ទេសចរទាមទាររកសុវត្ថិភាព ក្រោយហេតុការណ៍បាញ់ប្រហារនៅប៉ាតាយ៉ា ប្រទេសថៃ

យោងតាមការចេញផ្សាយរបស់សារព័ត៌មាន Pattaya Mail ការបាញ់ប្រហារមួយដ៏រន្ធត់កាលពីព្រឹកព្រលឹមថ្ងៃទី១៣ខែសីហានៅឆ្នេរ Jomtien បានបង្កើនការភ័យខ្លាចរបស់ភ្ញៀវទេសចរ និងបង្កឱ្យមានការខឹងសម្បារជាសាធារណៈចំពោះសុវត្ថិភាពនៅប៉ាតាយ៉ា ស្របពេលប្រទេសនេះកំពុងជួបវិបត្តិសុវត្ថិភាពទេសចរស្រាប់ទៅហើយ។

ហេតុការណ៍នេះបានកើតឡើងនៅវេលាម៉ោង ៤ និង ០៦ នាទីទៀបភ្លឺ នៅជិតផ្សារដ៏មមាញឹកមួយ រវាងក្រុមក្មេងទំនើងបាញ់ប្រហារគ្នាបណ្ដាលឲ្យទេសចររត់គេចខ្លួនដោយភិតភ័យ។ ហេតុការណ៍នេះមិនបណ្ដាលឲ្យមានអ្នកស្លាប់ឬរបួសនោះទេ ប៉ុន្តែទេសចរដែលស្ថិតនៅកន្លែងកើតហេតុនិងស្ថិតក្នុងតំបន់នេះកំពុងព្រួយបារម្ភអំពីសុវត្ថិភាពរបស់ពួកគេ។

ប៉ូលិស​បាន​កំណត់​អត្តសញ្ញាណ និង​ចាប់​ខ្លួន​ជន​សង្ស័យ​​ជា​ខ្មាន់​កាំភ្លើងមាន​អាយុត្រឹមតែ ១៦ ឆ្នាំ និង​បក្សពួក​អាយុ ១៥ ឆ្នាំ ដោយ​បាន​ដក​ហូត​បាន​កាំភ្លើង​ខ្លី Glock 17 មួយ​ដើម ដែលប្រើក្នុងការវាយ​ប្រហារ ខណៈជម្លោះ​នេះ​កើត​ចេញ​ពី​ជម្លោះ​ចាស់​មួយ​បាន​កើត​ឡើង​បន្ទាប់​ពី​ជន​រង​គ្រោះ​បាន​ជេរ​ប្រមាថ​មិត្ត​ភក្តិ​របស់​ជនសង្ស័យ​តាម​បណ្តាញ​សង្គម។

ប្រជាពលរដ្ឋ និងអ្នកទេសចរបរទេស បានសម្តែងការខកចិត្តចំពោះការកើនឡើងនៃអំពើហិង្សារបស់យុវជនក្នុងប្រទេសថៃ ដោយអំពាវនាវឱ្យមានច្បាប់តឹងរ៉ឹង ការអនុវត្តតឹងរ៉ឹង និងការដាក់ទណ្ឌកម្មតឹងរ៉ឹង។ មនុស្សជាច្រើនបានព្រមានថាឧបទ្ទវហេតុបែបនេះអាចធ្វើឱ្យខូចមុខមាត់របស់ប៉ាតាយ៉ាដែលជាគោលដៅទេសចរណ៍ពេញនិយម និងអាចប៉ះពាល់ដល់សេដ្ឋកិច្ចរបស់ប្រទេសថៃដែលកំពុងជួបការលំបាករួចទៅហើយ។

គួរបញ្ជាក់នៅប៉ាតាយ៉ាប្រទេសថៃមួយរយៈចុងក្រោយនេះតែងតែមានអំពើហិង្សាដូចជាការរកឃើញគ្រាប់បែក​ បង្កប់នៅតាមតំបន់ឆ្នេរ អំពើហិង្សាទៅលើភ្ញៀវទេសចរ និងវិបត្តិអ្នកគ្មានផ្ទះសម្បែងរស់ពាសពេញដងផ្លូវជាដើម។ បញ្ហាទាំងនេះកាន់តែបង្កើនការព្រួយបារម្ភអំពីសុវត្ថិភាពរបស់អ្នកទេសចរ បូករួមជាមួយហេតុការណ៍ទេសចរម៉ាឡេស៊ីពីរនាក់រងគ្រោះពីការដុតរបស់បុរសម្នាក់នៅទីក្រុងបាងកក ធ្វើឲ្យទេសចរខ្លាចរអាការមកដើរកម្រាន្តនៅប្រទេសថៃកាន់តែច្រើន៕

អទ្ថបទ៖ ប៊ុន សុភាព