មេទ័ពអង់គ្លេសព្រមានពីសង្គ្រាមលោកលើកទី៣

មេបញ្ជាការយោធាជាន់ខ្ពស់អង់គ្លេសបានព្រមានថា វីរុសកូរ៉ូណាបានធ្វើឲ្យការរំពឹងទុកនៃសង្គ្រាមលោកលើកទី៣ក្លាយជាហានិភ័យពិត។

លោកឧត្តមសេនីយ៍ Sir Nick Carter បាននិយាយថា ដោយសារតែភាពមិនច្បាស់លាស់ដែលបង្កឡើងដោយជំងឺកូវីដ១៩ក្នុងសតវត្សរ៍ចុងក្រោយនេះ ចក្រភពអង់គ្លេសនិងពិភពលោកទាំងមូលចាំបាច់ត្រូវរៀនសូត្រពីប្រវត្តិសាស្រ្តនិងភាពអគតិជាអន្ដរជាតិដែលនាំឲ្យមានសង្គ្រាមលោកលើកមុនៗ។

លោក Sir Nick បានធ្វើអត្ថាធិប្បាយបែបនេះនៅពេលត្រូវបានសួរដោយ Sky News ថាតើលោកខ្លាចដែរឬទេថាវិបត្តិសេដ្ឋកិច្ចពិភពលោកដែលបង្កឡើងដោយវីរុសកូរ៉ូណាអាចនាំឲ្យមានសង្គ្រាម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានប្រាប់ពិធីការិនី Sophy Ridge ក្នុងកម្មវិធីថ្ងៃអាទិត្យថា មានការព្រួយបារម្ភថា ការកើនឡើងនៃជម្លោះក្នុងតំបន់ដែលកំពុងរាលដាលពាសពេញពិភពលោកអាចក្លាយទៅជា “សង្គ្រាមពេញទំហឹង” ដែលឆ្លុះបញ្ចាំងពីការឈានទៅរកសង្គ្រាមពិភពលោកទាំង២ក្នុងសតវត្សរ៍ទី២០នៅពេលដែលសម្ព័ន្ធភាពរវាងបណ្តាប្រទេសនានានាំឲ្យមានការបង្ហូរឈាមគ្នាច្រើនឆ្នាំ។

មន្ត្រីជាន់ខ្ពស់រូបនេះបានអះអាងថា ស្របពេលពិភពលោកកំពុងក្លាយជាកន្លែងដែលគ្មានភាពប្រាកដប្រជានិងគួរឲ្យព្រួយបារម្ភអំឡុងពេលមានជំងឺរាតត្បាត មានលទ្ធភាពដែលអ្នកអាចមើលឃើញពីការកើនឡើងភាពតានតឹងឈានដល់ការគណនាខុស។

លោក Sir Nick បន្តថា “យើងត្រូវចាំថា ប្រវត្តិសាស្រ្តប្រហែលជាមិនកើតឡើងម្តងទៀតទេប៉ុន្តែវាមានបញ្ហារបស់វាហើយប្រសិនបើអ្នកក្រឡេកមើលទៅសតវត្សរ៍មុន មុនពេលសង្គ្រាមលោកទាំងពីរលើកកើតឡើង ខ្ញុំគិតថា វាមិនអាចជំទាស់បានទេដែលថា ជម្លោះដែលនាំឲ្យមានការវិនិច្ឆ័យខុសនៅទីបំផុតនាំឲ្យមានសង្គ្រាម។

នៅពេលសួរថាតើលោកកំពុងនិយាយថាមានការគំរាមកំហែងពិតប្រាកដនៃសង្គ្រាមលោកលើកទី៣មែនឬទេ គាត់ឆ្លើយថា “ខ្ញុំកំពុងនិយាយថា វាជាហានិភ័យហើយយើងត្រូវដឹងអំពីហានិភ័យទាំងនោះ”៕

ប្រែសម្រួលដោយ៖ Vann Vann

ប្រភព៖ Metro