ព័ត៌មានអន្ដរជាតិ

ប៉ូលិសថៃនឹងពិនិត្យប្រវត្តិព្រះសង្ឃ ៣០ ម៉ឺនអង្គទូទាំងប្រទេស ក្រោយបែកធ្លាយរឿងអាស្រូវផ្លូវភេទ

បានផុស

២០ វិនាទី មុន

នៅ

ថ្ងៃព្រហស្បតិ៍ ១៧ កក្កដា ២០២៥

ដោយ

យោងតាមការចេញផ្សាយរបស់កាសែត Bangkok Post កាលពីថ្ងៃទី១៧ខែកក្កដា ប៉ូលិសថៃនឹងពិនិត្យមើលប្រវត្តិព្រះសង្ឃប្រមាណ ៣០ម៉ឺនអង្គនៅទូទាំងប្រទេស បន្ទាប់ពីផ្ទុះរឿងអាស្រូវផ្លូវភេទនិងពុករលួយដ៏ធំពាក់ព័ន្ធជាមួយព្រះសង្ឃជាច្រើនអង្គ និងស្ត្រីម្នាក់។

កិច្ចប្រជុំដើម្បីត្រួតពិនិត្យព្រះសង្ឃរបស់ CIB ក្នុងទីក្រុងបាងកក។ (រូបភាព៖ CIB)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ស្ត្រីឈ្មោះ Wilawan Emsawat ត្រូវបានគេស្គាល់ថាជា «Sika Golf» អាយុ ៣៥ ឆ្នាំត្រូវបានប៉ូលិសចាប់ខ្លួនក្នុងសប្តាហ៍នេះ ពីបទចោទប្រកាន់ថាបានជួយព្រះសង្ឃជាន់ខ្ពស់ឲ្យលួចលុយវត្ត លាងលុយកង្វក់ និងរក្សាវត្ថុលួចបានមួយចំនួន។ ប៉ូលិសនិយាយថា នាងបានរួមភេទជាមួយព្រះសង្ឃប្រហែល ១០ អង្គ ហើយបានប្រាក់យ៉ាងច្រើនពីព្រះសង្ឃទាំងនោះ។ ប៉ូលិសបានរកឃើញវីដេអូទំនាក់ទំនងផ្លូវភេទជាច្រើននៅលើទូរសព្ទរបស់នាង ហើយគ្រោងនឹងចោទប្រកាន់នាងពីបទឧក្រិដ្ឋជាច្រើនទៀត។

លោកឧត្តមសេនីយ៍ទោ Jaroonkiat Parnkaew ស្នងការរងនៃការិយាល័យស៊ើបអង្កេតកណ្តាល(CIB) បាននិយាយថា ពួកគេបានស្នើសុំឱ្យការិយាល័យព្រះពុទ្ធសាសនាជាតិ (NOB) ផ្តល់លេខអត្តសញ្ញាណរបស់ព្រះសង្ឃទាំងអស់ ដើម្បីឲ្យពួកគេអាចពិនិត្យមើលកំណត់ត្រាព្រហ្មទណ្ឌ។ លោកក៏បានលើកឡើងថា ករណីចាស់ទាក់ទងនឹងព្រះសង្ឃពីមុន នឹងត្រូវបើកឡើងវិញផងដែរ។ លោកបានរិះគន់ NOB ថាមិនដាក់ទោសចំពោះការប្រព្រឹត្តខុសរបស់ព្រះសង្ឃធ្ងន់ធ្ងរកាលពីអតីតកាល។

ខណៈពេលដែលប៉ូលិសស៊ើបអង្កេតឧក្រិដ្ឋកម្មទាក់ទងនឹងព្រះសង្ឃ NOB នៅតែមានអំណាចក្នុងការដាក់ទោសព្រះសង្ឃចំពោះការបំពានសាសនាឬសីលធម៌។ ទោះជាយ៉ាងណា ប៉ូលិសនិយាយថា ពួកគេនឹងបន្តការខិតខំប្រឹងប្រែងក្នុងការការពារមុខមាត់ព្រះពុទ្ធនៅប្រទេសថៃ ដោយប៉ូលិសក៏បានបង្កើតមជ្ឈមណ្ឌលពិសេសមួយដើម្បីដោះស្រាយបណ្តឹងអំពីអាកប្បកិរិយាមិនល្អរបស់ព្រះសង្ឃ។ មជ្ឈមណ្ឌលនេះបានទទួលរបាយការណ៍ជាច្រើនអំពីការប្រព្រឹត្តខុសរួចហើយ។

គួរបញ្ជាក់ថារឿងអាស្រូវនេះបានធ្វើឲ្យមហាជនទូទាំងប្រទេសថៃភ្ញាក់ផ្អើលនិងល្បីល្បាញជាអន្តរជាតិ ខណៈប៉ូលិសកំពុងធ្វើការឃាត់ខ្លួន ព្រះសង្ឃដែលជាប់ពាក់ព័ន្ធ ដោយមានព្រះសង្ឃខ្លះមិនត្រឹមតែពាក់ព័ន្ធរឿងអាស្រូវផ្លូវភេទប៉ុណ្ណោះទេ សង្ឃខ្លះជាប់ពាក់ព័ន្ធនឹងអំពើពុករលួយលួចលុយវត្តនិងប្រើប្រាស់លុយវត្តមិនត្រឹមត្រូវទៀតផង៕