ព័ត៌មានអន្ដរជាតិ

ណេតាន់យ៉ាហ៊ូ រងការរិះគន់ជុំទិសនៅក្រុមប្រឹក្សាសន្តិសុខ UN អំពីផែនការវាយយកហ្គាហ្សា

បានផុស

១០ ខែ មុន

នៅ

ថ្ងៃចន្ទ ១១ សីហា ២០២៥

ដោយ

Chheang

នាយករដ្ឋមន្ត្រីអ៊ីស្រាអែល បេនចាមីន ណេតាន់យ៉ាហ៊ូ បានចេញមុខការពារផែនការរដ្ឋាភិបាលរបស់គាត់ក្នុងការដណ្តើមកាន់កាប់តំបន់ហ្គាហ្សាទាំងស្រុង ដោយហៅវាថាជា «វិធីល្អបំផុត» ដើម្បីបញ្ចប់សង្រ្គាម និងដោះលែងចំណាប់ខ្មាំង ទោះបីជាក្រុមប្រឹក្សាសន្តិសុខអង្គការសហប្រជាជាតិ (UNSC) បានថ្កោលទោសទង្វើនេះថាជាការរំលោភលើច្បាប់អន្តរជាតិក៏ដោយ។

លោក បេនចាមីន ណេតាន់យ៉ាហ៊ូ (រូបថត៖ Reuters)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការចុះផ្សាយរបស់ BBC នៅថ្ងៃទី១១ខែសីហាឆ្នាំ២០២៥ លោក ណេតាន់យ៉ាហ៊ូ បានអះអាងថា ការវាយលុកនឹងដំណើរការ«យ៉ាងឆាប់រហ័ស» ហើយមានគោលបំណងរំដោះហ្គាហ្សាពីក្រុមសកម្មប្រយុទ្ធប៉ាឡេស្ទីនហាម៉ាស។ លោកបានបដិសេធការចោទប្រកាន់ដែលថា អ៊ីស្រាអែលកំពុងបង្អត់អាហារប្រជាជនប៉ាឡេស្ទីន ហើយលោកថែមទាំងចោទប្រកាន់ទៅវិញថា ក្រុមហាម៉ាសនោះទេដែលមានចេតនាបង្អត់អាហារចំណាប់ខ្មាំងអ៊ីស្រាអែល។

ទោះបីជាយ៉ាងណាក៏ដោយ នៅក្នុងកិច្ចប្រជុំបន្ទាន់របស់ក្រុមប្រឹក្សាសន្តិសុខអង្គការសហប្រជាជាតិ ប្រទេសជាច្រើនរួមទាំងចក្រភពអង់គ្លេស បារាំង ដាណឺម៉ាក ក្រិក និងស្លូវេនី បានព្រមានថា ផែនការរបស់អ៊ីស្រាអែលមានហានិភ័យខ្ពស់ខ្លាំង ធ្វើឲ្យវិបត្តិមនុស្សធម៌កាន់តែអាក្រក់ និងគ្រោះថ្នាក់ដល់ចំណាប់ខ្មាំង។

មន្ត្រីអង្គការសហប្រជាជាតិ បានបង្កើនការព្រមានអំពីគ្រោះមហន្តរាយដែលកំពុងកើតឡើង ដោយជំនួយការអគ្គលេខាធិការ UN លោក Miroslav Jenca បាននិយាយថា ការវាយលុកអាចបង្កឲ្យមានការផ្លាស់ទីលំនៅ និងការបំផ្លិចបំផ្លាញបន្ថែមទៀត។ ចំណែកឯលោក Ramesh Rajasingham មកពីការិយាល័យមនុស្សធម៌របស់អង្គការសហប្រជាជាតិ បានប្រកាសថា វិបត្តិភាពស្រេកឃ្លានរបស់ហ្គាហ្សា បានក្លាយជា«គ្រោះទុរភិក្ស»ទៅហើយ។

