ប៉ូលីសស្រុកគីរីវង់ចុះប្រមូលស្ត្រីល្មើសបម្រាមជុំគ្នាលេងល្បែង

ខេត្តតាកែវ៖ ស្ត្រី៣នាក់ត្រូវបានប៉ូលីសនៃអធិការដ្ឋាននគរបាលស្រុកគីរីវង់ចុះឃាត់ខ្លួនយកមកអប់រំបន្ទាប់ពីបានជួបជុំគ្នាលេងល្បែងស៊ីសងបំពានបម្រាមអាជ្ញាធរ។

ក្រោមការចង្អុលបង្ហាញពីសំណាក់លោកឧត្តមសេនីយ៍ទោ សុខ សំណាង ស្នងការនគរបាលខេត្តតាកែវ លោកវរសេនីយ៍ឯក យុគ សារ៉ាត់ អធិការនគរបាលស្រុក បានដឹកនាំកម្លាំងអន្តរាគមន៍ចុះបង្ក្រាបល្បែងស៊ីសង០១កន្លែង (បៀរស៊ីគូរ) ស្ថិតនៅភូមិជ្រោយ ឃុំព្រះបាទជាន់ជុំ ស្រុកគីរីវង់ ខេត្តតាកែវ។

ក្នុងនោះសមត្ថកិច្ចបានឃាត់ខ្លួនអ្នកលេងបៀរជាស្រ្តីមានគ្នា៣នាក់ ដែល មានឈ្មោះ ១​ ឈ្មោះ ឆោម ស្រីណូ អាយុ៣៨ឆ្នាំ មានទីលំនៅភូមិពោធិ៍រោង ឃុំព្រះបាទជាន់ជុំ ស្រុកគីរីវង់ ២ ឈ្មោះ  ធន់ នឿន ភេទស្រី អាយុ៤៨ឆ្នាំ មានទីលំនៅភូមិឈើទាលភ្លោះ ឃុំព្រៃអំពក ស្រុកគីរីវង់ និង ៣ ឈ្មោះ សួន ផល្លី ភេទស្រី អាយុ៣៥ឆ្នាំ មានទីលំនៅភូមិជ្រោយ ឃុំព្រះបាទជាន់ជុំ ស្រុកគីរីវង់។ 

វត្ថុតាងក្នុងពេលបង្ក្រាបសមត្ថកិច្ចបានធ្វើការដកហូតម៉ូតូ០១គ្រឿងម៉ាក BLADE ពណ៌ខ្មៅលាយក្រហម គ្មានស្លាកលេខ (ម៉ូតូចាស់) ក្រណាត់ក្រាលចំនួន០១ និងបៀរចំនួន០៥ហ៊ូ។

បច្ចុប្បន្នក្រោយចុះបង្ក្រាបសមត្ថកិច្ចបាននាំយកមកធ្វើការអប់រំណែនាំ និងធ្វើកិច្ចសន្យាឱ្យបញ្ឈប់ការលេងល្បែង និងកាត់បន្ថយការជួបជុំ ដើម្បីបញ្ជៀសការរីករាលដាលជំងឺកូវីត-១៩៕

អត្ថបទ៖ វីរៈ