អាស៊ានរំលឹកខួបលើកទី៥៤ឆ្នាំ ក្រោមប្រធានបទ “យើងយកចិត្តទុកដាក់ យើងរៀបចំ យើងរីកចម្រើន”

សមាគមប្រជាជាតិអាស៊ីអាគ្នេយ៍ (អាស៊ាន-ASEAN) កាលពីម្សិលមិញ (ថ្ងៃទី៨ ខែសីហា) បានប្រារព្ធពីធីរំលឹកខួបលើកទី៥៤របស់ខ្លួន ក្រោមប្រធានបទ “យើងយកចិត្តទុកដាក់ យើងរៀបចំ យើងរីកចម្រើន”។

យោងតាមផេកផ្លូវការរបស់អាស៊ានបានលើកឡើងថា ៥៤ឆ្នាំកន្លងមក អាស៊ានពោរពេញទៅដោយក្តីសង្ឃឹម សមិទ្ធផល និងក្តីសុបិន្ត សម្រាប់សហគមន៍អាស៊ាន ដែលកាន់តែខ្លាំងជាងមុន។ យើងរួមគ្នា យើងអាចរីក ចម្រើន យើងរួបរួមគ្នាយើងអាចសម្រេចបានកាន់តែច្រើន ដើម្បីផលល្អប្រសើររបស់ប្រជាជនអាស៊ាន។

ដើម្បីរំលឹកដល់ទិវាអាស៊ានលើកទី៥៤នេះ លេខាធិការដ្ឋានអាស៊ាន បានសហការជាមួយបណ្តាប្រទេសជាសមាជិកអាស៊ាន រៀបចំ “ទិវាលក់តាមអ៊ីនធឺណិតអាស៊ាន” លើកទី២ ដើម្បីភ្ជាប់ទំនាក់ទំនងរវាងក្រុមហ៊ុនទីផ្សារអេឡិចត្រូនិកទៅកាន់អ្នកប្រើប្រាស់ក្នុងតំបន់ផងដែរ។ព្រឹត្តិការណ៍នេះ គឺជាផ្នែកមួយនៃកិច្ចខិតខំប្រឹងប្រែងរបស់អាស៊ានក្នុងការកសាងទំនុកចិត្តអ្នកប្រើប្រាស់ឡើងវិញដោយប្រើប្រាស់បច្ចេកវិទ្យាឌីជីថលឆ្ពោះទៅរកការស្តារឡើងវិញដ៏រឹងមាំ។

ក្រៅពីនេះ ការប្រារព្ធពិធីនេះ ក៏បានរួមបញ្ចូលទាំងការប្រកាសនូវគំនិតផ្តួចផ្តើមថ្មីមួយ ដែលហៅថា “អាហារូបករណ៍អាស៊ាន-មេយប៊ែង” ដែលគាំទ្រដោយមូលនិធិធនាគារមេយប៊ែង (Maybank) ដែលជាអង្គភាពអាស៊ាន ដែលទើបនឹងបានទទួលស្គាល់ថ្មីៗនេះ ដោយសហការជាមួយលេខាធិការដ្ឋានអាស៊ាន។

កម្មវិធីអាហារូបករណ៍នេះ នឹងត្រូវបានសហការអនុវត្តដោយមូលនិធិអាស៊ាន និងបណ្តាញសាកលវិទ្យាល័យអាស៊ាន។ ការដាក់ពាក្យសុំសម្រាប់កម្មវិធីអាហារូបករណ៍នេះនឹងចាប់ផ្តើមនៅក្នុងឆ្នាំ២០២២។

ទន្ទឹមនឹងនេះដែរ គណៈកម្មាធិការតំណាងអចិន្ត្រៃយ៍ប្រចាំអាស៊ាន កំពុងរៀបចំឲ្យមានសិក្ខាសាលាតាមប្រព័ន្ធអនឡាញជាសាធារណៈមួយនៅថ្ងៃទី១១ ខែសីហា ខាងមុខ ដោយផ្តោតសំខាន់ទៅលើបញ្ហាសុខភាព និងការស្តារសេដ្ឋកិច្ចឡើងវិញ។

លោក Dato Lim Jock Hoi អគ្គលេខាធិការអាស៊ាន បានថ្លែងទៅកាន់ពិធី ដែលត្រូវបានផ្សាយបន្តផ្ទាល់តាមបណ្តាញទំនាក់ទំនងសង្គមរបស់អាស៊ានថា ចាប់តាំងពីជំងឺកូវីដ-១៩ បានផ្ទុះឡើងកាលពីដើមឆ្នាំ២០២០មក ប្លុកនេះបានឆ្លៀតឱកាសក្លាយជាសហគមន៍ដែលមានភាពរឹងមាំ និងមានភាពធន់។

លោកបានគូសបញ្ជាក់អំពីតម្រូវការសម្រាប់សមាគមនេះ ដើម្បីឆ្ពោះទៅរកការស្តារឡើងវិញក្រោយជំងឺរាតត្បាតសម្រាប់រយៈពេលវែងតាមរយៈការជំរុញការផ្លាស់ប្តូរឌីជីថលគ្រប់ជ្រុងជ្រោយទៅលើគ្រប់វិស័យ។

ចំណែកលោកស្រី Retno Marsudi រដ្ឋមន្រ្តីការបរទេសឥណ្ឌូណេស៊ី បានអំពាវនាវឱ្យប្រទេសជាសមាជិកទាំងអស់ដើរតួនាទីវិជ្ជមានបន្ថែមទៀតក្នុងការបង្កើតការជម្រុញក្នុងតំបន់ ដើម្បីលើកកម្ពស់គោលការណ៍ និងគុណតម្លៃដែលមានចែងនៅក្នុងទស្សនវិស័យអាស៊ានស្តីពីតំបន់ឥណ្ឌូ-ប៉ាស៊ីហ្វិក (AOIP) ។

លោកស្រីបន្ថែមថា “ជំងឺរាតត្បាតស្ទើរតែមិនមែនជាបញ្ហាប្រឈមតែមួយគត់របស់យើងនោះទេ សន្តិភាព និងស្ថេរភាពក្នុងតំបន់ក៏ទាមទារឱ្យមានការយកចិត្តទុកដាក់របស់យើងផងដែរ។ ការប្រកួតប្រជែងអំណាចធំៗមិនបង្ហាញអំពីការថមថយឡើយក្នុងពេលឆាប់ៗនេះ និងមានសក្តានុពលក្នុងការបែងចែកក្នុងចំណោមពួកយើង”។

សូមបញ្ជាក់ថា សមាគមប្រជាជាតិអាស៊ីអាគ្នេយ៍ ត្រូវបានបង្កើតឡើងនៅថ្ងៃទី០៨ ខែសីហា ឆ្នាំ១៩៦៧ ដោយដំបូងឡើយមានប្រទេសចំនួន០៥ គឺប្រទេសម៉ាឡេស៊ី ឥណ្ឌូណេស៊ី ហ្វីលីពីន សិង្ហបុរី និងប្រទេស ថៃ ហើយប្រទេសកម្ពុជាបានក្លាយខ្លួនជាសមាជិកអាស៊ាន នៅថ្ងៃទី៣០ ខែមេសា ឆ្នាំ១៩៩៩។

សមាគមប្រជាជាតិអាស៊ីអាគ្នេយ៍ មានទីស្នាក់ការកណ្តាល នៅរដ្ឋធានីហ្សាការតា ប្រទេសឥណ្ឌូណេស៊ី៕ កោះកែវ