ព័ត៌មានអន្ដរជាតិ

ផែថងថាន នឹងមិនចូលស្តាប់សាលក្រមក្នុងតុលាការ នៅថ្ងៃសុក្រនេះទេ

បានផុស

៣ ខែ មុន

នៅ

ថ្ងៃព្រហស្បតិ៍ ២៨ សីហា ២០២៥

ដោយ

តាមការផ្សាយរបស់ Thai PBS នៅថ្ងៃព្រហស្បតិ៍ទី២៨ខែសីហាឆ្នាំ២០២៥ លោក Somkid Chuekong អគ្គលេខាធិការរង ទទួលបន្ទុកកិច្ចការនយោបាយរបស់នាយករដ្ឋមន្ត្រីថៃ បានបញ្ជាក់យ៉ាងច្បាស់ថា លោកស្រី ផែថងថាន ស៊ីណាវ៉ាត្រ នឹងមិនចូលតុលាការធម្មនុញ្ញដោយផ្ទាល់ ដើម្បីស្តាប់សាលក្រមសម្រេចពីជោគវាសនារបស់ខ្លួនក្នុងនាមជានាយករដ្ឋមន្ត្រីនៅថ្ងៃសុក្រនេះឡើយ។

លោកស្រី ផែថងថាន ស៊ីណាវ៉ាត្រ (រូបថត៖ Reuters)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ផ្ទុយទៅវិញ នឹងមានមនុស្សម្នាក់តំណាងឲ្យលោកស្រីនៅក្នុងតុលាការ ហើយ ផែថងថាន នឹងនៅជាមួយគណៈរដ្ឋមន្ត្រីព្រមទាំងសមាជិកបក្សភឿថៃក្នុងវិមានរដ្ឋាភិបាល ដើម្បីតាមដានសាលក្រមនេះ។

នៅថ្ងៃទី២៩ខែសីហាឆ្នាំ២០២៥ តុលាការធម្មនុញ្ញថៃ នឹងប្រកាសសាលក្រមលើសំណុំរឿងរបស់លោកស្រី ពាក់ព័ន្ធការបែកធ្លាយសារសំឡេងតាមទូរស័ព្ទជាមួយសម្ដេចតេជោ ហ៊ុន សែន ប្រធានព្រឹទ្ធសភាកម្ពុជា ដែលបង្កឲ្យមានភាពចលាចលផ្នែកនយោបាយពេញប្រទេសថៃ។

យ៉ាងណា តាមរយៈវីដេអូក្នុងកិច្ចប្រជុំគណៈរដ្ឋមន្ត្រីប្រចាំសប្តាហ៍កាលពីថ្ងៃអង្គារ, ផែថងថាន បានបង្ហាញជំនឿចិត្តយ៉ាងមុតមាំថា លោកស្រីនឹងត្រឡប់មកធ្វើការក្នុងនាមជាយករដ្ឋមន្ត្រីវិញ ក្រោយការសម្រេចរបស់តុលាការ។

សូមជម្រាបជាថ្មី ផែថងថាន ត្រូវបានព្យួរពីតួនាទីនៅថ្ងៃទី១ខែកក្កដាឆ្នាំ២០២៥ ដោយរង់ចាំការស៊ើបអង្កេតរបស់តុលាការធម្មនុញ្ញ ហើយក្រោយមកលោកស្រី បាត់វត្តមាននៅវិមានរដ្ឋាភិបាលអស់រយៈពេល៣សប្តាហ៍ជាប់ៗគ្នា។

ដ្បិតត្រូវបានព្យួរតួនាទី ប៉ុន្តែលោកស្រី ផែថងថាន នៅតែស្ថិតក្នុងតំណែងគណៈរដ្ឋមន្ត្រីក្នុងនាមជារដ្ឋមន្ត្រីក្រសួងវប្បធម៌ដដែល ខណៈបច្ចុប្បន្នឧបនាយករដ្ឋមន្ត្រី ភូមិថាម វិឆាយ៉ាឆៃ កំពុងកាន់តំណែងជានាយករដ្ឋមន្ត្រីស្តីទី៕

អត្ថបទ៖ សុខ សុវណ្ណ

ចុចអាន៖ ក្រោយថាក់ស៊ីន រួចទោសប្រមាថស្តេច, ពេលនេះ ផែថងថាន ក៏ជឿថា ខ្លួនអាចវិលមកកាន់តំណែងនាយករដ្ឋមន្ត្រី វិញដែរ