កូរ៉េខាងត្បូង ងាកទៅរកគ្រូពេទ្យបរទេស ខណៈបាតុកម្មមិនទាន់បញ្ចប់នៅឡើយ

នាយករដ្ឋមន្ត្រីកូរ៉េខាងត្បូងនឹងអនុញ្ញាតឲ្យវេជ្ជបណ្ឌិតបរទេសធ្វើការនៅក្នុងមន្ទីរពេទ្យរបស់ខ្លួន ខណៈដែលការធ្វើបាតុកម្មរយៈពេលជាច្រើនខែដោយក្រុមគ្រូពេទ្យក្នុងប្រទេសនៅតែបង្ហាញសញ្ញាតិចតួចក្នុងការដំណោះស្រាយ ។នេះបើយោងតាមការចេញផ្សាយរបស់សារព័ត៌មាន CNA ថ្ងៃទី១០ ខែឧសភា ។

មនុស្ស​រាប់​ពាន់​នាក់​បាន​ឈប់​ធ្វើ​ការ​នៅ​ថ្ងៃ​ទី​២០ ខែ​កុម្ភៈដើម្បី​តវ៉ា​ចំពោះ​គម្រោង​របស់​រដ្ឋាភិបាល​ក្នុង​ការ​បណ្ដុះបណ្ដាលគ្រូពេទ្យបន្ថែម​ទៀត ដែល​បង្ក​ឲ្យ​មាន​ភាព​ចលាចល​ក្នុង​មន្ទីរពេទ្យ ហើយដើម្បីបន្ធូរបន្ថយការខ្វះខាតផ្នែកសេវាវេជ្ជសាស្ត្រ រដ្ឋាភិបាលបានអនុញ្ញាតិឲ្យគ្រូពេទ្យដែលមានអាជ្ញាប័ណ្ណវេជ្ជសាស្ត្របរទេសបម្រើការក្នុងប្រទេសកូរ៉េបាន ។

បន្ទាប់ពីការគោលការណ៍នេះត្រូវបានប្រកាស ប្រធានសមាគមវេជ្ជសាស្ត្រកូរ៉េ (KMA) លោក Lim Hyun-taek បានបង្ហើបថានឹងមានក្រុមគ្រូពេទ្យសូម៉ាលីដែលទើបបញ្ចប់ការសិក្សាមកដល់កូរ៉េឆាប់ៗនេះ ។ ទោះបីជាយ៉ាងណា ក៏មានការរិះគន់ពីគោលការណ៍នេះផងដែរ ដោយលើកឡើងថាជាការរើសអើងពូជសាសន៍ និងយកគ្រូពេទ្យដែលគ្មានគុណភាពមកព្យាបាលប្រជាជនកូរ៉េ ។

បច្ចុប្បន្នរដ្ឋាភិបាលកូរ៉េខាងត្បូងត្រូវបានជាប់គាំងក្នុងការប្រឈមមុខដាក់គ្នាជាមួយក្រុមគ្រូពេទ្យ ដែលបានបដិសេធមិនត្រឡប់ទៅធ្វើការវិញ បើទោះបីជាក្រសួងសុខាភិបាលបានទទូលសំណើរកាត់បន្ថយការកែទម្រង់ការបណ្តុះបណ្តាលផ្នែកវេជ្ជសាស្រ្តសម្រាប់ឆ្នាំ ២០២៥ ក៏ដោយ ៕

អត្ថបទ៖ ប៊ុន សុភាព