យន្តហោះដឹកស្បៀងអាហារទៅឲ្យជនរងគ្រោះដោយព្យុះត្រូពិក Eta ធ្លាក់ក្នុងប្រទេសហ្គាតេម៉ាឡា

កាលពីថ្ងៃអាទិត្យមនុស្សយ៉ាងហោចណាស់ ២ នាក់បានស្លាប់ នៅពេលដែលយន្តហោះធន់តូចមួយគ្រឿងដែលដឹកស្បៀងអាហារទៅឲ្យជនរងគ្រោះដោយព្យុះត្រូពិក Eta បានធ្លាក់ ។

យន្ដហោះបានធ្លាក់នៅវេលាថ្ងៃត្រង់ប៉ុន្មាននាទីប៉ុណ្ណោះបន្ទាប់ពីហោះចេញពីអាកាសយានដ្ឋានអន្តរជាតិ La Aurora នៅតាមផ្លូវឆ្ពោះទៅកាន់ប៉ែកខាងជើងនៃទីក្រុង Alta Verapaz ។

សាកសពមនុស្សម្នាក់ត្រូវបានគេរកឃើញនៅកន្លែងកើតហេតុ ហើយជនរងគ្រោះម្នាក់ទៀតបានស្លាប់បន្ទាប់ពីបញ្ជូនទៅមន្ទីរពេទ្យក្នុងតំបន់ ខណៈដែលអ្នកស្លាប់ម្នាក់ត្រូវបានគេស្គាល់ថាជាអ្នកបើកយន្ដហោះ ។

លោក Gerardo Martinez អ្នកនាំពាក្យឲ្យភ្នាក់ងារពន្លត់អគ្គិភ័យក្រុងបាននិយាយថា “យើងអាចជួយសង្គ្រោះមនុស្សម្នាក់ដែលនៅលើយន្ដហោះ ហើយត្រូវបានបញ្ជូនទៅវិទ្យាស្ថានសន្តិសុខសង្គមហ្គាតេម៉ាឡា ខណៈដែលអ្នកទីពីរ និងទីបីកំពុងស្ថិតក្នុងស្ថានភាពធ្ងន់ធ្ងរ ។

ទន្ទឹមនោះគ្រោះថ្នាក់នេះបានបង្ខំឲ្យមានការបិទផ្លូវឆ្លងកាត់នៅតំបន់ចំនួន ៩ នៃរដ្ឋធានីហ្គាតេម៉ាឡាជាកន្លែងដែលបំណែកនៃយន្តហោះបានធ្លាក់ ខណៈដែលមូលហេតុនៃការធ្លាក់នេះ និងមនុស្សនៅក្នុងយន្តហោះនៅមិនទាន់គេដឹងនៅឡើយទេ ៕

ប្រែសម្រួលដោយ ៖ ជីវ័ន្ត

ប្រភព ៖ XINHUA