ព័ត៌មានជាតិ

៥គ្រួសារ ដែលមានសមាជិកស្លាប់ដោយជំងឺកូវីដ បានទទួលថវិការាជរដ្ឋាភិបាល ម្នាក់៥លានរៀល

បានផុស

២ years មុន

នៅ

ថ្ងៃព្រហស្បតិ៍ ១៥ កក្កដា ២០២១

ដោយ

ឯកឧត្តម ម៉ែន វិបុល អភិបាលខេត្តស្វាយរៀង បានអញ្ជើញជាអធិបតីក្នុងពិធីប្រគល់ថវិការាជរដ្ឋាភិបាលឧបត្ថម្ភជូនគ្រួសារសព ដែលស្លាប់ដោយសារជំងឺកូវីដ១៩ ក្នុងក្រុងស្វាយរៀង ចំនួន ៥គ្រួសារ ក្នុងមួយគ្រួសារទទួលបានថវិកាចំនួន ៥.០០០.០០០រៀល នៅថ្ងៃទី១៥ ខែកក្កដា ឆ្នាំ២០២១នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងពិធីនេះដែរ ក៏មានការអញ្ជើញចូលរួមពីឯកឧត្តម តូច ប៉ូលីវ៉ា អភិបាលរងខេត្ត ឯកឧត្តមវេជ្ជបណ្ឌិត កែរ រដ្ឋា ប្រធានមន្ទីរសុខាភិបាលខេត្ត លោក ណុប ចំរើន អភិបាលក្រុងស្វាយរៀង លោក ទីវ សុភា ប្រធានមន្ទីរធម្មការ និងសាសនាខេត្ត និងបងប្អូនប្រជាពលរដ្ឋជាសមាជិកគ្រួសារសព។

មានប្រសាសន៍ក្នុងឱកាសនោះ ឯកឧត្តម ម៉ែន វិបុល អភិបាលខេត្តស្វាយរៀង បានចូលរួមរំលែកទុក្ខដល់គ្រួសារនៃសព និងបានបញ្ជាក់ផងដែរថា ការរៀបចំផ្ដល់ជូនថវិការបស់រាជរដ្ឋាភិបាលនេះ គឺជាការគិតគូដោយយកចិត្តទុកដាក់ និងជាការចូលរួមចំណែករំលែកទុក្ខរបស់សម្តេចតេជោ ហ៊ុន សែន ជាមួយបងប្អូនប្រជាពលរដ្ឋដែលបានបាត់បង់សមាជិកគ្រួសារ សាច់ញាតិ ជាទីគោរពស្រលាញ់ដោយសារជំងឺកូវីដ-១៩ ដ៏កាចសាហាវនេះ។ ឯកឧត្តមបានបន្ថែមទៀតថា រាជរដ្ឋាភិបាលកម្ពុជា ក៏ដូចជារដ្ឋបាលខេត្តស្វាយរៀង បាននិងកំពុងបើកយុទ្ធនាការចាក់វ៉ាក់សាំងជូនប្រជាពលរដ្ឋ កម្មករ កម្មការិនី ដើម្បីបង្កើតភាពស៊ាំ និងអង់ទីគ័រការពារប្រឆាំងនឹងជំងឺ ដែលជួយកាត់បន្ថយការឆ្លងរាលដាលបានមួយផ្នែកធំ ហើយទោះបីមានការឆ្លង ក៏អ្នកជំងឺមិនមានអាការៈធ្ងន់ធ្ងរ និងមិនមានហានិភ័យដល់ជីវិតនោះឡើយ។

ឯកឧត្តមអភិបាលខេត្ត បានអំពាវនាវប្រជាពលរដ្ឋ សូមមកទទួលសេវាចាក់វ៉ាក់សាំងឱ្យបានគ្រប់គ្នាតាមទីតាំង និងពេលវេលាដែលអាជ្ញាធរមូលដ្ឋានបានកំណត់ និងសូមចូលរួមអនុវត្តវិធានការ៣កុំ ៣ការពាររបស់រាជរដ្ឋាភិបាល និងអនុវត្តតាមការណែនាំរបស់ក្រសួងសុខាភិបាល ដើម្បីការពារខ្លួនយើង គ្រួសារយើង សង្គមជាតិយើង ពីជំងឺកូវីដ-១៩៕

អត្ថបទ៖ ភក្ដី

Related Topics:ប្រាក់ឧបត្ថម្ភ