យ៉ាងណាមិញ លោក ណេតាន់យ៉ាហ៊ូ បានគូសបញ្ជាក់អំពីផែនការជំនួយចំំនួនបីសម្រាប់ហ្គាហ្សា ដូចជា ការរៀបចំច្រករបៀងសុវត្ថិភាពសម្រាប់ការចែកចាយជំនួយមនុស្សធម៌ ក៏ដូចជាការទម្លាក់ជំនួយតាមយន្តហោះបន្ថែមទៀតដោយកងកម្លាំងអ៊ីស្រាអែល និងដៃគូផ្សេងទៀត។ ប៉ុន្តែជាថ្មីម្ដងទៀតលោកបានស្តីបន្ទោសក្រុមហាម៉ាសចំពោះការលួចយកជំនួយ និងបណ្តាលឲ្យជនស៊ីវិលស្លាប់។ មេដឹកនាំអ៊ីស្រាអែល ក៏បានរិះគន់ប្រព័ន្ធផ្សព្វផ្សាយអន្តរជាតិចំពោះការផ្សព្វផ្សាយរូបភាព«ក្លែងក្លាយ» នៃកុមារដែលខ្វះអាហារូបត្ថម្ភ ទោះបីជាអ៊ីស្រាអែលដាក់កម្រិតអ្នកកាសែតបរទេសមិនឲ្យចូលទៅក្នុងតំបន់ហ្គាហ្សាក៏ដោយ។

ទន្ទឹមនោះ សហរដ្ឋអាមេរិកដែលគាំទ្រអ៊ីស្រាអែល បានចោទក្រុមហាម៉ាសថាបានអូសបន្លាយសង្រ្គាម និងច្រានចោលការអះអាងអំពីអំពើប្រល័យពូជសាសន៍ថាជា«រឿងមិនពិត»។ លោក ណេតាន់យ៉ាហ៊ូ បានបង្ហើបថា លោកធ្លាប់បានពិភាក្សាអំពីផែនការមួយនេះជាមួយលោកប្រធានាធិបតីអាមេរិក ដូណាល់ ត្រាំ រួចរាល់ហើយ។

បើក្រឡេកមើលនៅក្នុងប្រទេសអ៊ីស្រាអែលឯណោះវិញ ប្រជាជនរាប់ម៉ឺននាក់បានចេញតវ៉ាប្រឆាំងនឹងផែនការរបស់លោក ណេតាន់យ៉ាហ៊ូ ដោយភ័យខ្លាចថា ការវាយលុកនេះនឹងធ្វើឲ្យមានហានិភ័យដល់ចំណាប់ខ្មាំង។

សូមជម្រាបថា ក្រសួងសុខាភិបាលដែលគ្រប់គ្រងដោយក្រុមហាម៉ាស បានរាយការណ៍ថាមានអ្នកស្លាប់ជាជនជាតិប៉ាឡេស្ទីនជាង ៦១ ០០០នាក់ ក្នុងនោះ ២១៧នាក់ត្រូវដាច់ពោះស្លាប់ ចាប់តាំងពីសង្គ្រាមបានចាប់ផ្តើម។ យុទ្ធនាការយោធារបស់អ៊ីស្រាអែល បានធ្វើឡើងបន្ទាប់ពីការវាយប្រហារថ្ងៃទី៧ខែតុលាឆ្នាំ២០២៣ របស់ក្រុមហាម៉ាស ដែលបានសម្លាប់ជនជាតិអ៊ីស្រាអែល ១ ២០០នាក់ និងចាប់ចំណាប់ខ្មាំង ២៥១នាក់៕

ដោយ៖ ឈាង

ព័ត៌មានអន្ដរជាតិ២ ថ្ងៃ ago

អស់សង្ឃឹមហើយ ក្នុងការសង្គ្រោះជីវិត បុរស ២នាក់ទៀត ដែលជាប់ក្នុងរូងភ្នំ នៅឡាវ

សេចក្ដីជូនដំណឹង៣ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា