មិនសុំទានទេ លោកយាយវ័យ៨០ឆ្នាំខំដឹកអង្ករពីស្រុកមកលក់ដល់ភ្នំពេញ

ភ្នំពេញ៖ គួរឱ្យអាណិត និងសរសើរ លោកយាយវ័យ៨០ឆ្នាំម្នាក់ដែលសុខចិត្តដើរទិញអង្ករពីស្រុកកំណើតយកមកលក់នៅភ្នំពេញ ដើម្បីបានលុយយកទៅធ្វើបុណ្យ ដោយលោកយាយមិនហ៊ានលើកដៃសុំគេទេ។

ជួបជាមួយភ្នាក់ងារ “កម្ពុជាថ្មី” លោកយាយឈ្មោះ វ៉ាន់ ថុន អាយុ៨០ឆ្នាំ បានប្រាប់ថា លោកយាយមានស្រុកកំណើតភូមិ សរប្រចន្ទ័លើ ឃុំពារាំង ស្រុកពារាំង ខេត្តព្រៃវែង។ លោកយាយបានមានប្រសាសន៍បន្តថា សព្វថ្ងៃនេះលោកយាយមិនសូវមានកម្លាំងកំហែងប៉ុន្មានទេ។ ប៉ុន្តែដោយសារលោកយាយចាប់យករបរទិញ លក់អង្ករតាំងពីក្មេងមក លោកយាយក៏មិនបោះបង់ចោល ព្រោះបានលុយទុកគ្រាន់ធ្វើបុណ្យ ដោយពុំចាំបាច់សុំទានគេ។ លោកយាយ លើកឡើងថា បើសិនជាអស់កម្លាំងកំហែងពេលណា ចាំគិតទៀត។

លោកយាយ វ៉ាន់ ថុន បានបន្តថា មានតែមុខរបរទិញលក់អង្ករនេះហើយដែលផ្ដល់ប្រាក់កម្រៃដល់លោកយាក។ ពិសេសលោកយាយមានអតិថិជនរងចាំទិញដែលភាគច្រើនគាត់អាណិតលោកយាយ ហើយជួយទិញ គឺចាត់ទុកជាធ្វើបុណ្យ ព្រោះអតិថិជនឃើញលោកយាយអាយុច្រើន តែនៅប្រកបរបរលក់អង្ករទាំងត្រដាបត្រដួស។

នេះគឺជាការតស៊ូ របស់លោកយាយវ័យ៨០ឆ្នាំ ដែលគួរឱ្យកោតសសើរដោយសារលោកយាយនៅតែតស៊ូខិតខំទោះខ្លួនចាស់ជរា ដោយសុខចិត្តមិនលើកដៃសំពះសុំទានគេ៕

អត្ថបទ៖ នរា