អ្នកសារព័ត៌មាន ៩នាក់ ដែល សង្ស័យទារប្រាក់គេ ៤ពាន់ ដុល្លារ កំពុងស្ថិតក្រោម ការ សាកសួរ ពីព្រះរាជអាជ្ញា​

ព្រះរាជអាជ្ញា នៃសាលាដំបូងខេត្តស្ទឹងត្រែង មិនទាន់បញ្ចប់ការសាកសួរ ទៅលើអ្នកសារព័ត៌មាន ចំនួន៩នាក់ ដែល​ត្រូវបានឃាត់ខ្លួន​ និងបញ្ជូនខ្លួនទៅកាន់តុលាការ ពាក់ព័ន្ធនឹងករណីសង្ស័យ​ទា​រ​ប្រាក់ ចំនួន៤ពាន់ ដុល្លារ ពីអ្នកដឹក​ឈើផ្ទះចាស់ៗនោះនៅឡើយទេ បើគិតត្រឹមរសៀលថ្ងៃទី៩ ខែកញ្ញា ឆ្នាំ២០២១នេះ។

លោកឧត្តមសេនីយ៍ត្រីអៀង​ វ៉ាន់ឌី​ មេបញ្ជាការអាវុធហត្ថ​ស្ទឹងត្រែង បានឲ្យដឹងថា «ពួកគេកំពុង​សួរនាំនៅ ឡើយ​  ហើយរឿងនេះ ជារឿងរបស់ព្រះរាជអាជ្ញា»។ ព្រះរាជអាជ្ញាខេត្តស្ទឹងត្រែង​ លោក ជេត ខេមរា​ មិនទាន់ អាចសុំការបំភ្លឺបាន​ទេ ចំពោះការសាកសួរ ទៅលើអ្នកសារព័ត៌មានទាំង៩នាក់នោះ​ ដោយទូរស័ព្ទចូល តែពុំ មានអ្នកទទួល។

សូមជម្រាបថា​ អ្នកសារព័ត៌មាន ចំនួន៩នាក់ ត្រូវបានកងកម្លាំងអាវុធហត្ថខេត្ត​ ក្រោមបញ្ជាពីឧត្តមសេនីយ៍ ត្រី អៀង​ វ៉ាន់ឌី​ មេបញ្ជាការ​ កងរាជអាវុធហត្ថខេត្តស្ទឹងត្រែង បញ្ជាឲ្យឃាត់ខ្លួន ​ចំណុចជាំធំ ស្ថិតភូមិស្រែឬ ស្សី ក្នុងស្រុកថាឡាបរិវ៉ាត់​ ខេត្តស្ទឹងត្រែង កាលពីថ្ងៃទី៧ ខែកញ្ញា ឆ្នាំ២០២១។ ការឃាត់ខ្លួន អ្នកសារព័ត៌ មានទាំងនោះ​ គឺធ្វើឡើងតាមបណ្តឹង របស់ក្រុមអ្នករកស៊ីទិញឈើអារថ្មីៗ យកទៅវ៉ៃដែកគោល ត្រាំទឹកទៅ ជាគ្រឿងឈើផ្ទះចាស់ៗ។ ក្រុមអ្នករកស៊ីទិញឈើទាំងនោះ បានចោទក្រុមអ្នកសារព័ត៌មានទាំង៩នាក់នោះ ថា ពួកគេបានជំរិតទារប្រាក់ ចំនួន៤ពាន់ដុល្លារ។

យ៉ាងណាក៏ដោយ គិតត្រឹមរសៀលថ្ងៃទី៩ ខែកញ្ញានេះ តុលាការកំពុងបន្តនីតិវិធី សាកសួរពួកគេនៅឡើយ ដោយ​មិនទាន់ដឹង​ថា តុលាការនឹងមានចំណាត់ការ បែបណានោះទេ៕

អត្ថបទ៖ ងិន លីម