ព័ត៌មានអន្ដរជាតិ

ពូទីន រើសយកលោក Mishustin ឲ្យនៅជានាយករដ្ឋមន្ត្រីដដែល

បានផុស

៣៧ នាទី មុន

នៅ

ថ្ងៃសុក្រ ១០ ឧសភា ២០២៤

ដោយ

នៅថ្ងៃទី១០ ខែឧសភា នេះ លោក វ៉្លាឌឺមៀ ពូទីន បានសម្រេចស្នើឲ្យសភាជាន់ទាបរុស្ស៊ីតែងតាំងលោក Mikhail Mishustin បន្តធ្វើជានាយករដ្ឋមន្ត្រីដដែលទៀត សម្រាប់អាណត្តិថ្មីក្នុងនាមជាប្រធានាធិបតីលើកទី៥នៅរុស្ស៊ីរបស់លោក។

លោក *Mikhail Mishustin* និងលោក ពូទីន (រូបភាព៖ AP)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ស្របតាមគោលការណ៍ច្បាប់ប្រទេសរុស្ស៊ី លោក Mishustin វ័យ៥៨ឆ្នាំ ត្រូវប្រគល់លិខិតលាលែងពីតំណែងជានាយករដ្ឋមន្ត្រី កាលពីថ្ងៃទី៧ ខែឧសភា នៅពេលដែលលោក ពូទីន ចាប់ផ្ដើមស្បថចូលឡើងកាន់តំណែងបន្តជាប្រធានាធិបតីអាណត្តិថ្មី។ បើតាមក្រុមអ្នកអង្កេតការណ៍ បានឲ្យដឹងថា ការស្នើឲ្យលោក Mishustin បន្តមុខតំណែង គឺជារឿងដែលគ្រប់គ្នាអាចប៉ាន់ស្មានដឹងមុនមកហើយ ព្រោះថាលោក ពូទីន បានបង្ហាញការកោតសរសើរជាខ្លាំងចំពោះជំនាញ និងគោលនយោបាយដោះស្រាយបញ្ហាសង្គមរបស់លោក Mishustin ក្នុងអាណត្តិជានាយករដ្ឋមន្ត្រី។

លោក Mishustin និងក្រុមបច្ចេកទេសរបស់លោកនៅក្នុងគណៈរដ្ឋមន្ត្រី ត្រូវគេមើលឃើញថា មានសមត្ថភាពខ្ពស់ក្នុងការធ្វើឲ្យលំហូរសេដ្ឋកិច្ចរុស្ស៊ីមានស្ថិរភាព បើទោះជាក្រុងម៉ូស្គូទទួលរងនូវការដាក់ទណ្ឌកម្មពីលោកខាងលិចក៏ដោយ។

សូមបញ្ជាក់ថា មុនក្លាយជានាយករដ្ឋមន្ត្រីរុស្ស៊ីនៅឆ្នាំ២០២០ លោក Mishustin គឺជានាយកសេវាពន្ធសហព័ន្ធ ដែលបម្រើការចាប់ពីឆ្នាំ២០១០មកម៉្លេះ។ តួនាទីដ៏សំខាន់របស់លោកក្នុងនាមជានាយករដ្ឋមន្ត្រី គឺមិនសូវជាប់ពាក់ព័ន្ធនឹងបញ្ហានយោបាយក្រៅប្រទេសទេ ពោលគឺលោកមានតួនាទីសំខាន់ដោះស្រាយបញ្ហាដែលកើតឡើងនៅក្នុងប្រទេសដូចជា បញ្ហាសង្គម និងបញ្ហាសេដ្ឋកិច្ច ជាដើម៕

ដោយ៖ ឈាង