្ចទីក្រុងវ៉ាស៊ីនតោន នៅថ្ងៃទី៧ខែកក្កដាឆ្នាំ២០២៥ ហើយនោះគឺជាទស្សកិច្ចលើកទី៣របស់នាយករដ្ឋមន្ត្រីអ៊ីស្រាអែលវ័យ៧៥ឆ្នាំរូបនេះ ទៅកាន់រដ្ឋធានីរបស់អាមេរិក ចាប់តាំងពីលោក ត្រាំ ចូលអង្គុយកៅអីសេតវិមាន អាណត្តិទី២។

តាមសេចក្តីរាយការណ៍ខាងលើ មេដឹកនាំទាំងពីរនឹងពិភាក្សាគ្នារឿងបញ្ចប់សង្គ្រាមនៅហ្គាហ្សានិងរំដោះចំណាប់ខ្មាំង ដែលជាប់ឃុំនៅទីនោះអស់រយៈពេលជិត២ឆ្នាំមកហើយ។ បន្ថែមពីលើនេះ លោកត្រាំនិងណេតាន់យ៉ាហ៊ូ ក៏ត្រូវជជែកគ្នាអំពីការវិវឌ្ឍនៃស្ថានភាពនៅក្នុងប្រទេសអ៊ីរ៉ង់ផងដែរ។

ដំណើរទស្សនកិច្ចនេះនឹងកើតឡើង ២សប្តាហ៍ក្រោយអ៊ីស្រាអែល-អ៊ីរ៉ង់ ព្រមព្រៀងឈប់បាញ់ក្រោយការប្រយុទ្ធគ្នាយ៉ាងកក្រើក ដែលបណ្តាលឲ្យមានមនុស្សស្លាប់និងខ្ទេចខ្ទីសំណង់ហេដ្ឋារចនាសម្ព័ន្ធទាំងសងខាង។

ម្យ៉ាង ដំណើរទស្សនកិច្ចនេះក៏នឹងកើតឡើងផងដែរ បន្ទាប់ពីលោកត្រាំ ព្រមាន​យ៉ាងម៉ឺងម៉ាត់​ថា លោកនឹងពិចារណាទម្លាក់គ្រាប់បែកលើអ៊ីរ៉ង់ម្តងទៀត ប្រសិនបើក្រុងតេហេរ៉ង់​បន្តការចម្រាញ់សារធាតុអ៊ុយរ៉ាញ៉ូមឡើងវិញដល់កម្រិតគួរ​ឲ្យ​ព្រួយ​បារម្ភ ហើយ​ក្នុងពេលដំណាលគ្នា​នេះ​ដែរ លោក​នឹង​ដក​ចេញ​ផែនការ​បន្ធូរបន្ថយទណ្ឌកម្ម​លើ​អ៊ីរ៉ង់។

លោក ត្រាំ សង្កត់ធ្ងន់ថា ការវាយប្រហារនាពេលថ្មីៗនេះ ដែលធ្វើឡើងជាមួយប្រទេសអ៊ីស្រាអែល បានធ្វើ​ឲ្យ​ខូចហេដ្ឋារចនាសម្ព័ន្ធនុយក្លេអ៊ែររបស់ប្រទេសអ៊ីរ៉ង់យ៉ាងខ្លាំង។ ការផ្គើន​​របស់​អ៊ីរ៉ង់​​នឹង​បង្ក​​ឲ្យ​មាន​សកម្មភាព​យោធា​បន្ថែម​ទៀត​ជាក់​ជា​មិន​ខាន។

សារ​របស់​​លោក ត្រាំ ​ធ្វើ​ឡើងក្រោយ​ការ​បង្ហាញ​វត្តមាន​ជា​លើក​ដំបូង​របស់​មេ​ដឹក​នាំ​កំពូល​​អ៊ីរ៉ង់ Ayatollah Ali Khamenei បន្ទាប់​ពី​ជម្លោះរយៈពេល​១២​ថ្ងៃ។ ក្នុង​វីដេអូសន្ទរកថា​កាល​ពី​ថ្ងៃ​ទី​២៦​មិថុនា​ លោក Khamenei ព្រមានថា ប្រសិនបើសហរដ្ឋអាមេរិកបើកការវាយប្រហារយោធាមួយផ្សេងទៀត អ៊ីរ៉ង់នឹងសងសឹកដោយកំណត់​គោល​ដៅ​លើ​មូលដ្ឋានទ័ព​របស់​ក្រុង​វ៉ាស៊ីនតោន​នៅទូទាំង​តំបន់​មជ្ឈិមបូព៌ា៕

អត្ថបទ៖ សុខ សុវណ្ណ

ចុចអាន៖ លោក ត្រាំ ប្រាប់​ថា​នឹងពិចារណាទម្លាក់គ្រាប់បែកលើអ៊ីរ៉ង់ម្តងទៀត