សម្តេចតេជោបញ្ជាឱ្យក្រសួងសុខាភិបាលផ្តល់ឧបករណ៍តេស្តរហ័សដល់បណ្តាខេត្តឱ្យបានទាន់ពេលវេលា

ភ្នំពេញ៖ ប្រមុខរដ្ឋាភិបាលកម្ពុជាសម្តេចតេជោ ហ៊ុន សែន បានដាក់បទបញ្ជាឱ្យក្រសួងសុខាភិបាលត្រូវផ្តល់ឧបករណ៍តេស្តរហ័សដល់បណ្តាខេត្ត ពិសេសខេត្តជាប់ព្រំដែនសម្រាប់ធ្វើតេស្តដល់អ្នកដំណើរចូលមកកម្ពុជា។

ការដាក់បញ្ជានេះបានធ្វើឡើងបន្ទាប់ពីខេត្តនៅជាប់ព្រំដែនមានការខ្វះខាតឧបករណ៍តេស្តរហ័សសម្រាប់ធ្វើតេស្តដល់ពលករខ្មែរមកពីប្រទេសថៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយៈសេចក្តីថ្លែងពិសេសនៅព្រឹកនេះ សម្តេចតេជោបានមានប្រសាសន៍ថា៖ “ក្រសួងសុខាភិបាលត្រូវទទួលខុសត្រូវចំពោះបញ្ហាឧបករណ៍តេស្តរហ័សនេះ ដោយផ្តល់ឱ្យខេត្តឱ្យបានឆាប់ និងទាន់ពេលវេលា ដោយផ្តល់១ខេត្តយ៉ាងហោចណាស់១ម៉ឺនតេស្តដែរ”។

សម្តេចតេជោ ហ៊ុន សែន បានប្រៀបធៀបទៅនឹងការធ្វើសង្គ្រាមថា៖ “ធ្វើដូចនេះ ឱ្យមេទ័ពទៅធ្វើមេទ័ពទៅច្បាំងអត់មានអាវុធផង តើឱ្យទៅច្បាំងយ៉ាងម៉េចនឹងកើត។ ដូចគ្នានេះដែរបើប្រយុទ្ធនឹងជំងឺកូវីដ-១៩ អត់មានឧបករណ៍តេស្តរហ័សផង តើទុកឧបករណ៍តេស្តទាំងនោះក្នុងឃ្លាំងធ្វើអី បើមិនយកមកប្រើ?”។

សម្តេច បានបញ្ជាក់ថា ឧបករណ៍តេស្តរហ័សមិនមានការខ្វះខាតទេ ដោយបច្ចុប្បន្ននេះមាននៅក្នុងឃ្លាំងចំនួន ១,១៤៤,៤៥០តេស្ត ហើយនាពេលខាងមុខនេះនឹងមកដល់១លានតេស្តទៀត និងត្រៀមយុទ្ធសាស្ត្រ៣សែនតេស្ត។

សម្តេច បានបន្ថែមថា៖ “លុយមិនខ្វះទេ រាជរដ្ឋាភិបាល ហ៊ុន សែន មិនដួលរលំដោយសារជំងឺកូវីដ-១៩ ជិត២ឆ្នាំនេះទេ គឺយើងអាចនៅរស់បាន”។

សម្តេចបានលើកឡើងទៀតថា ការផ្តល់ឧបករណ៍តេស្តនេះមានសារសំខាន់ណាស់សម្រាប់ធ្វើតេស្តភ្លាមៗដល់ពលករខ្មែរដែលចូលមកកម្ពុជា ហើយបើសង្ស័យត្រូវធ្វើតេស្តម៉ាស៊ីនធំជាបន្តទៀត ដែលនៅខេត្តបាត់ដំបង និងសៀមរាបក៏មានដែរ៕

អត្ថបទ៖ សំអឿន