នគរបាលទាំង១៤ខណ្ឌ បន្តបំពេញបែបបទផ្តល់អត្តសញ្ញាណប័ណ្ណសញ្ជាតិខ្មែរ នឹងសៀវភៅគ្រួសារ ជូនពលរដ្ឋ

នគរបាលរាជធានីភ្នំពេញ បន្តការងារផ្តល់អត្តសញ្ញាប័ណ្ណថ្មី នឹងផ្តល់ឡើងវិញ ជូនពលរដ្ឋ រួមសៀវភៅគ្រួសារ នឹង សៀវភៅស្នាក់នៅ ដើម្បីផ្តល់ភាពងាយស្រួល លើការរស់នៅ។

យោងតាមការបង្ហោះលើផេកផ្លូវការរបស់ ស្នងការដ្ឋាននគរបាលរាជធានីភ្នំពេញ បានបញ្ជាក់ថា ដោយអនុវត្តតាមអនុសាសន៍ដឹកនាំដ៏ខ្ពង់ខ្ពស់របស់ ឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ និងអនុវត្តតាមទិសដៅការងាររបស់ឯកឧត្តម ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ នៅតាមបណ្តាអធិការដ្ឋាននគរបាលខណ្ឌទាំង១៤ បានពង្រឹងអនុវត្តភារកិច្ចការងារបម្រើសេវាសាធារណៈជូនប្រជាពលរដ្ឋ ជាពិសេសសេវាលើការងារផ្តល់អត្តសញ្ញាណប័ណ្ណសញ្ជាតិខ្មែរ សៀវភៅគ្រួសារ(ក៤) សៀវភៅស្នាក់នៅ(ក២) ជូនប្រជាពលរដ្ឋ នៅក្នុងភូមិសាស្រ្តទូទាំង១៤ខណ្ឌ នៃរាជធានីភ្នំពេញ ដែលមានគោលបំណងឱ្យប្រជាពលរដ្ឋទទួលបានសិទ្ធិស្របច្បាប់ និងងាយស្រួលក្នុងការធ្វើប្រតិបត្តិការផ្សេងៗ។

ក្នុងនោះ ការផ្តល់សេវាធ្វើអត្តសញ្ញាណប័ណ្ណ គិតត្រឹមថ្ងៃទី២១ ខែធ្នូ ឆ្នាំ២០២៥ សរុបចំនួន១៥៩នាក់ (ផ្តល់ឡើងវិញ ចំនួន១៤៧នាក់ និងផ្តល់ថ្មីចំនួន១២នាក់ , ផ្តល់សៀវភៅស្នាក់នៅថ្មី   ៥គ្រួសារ និងទុតិយតាសៀវភៅស្នាក់នៅ   ១១គ្រួសារ, ផ្តល់សៀវភៅគ្រួសារថ្មី   ៧គ្រួសារ ផងដែរ។

ជាមួយគ្នានោះ ប្រជាពលរដ្ឋ ក្នុងមូលដ្ឋាន បានសាទរចំពោះការយកចិត្តទុកដាក់របស់កម្លាំងនគរបាល ដែលមិនត្រឹមតែធានាសន្តិសុខទេ ប៉ុន្តែថែមទាំងបង្ហាញភាពខិតខំក្នុងការចូលរួមជាមួយសហគមន៍ ដើម្បីបង្កើនសុវត្ថិភាព និងប្រជាជនទាំងមូលក្នុងមូលដ្ឋាន៕ អត្ថបទ ៖ រដ្ឋា