ព័ត៌មានជាតិ

មន្រ្តីចរាចរណ៍៖ គ្មានច្បាប់ណាពិន័យ អ្នកបើកបរបំពានភ្លើងសញ្ញាពណ៌លឿង

បានផុស

៥ years មុន

នៅ

ថ្ងៃពុធ ២៩ កញ្ញា ២០២១

ដោយ

លោក ថី វិសាល នាយការិយាល័យនគរបាលចរាចរណ៍ផ្លូវគោកបានបញ្ជាក់ថា ពាក់ព័ន្ធអ្នកបញ្ជាយានជំនិះពេលមកដល់ភ្លើងស្តុបពណ៌លឿង បើកបរជ្រុលបានន័យថាកង់ខាងមុខឆ្លងផុតគំនូសជាប់ពណ៌សដែលកាត់ទទឹងផ្លូវ ឬមានគំនូសថ្មើរជើងឆ្លងកាត់ អ្នកបើកបរនៅតែអាចបន្តដំណើរទៅមុខបាន អាចទៅមុខត្រង់ បត់ស្តាំ ឬបត់ឆ្វេង ករណីនេះមន្ត្រីចរាចរណ៍មិនអាចផាកពិន័យបានទេ។

បើតាមលោក ថី វិសាល នាយការិយាល័យនគរបាលចរាចរណ៍ផ្លូវគោកបញ្ជាក់ថា ក្នុងច្បាប់ចរាចរណ៍ផ្លូវគោក មិនមានមាត្រាណាចែងធ្វើការពិន័យសម្រាប់អ្នកល្មើសភ្លើងសញ្ញាចរាចរណ៍ពណ៌លឿងនោះដែរ ក្នុងច្បាប់គឺពិន័យតែលើអ្នកដែលល្មើសភ្លើងសញ្ញាពណ៌ក្រហមតែប៉ុណ្ណោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តែករណីភ្លើងស្តុបពណ៌លឿង បែរជាអ្នកបើកបរឈប់នៅលើគំនូសថ្មើរជើងឆ្លងកាត់ ឬឈប់លើផ្លូវប្រសព្វ អាចបង្កគ្រោះថ្នាក់ចរាចរណ៍ ឬ បង្កឲ្យកកស្ទះ មន្រ្តីនគរបាលចរាចរណ៍អាចធ្វើការពិន័យ ពីព្រោះមិនគោរពចរាចរណ៍។

នៅរាជធានីភ្នំពេញ ភ្លើងសញ្ញាចរាចរណ៍បច្ចុប្បន្នមានពីរប្រភេទ គឺប្រភេទដែលមិនមានសញ្ញាព្រួយមានត្រឹម ៥ ភាគរយ ក្រៅពីនេះគឺមានសញ្ញាព្រួយ ដើម្បីងាយស្រួលសម្រួលចរាចរណ៍។

លោក ថី វិសាលបានបញ្ជាក់ករណីនេះថា ភ្លើងសញ្ញាចរាចរណ៍ពណ៌ក្រហមដែលមិនមានសញ្ញាព្រួយ អ្នកបើកបរអាចបត់ស្តាំបានករណីផ្លូវទំនេរគ្មានឧបសគ្គ ហើយស្ថិតនៅខាងស្តាំដៃបំផុត។ តែបើភ្លើងសញ្ញាចរាចរណ៍មានសញ្ញាព្រួញ អ្នកបើកបរត្រូវគោរពតាមសញ្ញាព្រួយដែលចង្អុលបង្ហាញនោះ។

***ផ្លូវស្តុបអក្សរ T នៅផ្លូវមាត់ទន្លេ ខាងមុខសាលសន្និសីទចតុមុខ***

ជាមួយគ្នានេះដែរ ទាក់ទងចំណុចភ្លើងស្តុបផ្លូវរាងជាអក្សរ T វិញ លោក ថី វិសាលបានបញ្ជាក់ថា អ្នកបើកបរច្រើនយល់ច្រឡំឬល្មើសសញ្ញាចរាចរណ៍ពណ៌ក្រហម។ នៅផ្លូវមានភ្លើងស្តុបប្រសព្វអក្សរ T អ្នកបើកបរត្រូវតែឈប់ដាច់ខាត នៅពីមុខគំនូសអ្នកថ្មើរជើងឆ្លងកាត់។

“ផ្លូវប្រសព្វរាងអក្សរ T ដែលខាងស្តាំគ្មានផ្លូវសម្រាប់បត់ស្តាំ។ ការទៅមុខត្រង់ពេលភ្លើងពណ៌ក្រហម អ្នកបើកបរច្រឡំថាស្មើបត់ស្តាំដែរតែគ្មានផ្លូវបត់។ ក្នុងករណីភ្លើងសញ្ញាពណ៌ក្រហម គឺអ្នកបើកបរត្រូវតែឈប់ បើមិនមានផ្លូវបត់ស្តាំ ក៏មិនអាចទៅមុខបានដែរ ករណីនៅបន្តទៅមុខបានន័យគាត់ល្មើសចរាចរណផ្លូវគោកហើយ”។

លោកលើកឡើងករណីនេះ នគរបាលនឹងធ្វើការពិន័យ តាមប្រភេទយានជំនិះជាម៉ូតូ ឬរថយន្តតាមច្បាប់ដែលកំណត់។

អត្ថបទ៖ ប៊ុណ្ណារ៉ា