មកស្គាល់ប្រវត្តិស្វាបាប៊ូន ដែលធ្វើការលើផ្លូវរថភ្លើងនៅអាហ្វ្រិក មិនធ្លាប់ខុសសូម្បីម្ដង

ស្វាបាប៊ូនមួយក្បាលបានធ្វើការជាអ្នកផ្ដល់សញ្ញារថភ្លើងនៅអាហ្វ្រិកខាងត្បូងអស់រយៈពេល ៩ ឆ្នាំ ហើយមិនដែរបង្កគ្រោះថ្នាក់ ឬសាងកំហុសឆ្គងសូម្បីម្ដងក្នុងការងារ ។ Jack គឺជាស្វាបាប៊ូនដែលលោក James Jumper ទិញកាលពីឆ្នាំ ១៨៨១ គាត់បង្រៀនវាឲ្យចេះរុញកៅអីពិការដែលខ្លួនអង្គុយ និងដំណើរការសញ្ញាផ្លូវដែកក្រោមការត្រួតពិនិត្យរបស់គាត់ ។

James ជាអ្នកធ្វើការនៅស្ថានីយ​រថភ្លើង Cape Town គាត់មានទម្លាប់អាក្រក់មួយគឺហក់ឆ្លងផ្លូវរថភ្លើងជាការកម្សាន្តទោះមានរថភ្លើងឆ្លងកាត់ក៏ដោយដែលជាហេតុធ្វើឲ្យ James ពិការជើងទាំងសងខាងបែបនេះ ។ ដំបូងឡើយ James បានជួប Jack នៅផ្សារ ខណៈវាកំពុងបររទេះគោ លោកកោតសរសើរសមត្ថភាពរបស់ស្វានោះជាខ្លាំងទើបគាត់សម្រេចចិត្តទិញវាយកមកធ្វើជាជំនួយការ ។ បាប៊ូន Jack បានរៀនចេះរុញកៅអីពិការរបស់ម្ចាស់ ផ្ដល់សញ្ញាឲ្យរថភ្លើង និងហុចសោឲ្យបុគ្គលិកលើរថភ្លើងជាដើម ។

ដោយសារតែភាពអស្ចារ្យរបស់ Jack ប្រជាជនតំបន់នោះនាំគ្នាមកមើលជាហូរហែរហូតមានម្នាក់ប្ដឹងទៅអាជ្ញាធរព្រោះខ្លាចបង្កគ្រោះថ្នាក់ដល់អ្នកដំណើរ ។ អ្នកគ្រប់គ្រងស្ថានីយរថភ្លើងបានបណ្ដេញពួកគេចេញតាមការស្នើសុំ ប៉ុន្តែ James ព្យាយាមអង្វរសុំការងារមកវិញដោយអះអាងពីសមត្ថភាពរបស់ស្វាបាប៊ូន ។

បន្ទាប់ពីឃើញសមត្ថភាពស្វា Jack ហើយ អ្នកគ្រប់គ្រងយល់ព្រមប្រគល់ការងារឲ្យ James វិញថែមទាំងតែងតាំង Jack ជាបុគ្គលិកពេញសិទ្ធទៀតផង ។ ចាប់ពីពេលនោះមក Jack ទទួលបានប្រាក់កម្រៃ ២០ សេនក្នុងមួយថ្ងៃ និងស្រាបៀកន្លះដបរៀងរាល់សប្ដាហ៍អស់រយៈពេល ៩ ឆ្នាំនៃការងារ ។

៩ ឆ្នាំកន្លងផុតទៅក្នុងឆ្នាំ ១៩៩០ Jack បានស្លាប់ដោយសារជំងឺរបេង ហើយលលាដ៍ក្បាលរបស់វាត្រូវរក្សាទុកនៅសារមន្ទីរ Albany ក្នុង Grahamstown នៃអាហ្វ្រិកខាងត្បូងមកទល់សព្វថ្ងៃ ៕

ប្រភព ៖ ATI

ចុចអាន ៖ មកស្គាល់ទីតាំងកង្កែបធ្លាក់ពីលើមេឃ ៥ កន្លែងក្នុងប្រវត្តិសាស្ត្រពិភពលោក