ថៃ ​ប្រកាស​អាសន្ន​ភ្លៀង​ធ្លាក់ខ្លាំង ព្រោះរងឥទ្ធិពលពីព្យុះនៅវៀតណាម

យោងតាមការចេញផ្សាយរបស់សារព័ត៌មាន Khaosod ថៃនឹងរងឥទ្ធិពលភ្លៀងធ្លាក់ខ្លាំងស្ទើពេញប្រទេសដោយសារ ខ្យល់ព្យុះត្រូពិចលើសមុទ្រចិនខាងត្បូងភាគកណ្តាលត្រូវបានគេព្យាករណ៍ថានឹងកើនឡើងជាព្យុះត្រូពិច បោកបក់ក្នុងខេត្ត Quang Binh របស់ប្រទេសវៀតណាមនៅថ្ងៃទី ៣០ ខែសីហា ឆ្នាំ ២០២៥ ។

ព្យុះនេះមានកម្លាំងខ្យល់ប្រហែល ៥៥ គីឡូម៉ែត្រក្នុងមួយម៉ោង ហើយកំពុងធ្វើដំណើរទៅទិសខាងលិច។ បន្ទាប់ពីវាយលុកលើដីក្នុងប្រទេសវៀតណាម វានឹងកាន់តែខ្សោយ រួចរំកិលចូលទៅក្នុងភាគខាងជើងប្រទេសឡាវ ហើយបន្ទាប់មកប្រែទៅជាប្រព័ន្ធសម្ពាធទាបដែលនឹងនាំមកនូវភ្លៀងធ្លាក់ដល់ប្រទេសថៃ។

ចាប់ពីថ្ងៃទី ៣០ ខែសីហា ដល់ថ្ងៃទី ១ ខែកញ្ញា ប្រទេសថៃត្រូវបានគេរំពឹងថានឹងមានភ្លៀងធ្លាក់រាយប៉ាយ រួមទាំងភ្លៀងធ្លាក់ខ្លាំង និងខ្យល់បក់ខ្លាំង។ ភាគឦសាននឹងត្រូវវាយលុកមុនគេ ដោយខេត្តមួយចំនួនដូចជា Nakhon Phanom, Sakon Nakhon, Mukdahan, Bueng Kan និង Khon Kaen ប្រឈមនឹងហានិភ័យខ្ពស់បំផុត។ ត្រឹមថ្ងៃទី ៣១ ខែសីហា ឥទ្ធិពលរបស់ព្យុះនឹងរាលដាលដល់តំបន់ភាគខាងជើង និងកណ្តាលខាងលើ រួមមានខេត្ត Nan, Phrae, Uttaradit, Phitsanulok, Chiang Mai, Lampang និង Nakhon Sawan។

អាជ្ញាធរ​ថៃបាន​ចេញ​ការ​ព្រមាន​ចំពោះ​គ្រោះ​ទឹក​ជំនន់​ភ្លាមៗ បំណាក់​ដី និង​ទឹក​ជំនន់​នៅ​តំបន់​ជើងភ្នំ ទន្លេ និង​តំបន់​ទំនាប។ ប្រជាពលរដ្ឋ​ថៃត្រូវ​ប្រុង​ប្រយ័ត្ន និង​ត្រៀម​ខ្លួន​សម្រាប់​គ្រោះ​ថ្នាក់​ដែល​អាច​កើត​មាន ៕

អត្ថបទ៖ ប៊ុន សុភាព