វិធានការការពារ​ប្រជាពលរដ្ឋមិន​ឱ្យឆ្លងជំងឺកូវីដ-១៩ នៅពេលទៅចាក់វ៉ាក់សាំង

ក្រសួងសុខាភិបាលនៃព្រះរាជាណាចក្រកម្ពុជា​ បានរៀបចំយុទ្ធនាការចាក់វ៉ាក់សាំងការពារកូវីដ-១៩ជូនប្រជាពលរដ្ឋ ឬបុគ្គលប្រឈមហានិភ័យឆ្លងខ្ពស់បានជាច្រើននាក់មកហើយ។ ដំណើរការនៃការចាក់វ៉ាក់សាំងបានប្រព្រឹត្តទៅរលូនផងដែរ នៅទីតាំងនានាក្នុងរាជធានី និងតាមបណ្ដាខេត្ត។

ដោយសារ​តែ​ភ្លាមៗ​ ពុំមាន​វ៉ាក់សាំង​ក្នុងចំនួនដូស​គ្រប់គ្រាន់ជូនប្រជាជនទាំងអស់ រដ្ឋាភិបាល​គ្រោង​នឹង​ចាក់វ៉ាក់សាំងជាដំណាក់កាលៗ សម្រាប់ក្រុមអាទិភាព​​គឺជា​ក្រុមដែល​ត្រូវ​ទទួលបាន​ការ​ចាក់វ៉ាក់សាំង​មុនគេ។

យ៉ាងណាមិញ ក្នុងពេលថ្មីៗនេះ ក្រសួងបានរកឃើញអ្នកជំងឺឆ្លងកូវីដ-១៩ កំលុងទៅទទួលវ៉ាក់សាំង។ ដូច្នេះ ​វិធានការសុខភាពនៅកន្លែង​ចាក់វ៉ាក់សាំងកូវីដ-១៩ ត្រូវបានរឹតបន្តឹងទ្វេរឡើង ដើម្បីការពារសុវត្ថិភាពគ្រប់គ្នាទាំងបុគ្គលិកសុខាភិបាល ទាំងប្រជាពលរដ្ឋ។

ការចាក់វ៉ាក់សាំង​នឹងធ្វើឡើងដោយគោរព​តាមគោលការណ៍សុវត្ថិភាព​យ៉ាង​តឹងរឹង នៅតាម​ទីតាំង​ចាក់វ៉ាក់សាំង​ ដោយសមាជិកទាំងអស់របស់​ក្រុម​ចាក់វ៉ាក់សាំងទាំងពេទ្យ ទាំងអ្នកទទួលវ៉ាក់សាំង នឹង​ទទួលបានម៉ាស អាល់កុល​សម្រាប់លាងដៃ និង​ស្រោម​ដៃការពា​រខ្លួន ព្រមទាំងប័ណ្ណលេខរៀង។

ក្នុងនោះមុនពេល​ចូលទៅដល់​ទីតាំង​ចាក់វ៉ាក់សាំង នឹង​មានការ​វាស់សីតុណ្ហភាពនិងពិនិត្យ​បុគ្គលគ្រប់រូបដើម្បីធានា​ថា ពួកគេ​ពិតជា​បានប្រើម៉ាស ក៏ដូចជា​លាងដៃជាមួយទឹកអាល់កុលឬជែល។ ក្រុម​ចាក់វ៉ាក់សាំង​នឹង​រៀបចំ​ឱ្យ​បុគ្គលដែលទៅចាក់វ៉ាក់សាំង​អង្គុយឃ្លាត​គ្នា​យ៉ាង​ហោចណាស់ ១.៥ ម៉ែត្រ ខណៈកំពុងរង់ចាំ មុនដល់វេនរបស់ពួកគេ៕

អត្ថបទ៖ សន្យា

ប្រភព៖ UNICEF

ចុចអាន៖ អនុវត្ត​ទាំងអស់​គ្នា! ការ​បន្ត​ពាក់​ម៉ាស ឬ​របាំ​ងមុខ​នៅ​ទី​សាធារណៈ ​​អាច​ជួយ​កាត់បន្ថយ​ហានិភ័យ​ឆ្លង​កូវីដ

ចុចអាន៖ ការពារជីវិត! ទោះបីនៅក្មេង​មានសុខភាព​រឹងមាំ ក៏គ្រប់គ្នាត្រូវទៅចាក់វ៉ាក់សាំង​កូវីដ-១៩