រដ្ឋាករស្វយ័តដឹកជញ្ជូន បន្តធ្វើទំនើបកម្មប្រព័ន្ធស្វ័យប្រវត្តិផ្តល់ព័ត៌មានលើអេក្រង់ ដើម្បីបង្កលក្ខណៈកាន់តែងាយស្រួល

លោក កែវ ចាន់ណារិទ្ធ អភិបាលរដ្ឋាករស្វយ័តដឹកជញ្ជូនសាធារណៈរថយន្តក្រុង (City Bus) បានឲ្យដឹងថា រដ្ឋាករស្វយ័តដឹកជញ្ជូនសាធារណៈរថយន្តក្រុង (City Bus) បានបន្តធ្វើទំនើបកម្មប្រព័ន្ធស្វ័យប្រវត្តិផ្តល់ព័ត៌មានលើអេក្រង់ក្នុងរថយន្ត ដើម្បីបង្កលក្ខណៈកាន់តែងាយស្រួលជូនប្រជាពលរដ្ឋអ្នកប្រើប្រាស់។

លោកបានបន្តថា ក្រោមការយកចិត្តទុកដាក់ខ្ពស់ពី សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី និង លោក ឃួង ស្រេង អភិបាលរាជធានីភ្នំពេញ តែងតែជំរុញឲ្យបង្កើនការយកចិត្តទុកដាក់ តាមរយៈការគិតគូរជាមួយប្រជាពលរដ្ឋគ្រប់កាលៈទេសៈ ពិសេសការធ្វើទំនើបកម្មខាងលើនេះ គឺជាភាពចាំបាច់មួយដែលត្រូវបំពេញ ឆ្លើយតបតាមយុគសម័យអភិវឌ្ឍន៍របស់ប្រទេសជាតិ។

ពលរដ្ឋអ្នកប្រើប្រាស់សេវារថយន្តក្រុងសាធារណៈ បានបង្ហាញក្តីពេញចិត្ត ព្រមទាំងថ្លែងអំណរគុណរដ្ឋាភិបាលកម្ពុជាចំពោះការផ្តល់សេវាជិះធ្វើដំណើរមួយដែលសម្រាលបន្ទុកការចំណាយខ្ពស់ កាន់តែផ្តល់ភាពងាយស្រួល និង ទំនើប ធ្វើឲ្យការជិះធ្វើដំណើរមានភាពកក់ក្តៅខ្ពស់ ប្រកបដោយសុវត្ថិភាព ផងដែរ។

គួរជម្រាបថា សេវារថយន្តក្រុងសាធារណៈនេះ គឺមិនមានគិតថវិកានោះឡើយ សម្រាប់កុមារតូចៗ , ស្ត្រីមានផ្ទៃពោះ , ព្រះសង្ឃ , ជនមានពិការភាព , គថ្លង់ , និង មនុស្សចាស់ជរា ជាដើម។ ដោយឡែក សម្រាប់អ្នកទូទៅ ក្រៅពីអ្នកលើកលែងខាងលើ គឺត្រូវបង់តែ ១ ៥០០ រៀលប៉ុណ្ណោះ ក្នុងការជិះធ្វើដំណើរម្តង ឬ មួយខ្សែរត់៕
អត្ថបទ ៖ សុភា