​អ៊ីរ៉ង់​ដាក់​សម្ពាធ​ជនជាតិ​អាហ្វហ្គានីស្ថាន​​​រាប់​លាន​នាក់​​​ចាកចេញ​​ ចំពេល​ផុត​កំណត់​នៃ​ការ​និរទេស

យោងតាមការចេញផ្សាយរបស់សារព័ត៌មាន ​Al Jazeera នៅថ្ងៃទី០៧ខែកក្កដានេះ អ៊ីរ៉ង់បានបញ្ជាឱ្យជនចំណាកស្រុក​ និងជនភៀសខ្លួនអាហ្វហ្គានីស្ថានរាប់លាននាក់ចាកចេញពីប្រទេស ឬប្រឈមនឹងការចាប់ខ្លួន ខណៈដែលកាលបរិច្ឆេទនិរទេសកំណត់ដោយរដ្ឋាភិបាលបានបញ្ចប់កាលពីថ្ងៃអាទិត្យ។

ចំណាត់ការនេះកើតឡើងចំពេលមានការព្រួយបារម្ភផ្នែកសន្តិសុខកាន់តែខ្លាំងឡើង បន្ទាប់ពីមានជម្លោះរយៈពេល ១២ ថ្ងៃ​ជាមួយអ៊ីស្រាអែល ក្នុងអំឡុងពេលដែលសហរដ្ឋអាមេរិកធ្វើការវាយប្រហារតាមអាកាសទៅលើទីតាំង​ដែល​មាន​ការ​សង្ស័យ​​​​​ផលិត​​សារធាតុ​សម្រាប់​​ផលិត​​អាវុធ​នុយក្លេអ៊ែររបស់អ៊ីរ៉ង់។

អង្គការមនុស្សធម៌ បានព្រមានថា ការនិរទេសទ្រង់ទ្រាយធំអាចធ្វើឲ្យអាហ្វហ្គានីស្ថានមានអស្ថិរភាពយ៉ាងធ្ងន់ធ្ងរ ខណៈ​ វា​ជាប្រទេសក្រីក្របំផុតមួយក្នុងពិភពលោក។ អ៊ីរ៉ង់​មាន​ប្រជាជន​អាហ្វហ្គានីស្ថាន​ប្រហែល ៤លាន​នាក់ ដែល​ភាគច្រើន​បាន​​រស់​នៅ​ទីនោះ​ជាច្រើន​ទសវត្សរ៍​មក​ហើយ។

តាំង​ពី​ខែ​មីនា​មក នៅ​ពេល​រដ្ឋាភិបាល​បាន​ចេញ​បញ្ជា​នេះ ជន​ជាតិ​អាហ្វហ្គានីស្ថាន​ជាង ៧០ម៉ឺននាក់​បាន​ចាក​ចេញ​ពី​ប្រទេសអ៊ីរ៉ង់។ ក្នុងខែមិថុនាតែមួយ មនុស្សជាង ២៣ម៉ឺន​​នាក់ត្រូវបានបណ្តេញចេញ ជាមួយនឹងការនិរទេសកើនឡើងដល់ទៅជាង ៣ម៉ឺន​នាក់ក្នុងមួយថ្ងៃក្នុងអំឡុងពេលជម្លោះ។

ទោះបីអ៊ីរ៉ង់បដិសេធមិនកំណត់គោលដៅលើជនជាតិអាហ្វហ្គានីស្ថាន របាយការណ៍ជាច្រើនបានបង្កើនការប្រឆាំងនឹងអាហ្វហ្គានីស្ថាន និងភាពតានតឹងខាងផ្លូវចិត្ត។ គ្រួសារដែលកើត និងធំធាត់នៅក្នុងប្រទេសអ៊ីរ៉ង់កំពុងត្រូវបានបង្ខំឱ្យចាកចេញពីផ្ទះដែលពួកគេចាត់ទុកថា ជាជម្រកតែមួយគត់របស់ពួកគេ។

យោងតាមទីភ្នាក់ងារអង្គការសហប្រជាជាតិ ការវិលត្រឡប់មកវិញរបស់ជនជាតិអាហ្វហ្គានីស្ថានកំពុងត្រូវការជំនួយជាបន្ទាន់។ ថ្វីត្បិតតែការត្រឡប់មកវិញខ្លះជាការស្ម័គ្រចិត្តក៏ដោយ ប៉ុន្តែមនុស្សជាច្រើនត្រឡប់មកវិញដោយសារការនិរទេស។

ក្រុមអ្នកសង្កេតការណ៍និយាយថា ការបង្រ្កាបនេះត្រូវបានជំរុញដោយវោហាសាស្ត្រនយោបាយ និងការចោទប្រកាន់ដែលរីករាលដាលនៅលើប្រព័ន្ធផ្សព្វផ្សាយសង្គម ដែលបន្ទោសជនជាតិអាហ្វហ្គានីស្ថានចំពោះបញ្ហាសេដ្ឋកិច្ច ឬចោទប្រកាន់ពួកគេពីបទចារកម្មឲ្យអ៊ីស្រាអែលជាដើម៕

អត្ថបទ៖ ប៊ុន សុភាព