ក្រុមក្មេងទំនើង ​១៧នាក់​ ដែលល្មើសបម្រាមគោចរ ត្រូវបញ្ជូនទៅតុលាការ

ក្រុមក្មេងទំនើងចំនួន​១៧នាក់​ ដែលល្មើសបម្រាមគោចរ និងមានសារធាតុស្រវឹង នៅពេលបើកបរ នៅខណ្ឌជ្រោយចង្វារ​ ដែលសមត្ថកិច្ចឃាត់ខ្លួន កាលពីយប់ថ្ងៃទី៣ ខែសីហា ឆ្នាំ២០២១នោះ ត្រូវបានបញ្ជូនទៅតុលាការ។ លោក​វរសេនីយ៍ឯក សាន សុខសីហា ជំនួយការស្នងការ និងជាអ្នកនាំពាក្យ នៃស្នងការដ្ឋាននគរបាលរាជធានីភ្នំពេញ។

លោកវរសេនីយ៍ឯក សាន សុខសីហា បានឲ្យដឹងថា ក្រុមក្មេងទំនើងចំនួន១៧នាក់ ដែលល្មើសបម្រាមគោចរនោះ ត្រូវបានបញ្ជូនទៅកាន់តុលាការ នៅព្រឹកថ្ងៃទី៦ ខែសីហា ឆ្នាំ២០២១នេះ។

គួររំលឹកថា កាលពីយប់ថ្ងៃទី៣ ខែសីហា ឆ្នាំ២០២១កន្លងទៅនេះ កម្លាំងចម្រុះខណ្ឌជ្រោយចង្វារ ដឹកនាំដោយ លោ​ក ឃ្លាំង ហួត អភិបាលខណ្ឌជ្រោយចង្វារ ឃាត់ខ្លួនយុវជនប្រុស-ស្រី ចំនួន១៧នាក់ ដែលពួកគេល្មើសបម្រាមគោច របស់រដ្ឋបាលរាជធានីភ្នំពេញ ដែលបានដាក់ចេញកាលពីចុងខែកក្កដា ឆ្នាំ២០២១។ 

សូមជម្រាបថា កម្លាំងចម្រុះ នៃស្នងការដ្ឋាននគរបាលរាជធានីភ្នំពេញ​ ក្រោមការបញ្ជាផ្ទាល់ ពីលោកឧត្ដម​សេនីយ៍​ឯក ស ថេត អគ្គស្នងការរង និងជាស្នងការ បានចេញអនុវត្តបម្រាមគោចរ​ និងល្បាត​យ៉ាងសកម្ម និងម៉ឺងម៉ាត់បំផុត បន្ទាប់ពីមានសេចក្ដីសម្រេច របស់រដ្ឋបាលរាជធានីភ្នំពេញ។ ចំពោះអ្នកល្មើសនឹងបម្រាមគោ ចរ មិនត្រូវបានលើកលែងឡើយ​ ដោយអ្នកល្មើសទូទៅ នឹងត្រូវផាកពិន័យ​ រីឯអ្នកល្មើសធ្ងន់ធ្ងរ​ នឹងត្រូវបញ្ជូនទៅតុលាការ ដើម្បីអនុវត្តបន្ត តាមនីតិវិធីច្បាប់៕ (ដោយ)៖ ឃួន សុភ័ក្រ ​