ស្នេហាដើរដល់ផ្លូវទាល់ហើយបើមានសញ្ញាទាំងនេះ

ស្រឡាញ់គ្នាសុខៗ គេចាប់ផ្ដើមប្លែក វាជាសញ្ញាមិនល្អប៉ុន្មានទេសម្រាប់ស្នេហារវាងយើងនឹងគេ។ យ៉ាងណាពេលខ្លះយើងនៅតែមិនច្បាស់ក្នុងចិត្តពីទំនាក់ទំនងនោះនៅឡើយ ដូច្នេះអាចយកសញ្ញា ៤ យ៉ាងនេះមកវាស់ដើម្បីឲ្យដឹងថាគេអស់ចិត្តនឹងយើងឬអត់?

គេផ្លាស់ប្តូរទម្លាប់ផ្ញើសារ

មនុស្សដែលធ្លាប់តែផ្ញើសារវែងៗរកគ្នារាល់ថ្ងៃ ក៏ប្ដូរមកឆ្លើយដោយពាក្យពីរបីម៉ាត់ ឬពេលខ្លះទុកសារចោលមិនខ្ចីឆ្លើយនឹងយើង នោះជាសញ្ញាប្រាប់ថាអារម្មណ៍របស់គេចំពោះយើងកំពុងថមថយ គេធុញទ្រាន់ ហើយកំពុងចង់សុំបញ្ចប់ទំនាក់ទំនងមួយនេះ។

គេមិនសួរនាំច្រើនពីយើង

មនុស្សដែលនឹកដល់យើង គិតគូរដល់យើង គេពិតជាចង់ដឹងសកម្មភាពប្រចាំថ្ងៃរបស់យើង។ គេចាប់អារម្មណ៍ចំពោះគំនិត អារម្មណ៍ប្រចាំថ្ងៃ និងចង់ស្តាប់ពីអ្វីដែលកំពុងកើតឡើងចំពោះយើង។ ផ្ទុយទៅវិញ បើគេមិនសួរនាំពីសុខទុក្ខយើង ច្បាស់ណាស់ថាគេគ្មានសល់មនោសញ្ចេតនាអ្វីជាមួយយើងទៀតទេ ព្រោះមនុស្សស្រឡាញ់គ្នារមែងបារម្ភនិងចង់ដឹងសុខទុក្ខគ្នា។

គេដោះសារថារវល់ជានិច្ច

គេរវល់ជានិច្ច មិនអាចរកពេលវេលាសម្រាប់យើងសូម្បីមួយអាទិត្យម្ដង ច្បាស់ជាគេមិនចង់ជួបយើងឡើយ។ មនុស្សស្រឡាញ់គ្នាចង់ជួបគ្នា ចង់នៅក្បែរគ្នាមិនចេះនឿយណាយទេ ប៉ុន្តែគេបែរជាគ្មានពេលជួបយើងបន្តិចសោះ តើនេះមិនមែនបញ្ជាក់ថាគេឈប់ស្រឡាញ់យើងទៀតមែន?

គេធ្វើដូចមិនស្គាល់យើងនៅទីសាធារណៈ

មានទេ មនុស្សស្រឡាញ់គ្នា បែរធ្វើមិនស្គាល់ពេលជួបចៃដន្យនៅខាងក្រៅ? ប្រសិនបើ បានជួបគេនៅខាងក្រៅដោយគ្មានការព្រាងទុក គេស្រាប់តែមានការភ្ញាក់ផ្អើល ហើយគេចមុខចេញនោះ មិនចាំបាច់សួរគេទេថា នៅស្រឡាញ់គ្នាឬអត់? ចម្លើយយើងដឹងខ្លួនឯងហើយ៕

ប្រែសម្រួល៖ សន្យា

ប្រភព៖ Useful Gen

ចុចអាន៖ ចំណងអាពាហ៍ពិពាហ៍​ជោគជ័យដែរឬអត់អាចសម្គាល់ដោយទង្វើទាំងនេះ

ចុចអាន៖ ហេតុអ្វីមនុស្សស្រីនិយមរកដៃគូជីវិតមានអាយុច្រើនជាងខ្លួន?