ព័ត៌មានជាតិ

ចាប់ផ្តើមយកសំណាករកមេរោគនៃជំងឺកូវីត១៩ លើមន្ត្រីនិងអ្នកពាក់ព័ន្ធផ្ទាល់និងប្រយោលជាច្រើននាក់នៅបន្ទាយមានជ័យ

បានផុស

៤ years មុន

នៅ

ថ្ងៃអាទិត្យ ២៩ វិច្ឆិកា ២០២០

ដោយ

បន្ទាយមានជ័យ ៖ នៅព្រឹកថ្ងៃទី ២៩ខែវិច្ឆិកា ឆ្នាំ ២០២០ នេះ ក្រុមការងារឆ្លើយតបបន្ទាន់ RRT នៃមន្ទីរសុខាភិបាលខេត្តបន្ទាយមានជ័យ បាននឹងកំពុងយកវត្ថុសំណាកវិភាគ ដើម្បីបញ្ជូនទៅមន្ទីរ ពិសោធន៍នៃវិទ្យាស្ថានប៉ាស្ទ័រ រាជធានីភ្នំពេញ ដើម្បីរកមេរោគនៃជំងឺកូវីត១៩ លើមន្ត្រីនិងអ្នកពាក់ព័ន្ធផ្ទាល់ និងប្រយោលជាច្រើននាក់ នៅខេត្តបន្ទាយមានជ័យ។ លោកវេជ្ជបណ្ឌិតឡេ ច័ន្ទសង្វាត ប្រធានមន្ទីរសុខាភិបាល ខេត្តបន្ទាយមានជ័យបានឲ្យដឹងថា សកម្មភាពនេះធ្វើឡើងក្រោមការដឹកនាំ សម្របសម្រួល ពីអ៊ុ រាត្រី អភិបាលខេត្ត និងដោយមានការសហការចូលរួម ពីលោក លោកស្រី ដែលបានប៉ះពាល់ ផ្ទាល់ និងប្រយោលនឹងឯកឧត្តមអគ្គនាយកនៃអគ្គនាយកដ្ឋានពន្ធនាគារនិងអ្នកពាក់ព័ន្ធបានយ៉ាងរលូន ប្រកបដោយការទទួលខុសត្រូវ ក្នុងការបង្ការទប់ស្កាត់ កូវីដ១៩ ទាំងអស់គ្នា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅសាលប្រជុំសាលាបាលខេត្តបន្ទាយមានជ័យ មានមន្ត្រីថ្នាក់ដឹកនាំ មន្ត្រីរាជការស៊ីវិល កងកម្លាំង រួមទាំងមន្ត្រីពន្ធនាគារអនុរក្សរាប់រយនាក់បានទៅសុំផ្តល់សំណាក់ធ្វើតេស្ត។

លោកវេជ្ជឡេ ច័ន្ទសង្វាត បានប្រកាសថា គ្រូពេទ្យនិងមន្ត្រីជំនាញក្រុមRRTនៃមន្ទីរសុខាភិបាលខេត្តបន្ទាយមានជ័យសុំធ្វើតែអ្នកទាំងឡាយណា ដែលបានប៉ះពាល់ផ្ទាល់សិនប៉ុណ្ណោះ ពោលគឺប៉ះពាល់នឹងលោកព្រះរាជអាជ្ញា ព្រះរាជអាជ្ញារង លោកស្នងការស្នងការរង លោកប្រធាន អនុប្រធានពន្ធនាគារ ពន្ធនាគារអនុរក្ស តែប៉ុណ្ណោះ។ បន្ទាប់ពីមន្ត្រីទាំងអស់នេះ ដែលធ្លាប់ប៉ះពាល់ផ្ទាល់នឹងលោកឧត្តមអគ្គានុរក្ស ថ្នាក់លេខ១ ឆែម សាវុធ អគ្គនាយក នៃអគ្គនាយកដ្ឋានពន្ធនាគារក្រសួងមហាផ្ទៃ កាលពីថ្ងៃទី១៣ ខែវិច្ឆិកាឆ្នាំ ២០២០ នៅទីតាំងពន្ធនាគារខេត្តបន្ទាយមានជ័យ ក្នុងភូមិគាប សង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ ពេលទទួលការវិលត្រឡប់មកវិញនូវអ្នកជាប់ឃុំជាង១.៦០០នាក់ ក្រោយទឹកជំនន់ស្រក។

ក្នុងប្រតិបត្តិការទទួលអ្នកជាប់ឃុំវិលវិញនៅពន្ធនាគារខេត្តបន្ទាយមានជ័យ តាំងពីថ្ងៃទី១៣ខែវិច្ឆិកា ឆ្នាំ២០២០ ក្រៅពីលោកឧត្តមអគ្គានុរក្សថ្នាក់លេខ១ ឆែម សាវុធ អគ្គនាយក ដែលភរិយាគាត់បានវិជ្ជមានកូវីត១៩ ក៏មានអគ្គនាយករង មន្ត្រី និងដោយមានការចូលរួមលោក ព្រះរាជអាជ្ញា ព្រះរាជអាជ្ញារង អមសាលាដំបូងខេត្តបន្ទាយមានជ័យ លោកឧត្តមសេនីយ៍ត្រីស្នងការនគរបាលខេត្តបន្ទាយមានជ័យ លោកឧត្តមអគ្គានុរក្ស ថ្នាក់លេខ២ ប្រធានពន្ធនាគារខេត្តបន្ទាយមានជ័យ លោក លោកស្រី កងកម្លាំង មន្ត្រីពន្ធនាគារនុរក្ស ក្រុមការងារជាច្រើនរយនាក់នាក់ទៀតបានចូលរួម។ ក្នុងពេលនេះអ្នកពាក់ព័ន្ធដែលប៉ះពាក់ព័ន្ធផ្ទាល់និងប្រយោលជាបន្តបន្ទាប់នឹងមន្ត្រីដូចខាងលើ ក៏សម្រុកមកសុំផ្តល់សំណាកវិភាគជាមួយក្រុមការងារRRT ឯមន្ត្រីដែលបានផ្តល់សំណាកវិភាគហើយ ក៏បានចេញទៅធ្វើចត្តាឡីស័កនៅដាច់ដោយឡែកពីគេ និងរង់ចាំលទ្ធផលតេស្ត ថាតើវិជ្ជមានឬអវិជ្ជមានកូវីត១៩នៅពេលខាងមុខនេះ៕
ដោយ ៖ វ៉ាន់ ណាង