ដេននី ក្វាន់ បញ្ជាក់មូលហេតុមិន Live ភ្លាមៗ ពេលកើតហេតុ​

ភ្នំពេញ ៖ មាន​សំនួរ​ចោទ​សួរតារាស្រីកញ្ញាដេននី ក្វាន់ ថា ហេតុអ្វីភ្លាមៗពេលកើតហេតុ នាងមិនព្រមធ្វើការ Live វីដេអូនិងបញ្ចេញការពិតឲ្យមហាជនបានដឹង ហេតុអ្វីទើបពេលនេះមកទាមទារយុត្តិធម៌ក្រោយសំណង១ម៉ឺនដុល្លារ?។

ឆ្លើយតបចម្ងល់​នេះ​កញ្ញា ដេននី ក្វាន់ បានបញ្ជាក់តាមរយ:ការ Live យប់មិញថា មូលហេតុដែលនាងមិន Live ភ្លាមៗពេលកើតហេតុ ព្រោះធ្វើតាមនីតិវិធីច្បាប់និងការស្នើសុំរបស់សមត្ថកិច្ច ដែលប្រាប់នាងថាទុកឲ្យសមត្ថកិច្ចជាអ្នកដោះស្រាយធ្វើការទៅតាមច្បាប់។

អ្នក​នាងបន្តថា បើសិនដឹងថាមានរឿងអយុត្តិធម៌បែបនេះសម្រាប់ខ្លួនភ្លាមៗ នាងនឹងធ្វើការLive ហើយ។ ម្យ៉ាងដោយជឿជាក់លើប្រព័ន្ធច្បាប់និងតុលាការក្នុងការរកយុត្តិធម៌ឲ្យនាងដែលជាជនរងគ្រោះ ក្នុងករណីម្ចាស់សណ្ឋាគារសមុទ្រមាសក្រុងកំពង់សោមលួចបង្កប់កាមរ៉ា​ក្នុងបន្ទប់នាងគេង។

តារាស្រី​រូបនេះ ​ក៏​ចោទ​សួរ​ថា បើបងប្អូនជានាងព្រមទទួលយកសំណង​១ម៉ឺន​ដុល្លារនឹងទេ? កិត្តិយសអ្នកនាង​មិន​អាច​យក​លុយ​១​ម៉ឺន​ដុល្លារ​មកទិញបានទេ ឈឺចាប់ហួសថ្លែងអយុត្តិធម៌សម្រាប់រូបនាងណាស់។

ដេននី ក្វាន់ បន្ថែមថា ថ្វីត្បិតតែនាងទាមទារសំណងចំនួន១០ម៉ឺនដុល្លារក៏ពិតមែន តែមិនបានស្មើកិត្តិយសនិងសេចក្តីថ្លៃថ្លូររបស់នាងជាស្ត្រីឡើង។ ប៉ុន្តែអ្វីដែលនាងទាមទារពេលនេះគឺយុត្តិធម៌សម្រាប់ខ្លួនប៉ុណ្ណោះ។ ចំណែកសំណងជំងឺចិត្តដែលថាបាន ១ម៉ឺនដុល្លារនោះ គឺនាងមិនទាន់ទទួលបាន​សូម្បី១០០រៀល​លុយខ្មែរ៕

អត្ថបទ៖ ចាន់រ៉ា